عليا وعلى أعدائي

كدة كدة الواحد عايش في مهانة وكسفة وإحراج وماهياش عيشة السلام اللي بتكلم عنها كل خاين من خونة العرب وبيتحججوا بيها عشان ميقفوش قدام اسيادهم الصهاينة..
طيب مستنيين ايه؟؟
مش نقوم بقى
وعليا وعلى أعدائي..
الأتراك واقفين ومطوقين الصهاينة الكلاب في سفارتهم هناك.. يارب قويهم والهمهم يطلعوا عليهم طلعة واحدة يخلصوا عليهم ولاد الكلاب دول..
ويبقى يجي حد من كلاب الحرية يقول قتلوهم وهم عزل
الاسرائيلين المزعومين دول كلهم محاربين وحلال فيهم الدبح بسكينة تلمة كمان..
مش هتكلم علينا في مصر.. لان زي ما اتفقنا مصر سكوتها احسن ميت مرة من كلامها.. ربنا يستر بس ومتقومش كالعادة تعكها وهي مش ناقصة.. كفاية البلاوي اللي فينا..
دا احنا ربنا يعلم بحالنا..
في هوان اكتر من كدة اييييييييييييييه

اعمل ايييييييييه؟ اعمل اييييييييييه؟

عايزة اعمل حاجة مش عارفة..
نفسي اصرخ ..
اروح هناك..
ياربي يعني خلاص مفيش فايدة.. كل شوية كدة صدمات
أنام وأقوم على اخبار ضرب وتقتيل وكل مرة اللي بيضرب واحد واللي بيضرب واحد.. بس المرة دي تفوقوا وانتقلوا لمستوى تاني
وبرضه كل مرة رد الفعل واحد..
شجب وادانة ولما يضربهم السلك يبقى سحب سفير أو استدعاءه..
طب وبعدين.. دي تفة وسط بحر.. ده على راي شيخ لو احنا المصريين بس تفينا كل واحد تفة هتغرق..
يعني مشروع دولة..لقيطة .. جاية من لا شيء تعمل كدة في العالم كله...
ياااااااااااااارب.. انا كان عندي أمل
بس أنا غلطانة انا كنت بقول خلاص مفيش فايدة ومستنية النهاية اللي ربنا وعد بيها..
بس غصب عني انسانة وبحلم وكان عندي تخيل الدنيا تقوم بقى على حيلها على الاقل ترد على السفالة دي ..
بس كالعادة.. ااااااااااااااااااه يا جيل طلع على هزيمة وقهر وعدم كرامة..
نفسي تحصل حاجة واحدة بس حلوة وانا على وش الدنيا..
جيت وهمشي وأنا هواااااااااا..
يارب طب انت شايفنا ازاي؟؟
هتحاسبنا على كدة وهتعمل فينا ايه؟؟
يارب والله غصب عننا
يارب رحمتك.. اغفر لنا تقصيرنا..
يارب كن معاهم هناك ومع كل مظلوم بياخد حقه.. ومع كل واحد بيساعده ياخد حقه
ياااااااااارب اقصم كل ظالم .. وكل اللي بيعاونه على ظلمه
ياااااااااارب يااااااااااااااااارب
حسبنا الله ونعم الوكيل

هسسسسسسسس.. محدش يتكلم لمصر تصحى وتعك الدنيا

السلام عليكم..
طب ينفع الكلام ده؟؟
بصراحة اه ينفع..
أنا أتمنى ان مصر تفضل نايمة كدة وعاملة عبيطة أحسن ما تقوم وتبهدل الدنيا كالعادة وخصوصا مع خطيبها المفوه السيد أحمد أبو الغيظ
يارب القافلة بكل من فيها وما عليها يوصلوا غزة بالسلامة ويسلم طريقهم ربنا من كل شر ومن كل خائن ومن كل عميل ومن كل معدوم عزة وكرامة ورحمة .. قادر يارب على كل شيء..
أنا كل خوفي دلوقت أسمع الخبر ده
(قامت القوات البحرية المصرية بأبنائها البواسل بقذف أسطول الحرية المتجه إلى غزة وذلك في حملة وطنية للحفاظ على السيادة المصرية على حدودها البحرية مع شقيقتها إسرائيل)..
والله نفسي أكون بهيس.. بس كام مرة حصل الكلام ده قبل ويخلوا راسنا في الطين قدام ربنا أولاً.. وقدام اخواتنا في غزة؟؟ كام مرة؟؟
انا عارفة ان فيه ناس هتوافق وهيقبلوا ده بحجة اننا مش حمل حد يحاربنا.. وهيقولك واحنا مالنا ومالهم دول اولهم فلس وأخرهم طين (والكلام القديم إياه) وهيقولك احنا في معاهدة ولازم نحترم المعاهدات.. وإننا وقعنا اتفاقيات وده قانون دولي واحنا لازم نحترم الأنون..
بس الناس دي كلها وبكل اللي بتقوله اقولهم وبالفم المليان.. اخصصصصصصصصصصصصص..
وكمان جاتكم خيبة..
حرب ايه دي اللي مش عايزين تدخلوها اسم الله على النعيم اللي انتوا عايشين فيه..
وانون ايه اللي لازم كلنا اييييييييييه؟؟ نحترمه.. اومال ست الستات اسرائيل مابتحترموش ليه.. ولا هي تحترم اللي على مزاجها واللي مش على مزاجها ترميه في المنور كدة من غير لا خشى ولا حياء؟؟

على العموم الكلام ده سابق لأوانه ولو اننا عايشين فيه بدليل ان مصر هسسسسسسسس.. واسرائيل (الله يخسف بيهم الأرض) بيستعدوا.. وهنشوف حليف اسرائيل الاستراتيجي الأول في المنطشقة هيعمل ايه؟؟

يارب سلم .. يارب سلم.. يا رب سلم.. وقبل ما يحصل حاجة كدة يتقطع لسانه اللي يدي أمر بحاجة زي دي..

قرار إزالة

قرر بنات الإسلام- حفظهن الله- بموجب قانون رقم 31 في سورة النور.. وغيره من الإثباتات والتاكيدات السنية.. قررن إزالة الأدوار المخالفة والتي تم بناءها على رؤوسهن منذ حوالي عقد من الزمن والتي استمر بناءها ويستمر ويعلم الله إلى متى كانت ستستمر..


ياااااااااااااه .. نفسي أشوف القرار ده بيتنفذ ماهو بجد بقى مش ممكن اللي الواحد بيشوفه ده.. هي مسابقة عمارة ولا ايه؟
سواء أخواتي في الخليج اللي راسهم كنت أول مرة أشوف يعني إيه أسنمة البخت.. وكنت الأول مش فاهمة لما الرسول عليه الصلاة والسلام بيحكي عن: صنفان من أهل النار من أمتي لم أرهما بعد : نساء كاسيات عاريات مائلات مميلات على رؤوسهن مثل أسنمة البخت لا يدخلن الجنة ولا يجدن ريحها.. ربنا يرزقنا وإياكم الجنة..
كنت بقول كاسيات شفناهم.. عاريات شفناهم.. مائلات شفناهم.. مميلات شفناهم.. فكنت متخيلة إن أسنمة البخت دول اللي بيرفعوا شعورهم وعاملين موظامبليط، طيب اشمعنى ماهم كدة كدة مش لابسين الحجاب.. اتاري لأ.. ده دول اللي لابسين حجاب، وكنت أول مرة أشوفهم بقى.. حاجة - ما شاء الله- ربنا يهدي..
وأخواتي بقى في مصر.. وحباااااااااايب مصر.. اللي بقوا بيحطوا على راسهم كمية قماش أكتر من اللي لابسينها على جسمهم..
طب ليه يا ماما كدة.. هي راسنا كجنس قوقازي ناقصة كبر مثلاً؟.. ولا مثلا بيتبني بطريقة عملية إن دماغك كبيرة وضرباها طناش؟ ولا ايه العوبارة؟؟
ولعلمكم بقى مافيهوش شياكة ولا حاجة.. بالعكس شكله بيئة طحن..
ويا إما كدة يا إما ضاربة حتة قماشة لا تغني ولا تسمن من جوع والودان باينة (عشان الحلق طبعا جايباه من داماس فرفشة ولا لازم يبان) والرقبة كمان باينة (اومال تبين الحلق وتحرم الكوليه من الظهور) وهلم جرجر..

هو انا إيه حق حجابي عليا.. ومش بتكلم عن حجاب القلب - على رأي مفتيات ماسبيرو وهوليود الشرق-عشان ده الكلام عنه بديهي ورغم إننا كلنا بناكل حقه بس في الآخر عارفينه ومؤمنين بيه وربنا يهدينا يهداه.
أنا بتكلم عن المظهر.. بصي يا ست البنات وياست الستات
- يغطي مش يعري..
- ميكونش في نفسه زينة.. مش يكون أفتن للناس من المايو..
- يكون متواضع.. مافيهوش بهرجة ولا أضواء نيون..
- يكون نضيف ومكوي مش مبهدل.. عشان محدش يقولي ماهو لازم يبقى شيك عشان ادي صورة حلوة للمحجبات.. جميل جدا.. بس مش لازم يكون بروبروء عشان يبقى شيك.. ولا فوشيا في أخضر.. هو إعلان عن افتتاح ملهى ليلي؟؟!! الله بقى.. ليه تنرفزوا الواحد كدة..
- اللي ملبوس تحتيه يكون زيه كدة يعني يغطي ونضيف ومكوي ومتواضع ..مش الله أكبر لابسة عشر طبقات وأستيك ومن تحت لابسة الأستيك بس..

بس يا ستي.. الموضوع بسيييييييييييييييييط جداً.. بس عارفة انه صعب وان عليكي تجاري اللي حواليكي من مظاهر وتنافس .. يبقى الموضوع عايز جهاد نفس ضد النفس وضد شياطين الإنس والجن.. فادعي ربا يعلي همتك ويرشدك لرضاه.. وبكدة تكسبي رضاه- سبحانه وتعالى ورضا الناس..
وعلى فكرة محدش هينتقص من قدرك ولا من مقامك لو لبستي حجاب متواضع وجميل بالعكس.. ده من الصفات الجميلة للمسلم التواضع
ولو حبكتي معاكي بروبروء وترتر والماظات وتوك.. خليها في البيت.. مع صحباتك.. مع زوجك كدة يعني.. اتصرفي.. احنا مش محرومين ظهور.. بالعكس ابسولوتلي.. بس كله في أوانه ومكانه..

وربنا يهدينا ويهديكم.. وعجلوا بالقرار ده وبلاش نظام الرشوة بتاع الحي عشان يمشوا الموضوع.. مش هتنفع يوم السؤال.. وكله مسؤوووووووووووووول

بحبك وقادرة على بعدك

ايوة هي بنيلها وشمسها
بهواها اللي مليان بدخان قش رزها
بناسها اللي مبقتش طايقة نفسها
أيوة زعلانة منها .. وصعبان عليا أهلها
بحبها .. لكني قادرة على بعدها

هي مصر.. زعلانة منها أوي
بس ثواني..
بس هي مين مصر؟.. عشان على حسب هي مين هيكون الرد
لو مصر الحكومة.. يبقى في ستيييييييييييييين سلامة (والمعنى يظل في كرش الشاعر)
ولو هي الناس.. فبجد زعلااااااااااااانة منها وصعبانة عليا وفي نفس الوقت بقولها أحسن.. انتي اللي جبتيه لنفسك
ولو هي النيل والهرم والحضارة والعراقة والأصالة .. الخ .. الخ، يبقى أقولها ملكيش لازمة من غير ناس تحافظ عليكي وتحميكي.

بقالي كتيييييييييييير مش عايزة أتكلم ولا أعلق على حاجة من اللي بتحصل في مصر.. عشان أنا مش أد كلامي.. ولا في ايدي حاجة اعملها فهانضنضموا لطبقة الحنجوريين.. وخصوصا لما بقيت بعيد..
حاسة ان اللي يتكلم لازم يكون بيعمل .. مش كلام وخلاص..
لكن ساعات مش بيكون قدامنا غير الكلام فضفضة.. بس براءة من المسؤولية..
وانا الصراحة خلااااااااااااااااااااص مبقتش قادرة اسكت.. انفس طيب ولو بكلمتين..
بس بعدين بقى.. مش قلت لكم مش أد كلامي ولا هاين عليا أتكلم :(

اطبع وانشر ولك الأجر والثواب إن شاء الله

للطباعة هنااااااااااااااااااااااا

طفينا أول شمعة.. ضوينا تاني شمعة

السلااااااااااااااااااام عليكم..
أييييييييييييون.. عدت سنة بمرها ومرها

أوام كدة دا انا لسة مولودة امبارح.. لحقت ؟!!
سبحان الله
كانت كل لحظة في حياتي جديدة عليا معدتش قبل كدة .. من دلوقت أو بمعنى أصح من أول امبارح كله بقى قديم ومكرر .. بس على ميييييييييييين؟.. أنا بقى هخليه جديد بحركاتاتي وسكناتي وهمساتي ولمساتي وعياطاتي وصرخاتي

طبعا أنا مولودة الأربع والسنة دي جه الخميس.. يوم أجازة بابا .. هييييييييييييه..
وكانت فرصة كويسة عشان نعرف نحتفل بيه براحتنا ميبقاش وراه حاجة..
هتسألوا احتفلنا إزاي..
أقولكم أنا بقى..

زي ما قلت لكم انه كان اجازة بابا..
فصحينا الصبح ونزلت انا وبابا بس جبنا فطار جمييييييييييل.. وعمو الفران شحتني واحدة عجوية كالعادة :))
ماما بقى مش عايزة اقولكم كانت بتستعد ازاي..واااااااااااو..
رجلها اتلحوت تاني وجالها التهاب في الأعصاب لتاني اسبوع على التوالي وكمان بقى المرة دي ايديها قالت ميصحش رجلها تبقى لوحدها فجالها التهاب في ايديها كمان .. غلبانة الست دي.. عجزت بدري..
بفكر اخلي بابا يغيرهالي :P

المهم مطولش عليكم..
قضينا النهار زي الفل..
وبالليل بقى حان موعد الاحتفال..
ماما لبستني الطقم الجديد.. ورحنا ..
..
..
..
..
..
للدكتورة.. هاهاهاهاها..
عشان اخد تطعيم السنة..
أخدوني على خوانة..
عاااااااااااااا
بقى هو احتفالكم بيا يا خونة؟!!!
الله يسامحكم..

كالعادة شفت وش الدكتورة فتحت السارينة من قبل حتى ما اعرف انا هناك بعمل ايه..
والست يا عيني بقت تخاف مني.. وكانت عايزة تنادي قوات الأمن عشان تحوش..
واحتفالا بيا ما بدل ما تديني حقنة واحدة زي كل مرة ادتني 3 وكمان نقط في بقي.

وبس

أيوة وبس خلص اليوم كدة..
كان لازم نروح على البيت عشان أخد دوا السخونية وماما تعمل لي المساج مكان الحقن..
كان يوم جميل الصراحة.. بس للحق تيتة كانت بعتت لي كام اغنية كدة عشان تهنيني.. فماما شغلتهم ليا.. يعني عشان مزعلش..

ووعدتني لما اكبر شوية وافهم وميكونش فيه حقنة واكون عملت حاجة مفيدة في حياتي تبقى تعمل لي حفلة حلوة بهاااذي المناسبت العظيمت اللي هي شخصيا مش فاهمة انا دوري فيها كان ايه غير اني شقلبت لها حياتها هي وبابا :))
اهو دور برضه احسن من مفيش..وطبعا ابقوا قابلوني لو اتجمعت الظروف دي كلها قبل مثلا تلاتين اربعين خمسين سنة كدة.. يكون الواحد لحق يعمل حاجة مفيدة

وفي النهاية احب أقول لنفسي
حابي زرزر توتو.. حابي زرزر توتو.. حابي زرزر توتو يا تاوتاو حابي زرزر توتوووووووووو

براءة وسواسة في نفس ذات الوقت

تاوتاو: ماما.. هو بابا راح فين؟؟
ماما: خرج مع أصحابه يا توتا..
تاوتاو: ليه يا ماما؟؟

ماما: عشان النهاردة الأربع يا حبيبتي وده يوم اللقاء العزابي.. اللي بيحاولوا يمثلوا فيه انهم عزاب بقى ومش متجوزين ومش عندهم عيال حلوين وشطورين زيك يا تاوتاو :))
تاوتاو: طيب يا ماما حضرتك (أيوة أنا بنتي هتبقى مؤدبة وبتقول حضرتك) مش بتزعلي لما يسيبنا ويخرج لوحده كدة في آخر الأسبوع؟؟
ماما: لا يا توتا.. عشان بابا بيشتغل طول الأسبوع والمفروض يرفه عن نفسه شوية ويخلع منك ومن غلاستك ورخامتك شوية..عشان يقدر يرجع الأسبوع اللي بعده يشتغل حلو ومن غير ما يكون زهقان.. وتبقي يا ستي اديله الجرعة بتاعته مكثفة بقى خميس وجمعة مش مهم :P
تاوتاو: خلاص اتفقنا :)..

بعد شوية..

تاوتاو: ماماااااااااا..
ماما: نعم يا تاوتاو..
تاوتاو: طيب بابا لما بيقابل أصحابه بيعملوا ايه؟؟
ماما: مفيش يا قلبي.. بيقعدوا على القهوة..
تاوتاو (مقاطعة): بيقعدوا على القهوة ولا على الشاي؟!! هههههههه
ماما: خفيفة أوي يا مضروبة زي ناس :P
تاوتاو: لا بجد يا ماما.. بيقعدوا على القهوة بيعملوا ايه يعني؟؟
ماما: أهو بيتكلموا في أحوال الدنيا والشغل والجواز والعيال والألعاب.. ويقعد عمو أحمد طاهر يذلهم شوية وهو بيصورهم بالكاميرا اللي بيكون لها كرسي مخصوص في القعدة.. :)
تاوتاو: بس كدة؟؟
ماما: ايوة.. عايزاهم يقعدوا يعملوا ايه يعني؟؟
تاوتاو: مفيش بس فاكرة يا ماما لما تيتة كانت بتحكي لك ان جدو هو وأصحابه برضه كانوا بيتجمعوا كل يوم أربع؟؟
ماما: اه يا تاوتاو فاكرة.. ايييييييييييه.. كانت أيام..
تاوتاو: بس هي قالت انهم كانوا كمان بيتجمعوا يوم الخميس..
ماما: اه يا تاوتاو بس يوم الخميس كان تجمع تاني بيعملوا حاجة تانية ..
تاوتاو: ايه بقى؟؟
ماما كان كل يوم خميس.. نفس الشلة بنفس البنطلون بنفس القميص بنفس الجلابية يتجمعوا في بيت واحد فيهم عشان يقروا قرآن..
تاوتاو: كل يوم أسبوع؟؟
ماما: ايوة يا بنتي .. ماهو زي ما بيتجعموا عشان يتسلوا كان لازم يعملوا قاعدة يذكروا الله فيها.. وبرضه كان بعد ما يخلصوا تقلب دردشة كالعادة :))
تاوتاو: طب بابا ليه ميعملش كدة هو وأصحابه؟؟
ماما: معرفش يا تاوتاو والله.. كان نفسي يعملوا كدة حتى ربنا يبارك لهم في صحبتهم وغربتهم.. هو في أحسن من الناس تجتمع على ذكر الله!!
تاوتاو: طب يا ماما ما تخليكي جدعة وتقولي لبابا يقول لأصحابه ويجيوا كل يوم خميس أو أي يوم يعني.. وتعملي لهم حاجات حلوة ويقعدوا يقروا قرآن.. واهو بالمرة ..
ماما: بالمرة ايه يا تاوتاو؟؟
تاوتاو: مفيش أنا كنت بقول بالمرة يجيبوا لالا وبودي ولي لي ألعب معاهم.. يعني..
ماما: اااااااااااااااااه.. يبقى الحكاية حكاية لالا وبودي ولي لي.. مش حكاية ان بابا يجمع أصحابه في مقرأة..
تاوتاو: مش الفكرة بس يبقى ضربنا عصفورين بحجر لحد بس ما نكبر إن شاء الله وهتلاقينا ندخل معاهم في المقرأة على طوووووووووول..
ماما: أعتبر ده وعد يا تاوتاو؟؟
تاوتاو: أكيد يا ماما.. يعني تخيلي واحدة اتربت في بيت بتلاقي فيه ناس بتقعد تقرا قرآن وعمال له ورد ولو كل أسبوع هتطلع تعمل ايه؟؟.. رقاصة لا سمح الله!!!.. أكيد لأ يعني..
ماما: خلاص يا تواتيوو.. هقول لبابا ويشوف أصحابه وإذا كان عليا يا ستي أعمل لهم أنا قهوة في البيت كل أسبوع ومن غير ما يدفعوا كمان..

تاوتاو: ايوة يا ماما بس دي طبعا تكون غير خروجة العزاب.. معلش خليهم يتوهموا شوية انهم عزاب وشباب وكدة..
ماما: خلاص يا ستي تبقى غير خروجة العزاب.. بس توعديني يا تاوتاو.. انك تعوضي بابا عن رخامة الأربع خميس وجمعة .. ماشي يا حبيبتي؟؟
تاوتاو: من عونيا الاتنين.. هو أنا عندي أكتر منها .. )) نيهاهاهاهاااااااااا

تسعة جوة وتسعة برة.. دروس ومواقف.. علكم تستفيدوا

السلام عليكم ورحمة الله وبركاته..

أي نعم.. تسعة جوة وتسعة برة.. ده كل تاريخي في هذه الدنيا
بس خلاصة التجربة حسب ما ماما شايفة أنها مرييييييييييييييييييييرة .. سواء جوة سواء برة..
بالنسبة لبابا مش عارفة- كل اللي اعرفه انه بيلعب معايا 5 دقايق وألاقيه بينادي على ماما .. تفتكروا ده معناه ايه؟!!
اوعوا يغركم الصور واللحظات الحلوة اللي بتلقطها.. هي بمعنى الكلمة لحظات بتمر في يوم طويل عرييييييييض مدته 24 ساعة. لحظات صفا وضحك ولعب بتطلع من بين ساعات وساعات من الزن العياط والنكد.. ليه بقى؟!!
عشان ماما في خلال التجربة دي ارتكبت كمية من الأخطاء وصلتها للحالة دي وللنتيجة دي .. مع ان زي ما انتو شايفين اني نيييييييسمة :$

حسب كلام ماما أنا طلعت منها أوحش ما فيها من أخلاق وألفاظ ودعاء وأمراض- كفاكم الله الشر-
ماما كانت داخلة التجربة الزوجية بشوية فسافيس في وشها طلعت منها - ما شاء الله ما شاء الله .. باكزيما في جلدها- عصبية في قاولونها- قرعة في شعرها (من كتر شدي فيه)- حساسية في صدرها (كنت وبلا فخر سبب في ان يجيلها حساسية ربو وانا لسة عندي 5 شهور في بطنها) وبقت يا عيني متمشيش إلا بالبخاخ- غير شوية التهابات في اعصاب ايدها ورجلها.. وحاجات تيتة -مامتها- بدأت تجيلها لما عدت 45 سنة
وابقوا سامحوها ياللي عايزين خلف- أنا مكنش عايزة أقول لتقولوا عليا فتانة ولا حاجة- بس هي كل شوية كانت تقول.. بتقووووول.. جاتها نيلة اللي عايزة خلف.. وساعات جاتها ستين نيلة..
معلش سامحوها.. وامسحوها فيا أنا

نبدأ من أول ما كنت نطفة.. ودي طبعا حاجة محدش له دخل فيها.. سواء تعب ماما وارهاقها ورقدتها في أول الحمل.. او تقلها وظهور أمراض مكنتش ع البال ولا الخاطر.. وأنا مالي أنا ؟!! هو
أنا كنت عملت حاجة..
لا علينا..
نيجي بقى من أول الولادة..
برضه ماليش دعوة.. نيهاهاهاها.. هي تعبت .. طب وأنا مالي؟!!
أنا كل اللي كنت عايزاه اني أكل وأغير وأنام..
غلطش أنا؟
نبدأ بقى الشغل اللي بجد قولوا كدة من أول أسبوع مثلا!!
ماما كانت عاملة فيها بقى بتاعت التربية الحديثة والصحية وبلا بلا بلا..
وأخدت على نفسها عهد انها مترضعنيش غير طبيعي..
ومتعودنيش على سكاتة ولا بيبرونا ولا أي حاجة من الحاجات اللي بتنقل الأمراض دي..
قال ايه كدة هتحميني.. والله هو الحافظ
طبعا زي ما انتو ممكن تتوقعوا دي كانت غلطة عمرها.. وبقت بتضرب نفسها لا مؤاخذة (بالنعناعة) عشان طبقت حاجة مؤذية زي كدة وصاحب الشورة المهببة دي أخد منها دعا.. يجعله من حظه ومن نصيبه قادر يا كريم

اكتشفت ان في أشكال مينفعش معاها غير الإهمال والطناش.. وأنا من هؤلاء الأشكال :)
اللي حصل اني بقيت ارفض اخد اي نوع من انواع المرضيات والسكاتات غير الطبيعي منها (فاهمين طبعا) غير طبعا اني مبقتش اشرب أي سولئل بما فيهم المية غير نقط زي العصافير كدة.. ده غير ان أكلي بقى قليل جداااااا.. واكل ليه لما انا عندي بقرة 24 ساعة تحت الطلب..

مش هتكلم بقى على تاثير ده على ماما.. ربنا يكون في عونها وحسبها الله ونعم الوكيل
تطور الوضع وبدأت ماما تنيمني لوحدي من وانا 5 شهور تقريبا- طبعا ضحكت عليها ولا نمت لوحدي ولا حاجة ليه بقى؟؟
عشان كنت لازم أنام وأنا برضع يعني بنام وهي جنبي.. صحيح هي بتقوم وتسيبني بس على ميييييييييييين.. لازم كل شوية اقومها واخليها تجي لي بالليل.. اومال يعني انام كدة لوحدي.. بس برضه ارضع وانام وتسيبني واناديها.. وكدة بقى طول الليل لغاية الصبح..
أنا مبسوطة 24 قيراط وهي تصحى الصبح مضروبة -لامؤاخذة برضه- ب60 نعناعة..

الغلطة فين هنا؟!
انها مطنشتش برضه.. وانها محبتش تضايق بابا بزني كام يوم.. لغاية ما اتعود..
حصلت كمان غلطة جرت وراها واحدة كمان لما انا تميت 6 شهور وشوية لما بدأت ازحف..
انا اتعودت قبل ما انام لوحدي اني انام مع بابا وماما على سرير كبيييييييير.. فاخدت على الرحرحة.. ومكنش ساعتها ممكن نجيب سرير ليا عشان المساحة وكدة..
ربنا فتحها على بابا ونقلنا شقة اوسع وبقى ليا اوضة كاملة لوحدي.. فماما عملت لي سرير من الكنب لغاية ما يجيبولي واحد جديد.. في المرحلة دي اهلي لاحظوا اني بحب البراح لما لاقوني بتشقلب على الكنبة وصولا إلى الأرض في أكثر من حادثة..
فقالوا لااااااااااااا...
لا ممكن بنتنا تنام في سرير محوط وتبقى مخنوقة ومحبوسة كدة.. احنا نجيب لها مرتبة كبيرة على الأرض تبقى براحتها وتتشقلب دون حدوث أي اصابات..
وربنا فرجها بمرتبة زي الفل سبحان الله من حيث لا ندري ولا نحتسب.. المهم
كانت الغلطة الكبرى وانا استغلتها أسوأ استغلال.. خلاص بقى مبقاش في حدود لنزهاتي وحركاتي وتشقلباتي في البيت.. بقى مني للحمام.. للمطبخ.. لأوضة ماما.. لأي حتة في البيت..
صحيح ماما عارفة ان ده بينمي قدراتي الاستكشافية.. بس ده عمل عبء كبير عليها وعلى أعصابها لما تلف ورايا وتلمني من كل حتة في الشقة..
ده غير ان موضوع انها تعودني انام لوحدي تماما راح أدراج الرياح.. اصل يعني خليكوا مكانها أو مكاني براحتكم يعني..
ازاي تسيب طفلة بريئة زيي تنام لوحدها على مرتبة على الأرض في أوضة مختلفة مع العلم انها بتزحف وتتوغل وتستمر- وتمشي تروح اوضتها؟؟ طبعاً مفيش ثواني تسيبني تلاقيني في ديلها من غير عياط ولا دياولو..


لكن لو كانوا عملوا زي الناس وحوطوني وقيدوني وحبسوني كنت زي لا مؤاخذة البوبي هنام لوحدي ومش هعرف اروح حتة .. كانت هتسيبني وهي مطمنة..


طب نراجع مع بعض الأخطاء وإزاي تتفادوها انتوا بقى عشان أنا خلاص فلت .. نياهاهاهااااااااااااااا
* عودوا ولادكم على السكاتات والبيبرونات حتى لو في أضيق الحدود.. هتريح المهماهات جداَ
* عودوا ولادكم على النوم لوحدهم تماماً من أول الرابع كدة وأكدوا عليه في السادس وميهمكيش من جوزك ينزعج شوية مش مشكلة.. ابقي هخليه يشوف له عروسة مؤقتا لحد ما المرحلة دي تخلص بالسلامة
* اشتروا لعيالكم سرير محوط بخشب وجنازير وأسلاك شائكة عشان يتعود على النوم لوحده بذمة ومتكونوش قلقانين ليقع ولا يتعور ولا يتوه في البيت
* بردوا أعصابكم عشان إحنا عيال جامدين أوي ولا هيهمنا لا زعيق ولا عياط ولا تهديد واللي عايزينه بنفذه
* علموا أولادكم حدود المكان والزمان.. بلاش السيبان ده.. احنا هنهزر هنا ولا إيه
*الباهبهات .. الله يكرمكم ساعدوا المهماهات.. متحسسوهاش ان دي غلطتها.. خلي موضوع العياط ده عادي.. مافيهاش حاجة يعني لو رحت الشغل نعسان كام يوم لغاية ما أمثالنا تتعود تنام زي البني ادمين.. وبلاش الحنية الزايدة وتروح تشيل وتتادي.. سيبونا نعيط شوية مافيهاش حاجة ده تلات ارباعه تمثيل متقلقوش..

كفاية كدة بقى عشان الست دي أمي هيجيلها استبحس لو فضفضت أكتر من كدة.. واتصلوا بيا لو حبيتوا اي استشارة.. وأنا هابقى أنزل درس مخصوص لأولادكم بعنوان كيف تصل بوالديك إلى الجنة لو هم اتجدعونوا وصبروا ..هع هع هع هع

وغيرنا العنوان

السلام عليكم ورحمة الله وبركاته..
بقالنا كتييييييييير مشفناش بعض..
مسلمناش على بعض..
ماما بتقول ان دي كانت اغنية سئيلة من بتوع البيت بيتك..
لا علينا..
مش احنا غيرنا العنوان..
اه.. عزلنا في بيت جديد.. عشان كدة مكنتش بكتب الأيام اللي فاتت دي..
كنت بعزل مع ماما او بالمعنى الأصح.. بعذب ماما :$$
وأول يوم أبات في البيت ده كان يوم الجمعة 31-7-2009م كان يوم 8 شعبان 1430هـ..
المهم عزلنا وبقى ليا اوضة لوحدي (هييييييييييه).. بس لسة بخاف انام لوحدي :( وكل شوية اعيط وماما تيجي تقعد جنبي لغاية ما اروح تاني في النوم..

اسيبكم بقى عشان لسة في توضيب كتيييييييييير لسة مخلصش..
هابقى ان شاء الله أنزل لكم بتفاصيل رحلة طيبة المصطفى عليه الصلاة والسلام ..

سلاااااااام

بسم الله.. هم النم يا روحي

السلااااااااااااام عليكم ورحمة الله وبركاته..

عارفة اني اتأخرت وكان المفروض اجي بعد الحقنة..
بس دلو ماطلعوش واحدة طلعوا تلاتااااااااااااااا عااااااااااااااااااااااا..
بس الحمدلله عدوا على خير.. شوية دوا سخونية على شوية فيكس للدهان على اثار العدوان.. وكله بقى بحمد الله تمام..
طبعا كالعادة كانت ليلة ليلاء.. ليلة السبت 4/7/2009م- 11 رجب 1430هـ مع الدكتورة هدى ..في مركز الملز الطبي الحديث جنب حديقة الحيوان عشان التاكسي يبقى عارف بس هههههههههه

المهم انا جاية عشان اقولكم اني أكلت .. هيييييييييييه..

اه والله أكلت رز اطفال من بتاع ميلوبا ده..
يوم التلات اللي بعد الحقن ده 7/7/2009م- 14رجب 1430هـ
كنا الساعة 12 ونص الظهر.. عند جارتنا خالتو رولا السورية..
وقعدنا أنا على الكنبة وماما على الأرض وخالتو رولا قدامنا.. عشان هي اللي صورتني وانا باكل..

كان اكل لذيذ .. معمول بلبن بيتي بقى هههههههه..
طبعاً لغمطة وبهدلة أخر تمام.. بهدلت نفسي وماما والكنبة .. بس بعد كدة بقيت حلوة وماما خدت بالها مبقتش ببهدل غير نفسي بس :D

في الخطة الخمسية الجاية بيقولوا الخضار هينزل القائمة .. أما نشوف طعمه ايه ده كمان..
بس الحمدلله نعمة

لغمط لغاميط.. :D

عدناااااااااا

السلام عليكم ورحمة الله وبركاته..

كنت عيانة وماما عيانة وبابا عيانة..احم.. قصدي عيان..
قضينا كام يوم حلوين.. بابا خف بسرعة الحمدلله وانا وماما فضلنا شوية.. بس الحمدلله دلوقت بقيت أحسن..

مش عارفة ينفع احكي ولا لأ .. بس لازم عشان الذكريات تبقى كاملة شاملة..

أنا قعدت 4 ايام تعبانة من غير ..لا مؤاخذة حمام..
لغاية ما ماما وبابا ودوني للدكتورة بتاعتي.. اسمها هدى بالمناسبة..
والست دي خلت ماما تديني لبوس.. اعااااااااااااااااااااااا..
وفضلت اعيط ساعة لغاية ما ربنا سهلها لي..
بس سبحان الله إحساس تاني خالص ..
بقيت عاملة زي الناس الكبار أول ما ربنا سهلها نفخت براحة.. ماما وبابا كانوا هيموتوا من القلق عليا وخصوصا اني كنت كويسة الفترة اللي قبلها كلها وجيت على اليوم الرابع بقى تعبت اوي..

وزاد الطينة بلة ان ماما كمان كانت تعبانة ومكنتش بتاكل كويس فده اثر أكتر عليا ومكنتش بعرف ارضع كويس.. وهي كمان مكنتش عارفة ترضعني عشان بتتألم أوي وراحت للدكتورة واخدت دوا كتير ..
بس الحمدلله كله عدى على خير.. ولغاية إمبارح بس تعبت تاني وماما (الوحسة دي) ادتني لبوسة تاني.. أعاااااااااااااا..
وبابا بقى هو اللي أخدني وقعد يحايل فيا لغاية بطلت عياط وربنا سهلها تاني..

بس تصدقوا الموضوع ده جه بفايدة تانية..

اتعلمت ازاي ارضع ببيبرونا (رضاعة) بس مش بالساهل كدة.. ماما كانت بتدهاني في الخباثة عشان اانا خلاص كنت اخدت على ماما وبس...
فكنا نبدأ عادي.. وأول ما ابتدي أروح في النوم تقوم ماما تديني الرضاعة..
كمان حاجة..
بقيت ممكن اخد السكاتة..

مش أنا قلت لكم اني غلسة.. فأنا برضه كنت بنام دايما وأنا برضع.. وماما تعبت أوي.. وبقت بتتألم.. فجابت السكاتة لأول مرة وعلى عينها عشان تحطهالي وانا نايمة لغاية بس ما هي تخف وإن شاء الله أبطلها ..
الكلام ده كان يوم الخميس اللي فات اللي هو كان 2/7/2009 -9رجب 1430هـ .. بس برضه لما اكون صاحية وتحطهالي برميها برة بقي.. ومش برضى أخدها.. احسن برضه.. بلا وجع بطن بقى :D


اه نسيت أقولكم أن ماما وبابا إمبارح (الجمعة 3/7/2009م- 10رجب 1430هـ) ركبولي المشاية بتاعتي هيييييييييييييييييه.. قعدت فيها ولعبت بالحاجات اللي متعلقة فيها والزراير اللي بتزمر وتطلع موسيقى.. حلوة أوي أوي أوي..
وفي حتة كدة المشاية جريت بيا بعيد عن ماما وبابا .. فأنا اتخضيت وقعدت اعااااااااااااااااا..
طلعت جبانة أوي أنا.. بكون عايزة العب وفي نفس الوقت خايفة أسيبايدي من على المشاية أحسن أقع وأغرق.. يرضيكم يعني؟!!!

ياللا سلام بقى عشان أروح استعد للحدث الأكبر ألا وهو الحوووووووووووووقنة الكبيرة.. ادعوليييييييي

ما يقع إلا .. (أكمل بما يناسبه)؟

السلام عليكم ورحمة الله وبركاته..

أعاااااااااااااااااااااااااااا..
أيوة ده رد الفعل الطبيعي لواحدة لسة واقعة من على السرير حااااااااااالا..

ماما سبتني وراحت تفتح الكومبيوتر يوم السبت (27/6/2009م- 4رجب 1430هـ) الصبح الساعة 8 وتلت وسمعت صوت اللي هبد..


كيس المناديل اللي كان جنبي..
عشان أنا وقعته الأول ووقعت عليه فماما مسمعتش صوتي أنا..

جات لقتني على واقعة على الأرض على وشي.. شالتني فوراااااااا وأنا أعااااااااااا شوية وسكت.. وقعدت بقى تختبر الحواس.. وأتأكدت اني الحمدلله سليمة..
بس اييييييييييه.. ركبها كانت بتخبط في بعضيها وكانت بتترعش وعلى وشك العياط.. بس لما لقتني الحمدلله بستجيب مسكت نفسها..

طب أعمل ايه يا ناس؟؟ واحدة وبتاخد راحتها على السرير شوية.. أقوم مالاقيش أرض تحتي وأدب على بوزي كدة؟؟:((


بس الحمدلله عدت على خير.. وماما هتحرم تسيبني كدة من غير سدود مخدات ولعب حواليا غير انها مش هتحطني غير في نص السرير ..

الحمدلله رب العالمين

يارب حلي بابا وقوي صحته

السلام عليكم ورحمة الله وبركاته..

النهاردة الخميس (25/6/2009م-2رجب 1430هـ) بابا حبيبي تم 28 سنة.. (صغنن والله)..ربنا يبارك لنا فيه ويخليه ويديه الصحة وطول العمر في طاعة الله يارب..
المهم طبعا عشان احنا في بلد رجالة فماما يا عيني مش عارفة تعمل ايه تجيب هدية ازاي من غير ما بابا يكون معاها..
المهم هي عملت ايييييييه؟؟
قالت لبابا تعالى نتغدى برة النهاردة.. وكمان عايزين نتغدى في جاد المصري.. حلو اوي..
ولذلك حكمة حكيمة..
ماما عارفة ان جاد جنبه بتاع حلويات مشهور اوي في الرياض اسمه القباني..

فقالت لو ظبطت اول ما ندخل المطعم هي تقوم تقول لبابا هروح الحمام وتجري على المحل تجيب تورتاية ونحتفل بقى (هيييييييييييه).. وسابتني أنا مع الغلبان بابا...

ومشيت الخطة مظبوط..
ماما لبستني الفستان الجديد..

ونزلنا روحنا وماما بدات تنفذ الخطة.. وراحت جابت تورتاية حلوة اوي.. وادتها للجرسون على اساس بعد الاكل يجيبها ونقول لبابا يوم ميلاد سعيد يا بابا يوم ميلاد سعيد..
وجاب الجرسون الأكل وأنا بقى كالعادة غلاسة وتلامة وززززززززززززن زي كل أكلة معاهم..
ماما حاولت تاكل وانا على رجلها وفي الاخر سكت وحطيتني يف الكرسي بتاعي.. وبدات تاكل بنفس..
وانا بقى بدأت عاااااااااااااااااااااااااااااااا
بابا اتنرفز مني وماما عصبت ومكسوفين عشان الازعاج اللي انا عملته للناس مع ان كان فيه زميل اخر في ستارة تانية كان بيرد عليا ههههههههههه..

المهم ماما قالت له خلاص انا هاخد الاكل في البيت وبابا بعد ما كان هيكمل اتضايق وقال للجرسون هات الشيك..
وجاب الراجل الشيك .. وماما شاورت للراجل عشان يجيب التورتاية..
وجابها الراجل..
وأنا أعااااااااااااااااااااااااااااا
بابا اتفاجئ وقال لماما عملتي كدة ازاي.. كان فرحان وفي نفس الوقت متضايق عشان أنا نكدت عليهم..
أخدنا التورتاية ورجعنا البيت من غير (يوم ميلاد سعيد يا بابا يوم ميلاد سعييييييييييد)..
بس شفتوا غلاستي
ورخامتي
عسل أوي أنا .. مش كدة.. ربنا يخليني ليهم يارب :P

ونمنا بدري بدري.. وصحينا بدري بدري.. وننام ونقوم ونقوم ونااااااااااام على زن × زن

السلام عليكم ورحمة الله وبركاته..
وادي يومية جديدة من يومياتي..

مع اني عمري ما سمعت الأغنية دي بتاعت جدو مدحت صالح قبل كدة.. لكن ما شاء الله عليا متأثرة بيها جداً
من يوم ولادتي وأنا الله أكبر الله أكبر.. بنام بدري وبصحى بدري لدرجة مستفزة جداً

يعني اقضي من الساعة 9 ولا عشرة (على حسب الحالة الصحية ساعتها يعني) عياط وزززززززززززن لغاية ما ماما تنهار وانا كمان بنهار.. وأنام بقى زي الأطفال الملائكة دول .. عارفينهم؟!!
وأصحى بقى زي الشاطرة على 3 ، 4، 5 الفجر .. ايه ما اكولش يعني ولا ايه؟؟
وأنام بعدها برضه زي نفس هم هم الأطفال اللي فاتوا دول..
وزي الشاطرة برضه اصحى الساعة 6ونص سبعة مع بابا عشان اصحيه برضه مايرضنيش يتأخر على الشغل بتاعه (طيبة أنا اوي مش كدة؟؟) .. مين بقى اللي بيشاركني نومي وصحوتي.. براااااااااااااافو .. ماما أقوم تقوم.. أنام تنام..

ماما اللي كانت مسجلة رقم عالمي في السهر وبابا غلب معاها عشان تنام بدري من ساعة ما عرفها لغاية ما أنا جيت.. بقت بتنام على 10 أو 11 أو 12 على مزاجي انا يعني..
ياما البابا الطيب كان بيتحايل عليها عشان تقوم بدري وهي ابداااااااااااااااا.. تقوم تعملي ايه..


أنا بقى النص متر بقيت بقومها زغبن عنها مش عشان حاجة الا انها تونسني بس فقط لا غير.. لا عايزة منها أكل ولا شرب بس تصحى جنبي كدة وتلاعبني وحسها عينها تفكر انها تديني ضهرها وتنام او حتى تقفل عنيها..

الحمدلله .. ربنا يقدرنا على فعل الخير..


وبنشكر ونمنا بدري بدري .. وصحينا بدري بدري .. ومن السعادة نزلنا نجري (بس للحق دي لسة معملنهاش .. يمكن قدام شوية وربنا يقدرني انزلهم بقى نعمل رياضة الصباح مع بعض في الهواء الطلق وفي نسمة الفجر العليلة.. هو حد طايل!!!!

فضايح فضاااااااااااااايح

السلام عليكم ورحمة الله وبركاته..

هابقى اكتب هنا شوية فضايح كدة كل ما افتكر يعني..

بصوا يا سادة هجيب من الاخر شوية..
*مرة يوم 1/6/2009 يوم ما خرموا لي ودني عاااااااااااااااااااا..
يومها الدكتور قعد يضحك عليا ويقولي هو انا لسة جيت جنبك يا بنتي؟؟!!:))
وبعدن بص لماما ولقاها بتعيط هي كمان..فقال لها طب هي بتخرم ودنها انتي بتعيطي ليه؟؟:))

وبابا خدني وقعد يحايل فيا عشان اسكت وانا ابداااااااا


*قبلها بقى كان يوم 4/5/2009 يوم الحقنة التانية.. وفضاااااااااااااااايح.. مع ان الحقنة اصلا واحدة مش خمس حقن زي ما ماما كانت فاكرة..

*الجديد بقى.. لسة يوم 21/6/2009 بقيت بتفتف.. ماما تقولي قولي بابا بدل التفتفة وأنا بففففففففففف.. واريل بقى .. ومش عارفة بقى هبطل امتى :))

* لسة من شوية (الثلاثاء 23/6/2009م- 30 جماد الآخر 1430هـ) قلبت من على بطني لضهري هييييييييييييييييييه.. بس برضه لا تسلم القلبة من شوية عاااااااااااااااااااااااااااا



لما افتكر بقى او تحصل حاجة جديدة هابقى احكي لكم..

خليها مفتوحة

حوووقناااااااااااااااااا

السلام عليكم ورحمة الله وبركاته...
ازيكم ؟؟ عاملين ايه؟؟
تمام.. طيب الحمدلله

النهاردة السبت 7-3-2009 .. 10 ربيع الأول 1430ه

ـ
قمنا الصبح بعد ليلة ليلاء..
وماما غيرت لي ولبستني الطقم الجديد.. وبابا اجل مرواحه للشغل.. وياللا بينا على المسشنفى مسقط رأسي..
قال ايه لازم أخد حقنة.. ليييييييييييييييه؟؟

المهم دخلنا على بركة الله أوضة أبيض × أبيض
وفيها ممرضات لابسين أبيض ×أزرق.. حلوات فليبينيات صغننات كدة..
المهم حطوني على السرير وانا اتحطيت من هنا قمت عااااااااااااااااا من هنا مع اني كنت نايمة كالعادة لما اخرج من اي حتة لحتة تانية ..
وقلعوني السالوبيت بتاعي وديببببببببببب حقنة في دراعي ..عااااااااااااااااا
ولسة مكملتش العااااااااااا هنا قامت واحدة تانية دبببببب في رجلي.. ااااااااااااااااه يا رجلي.. طب اصبري اخد نفسي طيب..
وانا اعااااااااااااااا من هنا وماما تعااااااااااااااايط..
بس للأمانة مش عارفة هي كانت بتعيط على عياطي ولا عشان كانت تعبانة ومش قادرة تمشي ولا تقعد.. ولولا انها متقدرش تسيبني اروح مع بابا لوحدي مكنتش جات معانا..

لا علينا.. دخلوني اوضة فاضية مع ماما عشان تصالحني.. وعشان انا زي كل العيال في السن ده بتاعت بطني.. الست اول ما ورتني الأمارة سكت بقى وانهمكت في الصلح.. الصلح خير طبعا..
وبعد كدة رحنا على اوضة تانية جمييلة اوي.. فيها صور لميكي وبطوط - الله يرحمهم بقى- والدكتور كان اردني عسل اوي.. اول ما شاف ماما قالها ايه مالك ماشية زي ما تكوني لسة والدانة ههههه (يا خفيف وعرفتها لوحدك دي)
وبرضه حطوني على السرير وانا اعااااااااااااااااااااااا.. مع انه كان عمال يلاعب فيا ويحايلني بس اييييييييييه .. ولا كأن..
عدى الميعاد على خير الحمدلله ..بس استنىىىىىىىىى..
ده بيقولهم لازم نعمل لها تحاليل الغدة الدرقية عشان الاطمئنان.. اوبااااااااااااااا
يعني حقن تاااااااااااني :((

انا طبعا مسافة السكة من العيادة لاوضة التحاليل كنت نمت تاني.. وماله.. هو انا ورايا حاجة؟؟

ودخلنا الاوضة وماما وبابا مستعدين للمعركة الكبرى..

بس الممررضة ام ازرق × ابيض في الأوضة الأبيض × أبيض.. عملت حركة مخلتنيش احس باي حاجة ولا حتى صحيت من النوم..
دخلت الابرة بتاعت حاجة كدة اسمها الكانيولا في ايدي..
وبدات تنقط الدم نقطة نقطة لمدة 5 دقايق او حاجة زي كدة وانا نايمة برضه..
اللـــــــــــــــــــــــــــــه..
ماما وبابا كان في غاية الاستغراب .. معقول كل ده وانا حتى ما اتضايقتش..
سبحان الله الهادي..

وعدت الزيارة على خير حال .. ورجعنا البيت تاني بالسلامة وبابا راح الشغل وماما استعدت عشان ترتاح..
بس على مييييييييييييين؟؟!!

أول خروجة في حياتي

السلام عليكم ورحمة الله وبركاته..

بعد ليلة طوييييييييييلة كل شوية أزن وماما يا عيني تقوم ترضعني..
مش أنا قلت لكم اني نمت ليلتها مع ماما في الأوضة.. ومنمتش مع العيال التانيين في الحضانة.. عشان كل
شوية كنت اعيط ويطلعوني ففي الآخر سابوني مع أمي .. وانتصرت .. هيييييييييييه

وجه تاني يوم.. الخميس 8/ ربيع الأول 1430.. 5/3/2009
وبابا جه .. بابا جه .. ياللا نصقف ونقول هيه..
والممرضة جت وأخدتني عشان تلبسني.. ولفتني زي صباع المحشي بالظبط

الرسم التوضيحي لصوباع المحشي

وبدأ بابا يعمل اجراءات الخروج..
وجات خالتو نورا أم الواد أنس الفليبينو (فاكرينه) بس هو مكنش جه لسة واصرت انها توصلنا للبيت..هي وعمو حسين..
المهم نزلنا حوالي الساعة 2 الظهر.. وكانت الدنيا حرررررررررر والشمس ضربت في وشي اول ما بدانا نمشي بالعربية.. بس ايه.. انا كنت في ملكوت تااااااااااااااني .. ايا نوم يا نوم يا نوم.. ولا الهوا..
والدنيا زحمة وانا ولا انا هنا.. ودي كانت اول خروجة ليا
ورحت بيتنا أول مرة ..
اللــــــــــــــــــــــــــه..
بابا كان مروق البيت ومجهز لنا نومة حلوة على سرير كنباتي (عشان كان سرير ماما مكسور)ههههه بس حرام.. هو تاني يوم على طول نزل جاب لنا سرير أحلى من اللي اتكسر..
ربنا يخليك ليا يا بابا يا حبيبي..

كان طاير من الفرحة بيا أنا وماما..
وقضيت أول يوم ما بين نوم وقيام وعياط وأكل..

حتى جيراننا كانوا أول مرة يسمعوا حس بقى في العمارة المهوية اللي احنا عايشين فيها..
خالتو رولا قالت لماما ن لما كنت أنا بعيط كان عمو فواز جوزها يقولها وطي التليفزيون عشان نسمع عياطها..
من يومي صوتي حياني.. :))
ماما بقى كانت عايشة مع الحلبة بالعسل الأسود اللي كانت تيتة ماجدة بتعملها لها في الدلة وتسيبها جنبها وكل شوية تشربها شوب كبيييييييييير.. عشان أرضع أنا بقى بمزاج

نسيت أقولكم ان ماما ولدت لوحدها محدش جه من مصر..
تيتة سومة مكنتش تقدر تيجي عشان متقدرش تسيب جدو حسين لوحده..

بس سبحان الله الكريم .. سخر لماما ناس من حيث لا تحتسب
تيتة ماجدة (دي جارة تيتة سومة في مصر بس هي بتشتغل في السعودية) .. وخالتو ريهام صاحبة ماما من ايام المدرسة وعايشة في السعودية برضه من زمان.. وخالتو نشوى جارتنا مكنتش ماما شافتها غير يمكن 3 اربع مرات قبل كدة.. بس ست جدعة أوي كل يوم كانت تصلع تطبخ لماما شربة وأكل وتوضب لها وتساعدها .. وخالتو نورا.. وخالتو انجي .. ربنا يكرمهم كلهم بجد.. ماما بتحبهم أوي اوي اوي في الله..

ماما كانت بتقول احساس مش معقول لما تكون رامي كل الحمول على الله وتلاقي ربنا مش مخيب ظنك.. سبحان الله وبحمده..


ياللا .. المرة الجاية ان شاء الله احكي لكم عن اول يوم أخرج فيه من البيت بقى وكانت خروجة .. ااااااااااااااااااااااااي..
في أمان الله

بسم الله الرحمن الرحيم

أنا مريم مريم مريومة..

وماما وبابا بيدلعوني تاوتاو الصغير عشان ماما هي تاوتاو الكبير (أنا هقول ماما وبابا مؤقتا عشان مش عارفة لسة هترسي على ايه ماما وبابا ولا أمي وأبي)

أنا اتولدت في 4 مارس 2009 الأربعاء الموافق 7 ربيع الأول 1430 هجري ..الساعة 10 إلا ربع الصبح بعد ما ماما تعبت يا دوب 4 ساعات ولا حاجة..
وأول ما نزلت عيطت وأخدوني لبابا هو أول واحد شافني وأذن لي في ودني وبعدين استحميت أول حمية على يد ممرضة فليبينية ..
اه نسيت أقولكم ..
أنا اتولدت في مستشفى الحمادي.. في الرياض .. يعني أحمل الإقامة السعودية
والدكتورة اللي ولدت ماما اسمها الدكتورة إكرام.. ربنا يمسيها بالخير بقى.. ما هي الست تعبت معانا برضه ولو انها كان على قلبها مراوح (هادية شوية يعني)

بعد كدة لفوني في لفة بيضة بقيت عاملة زي الشهداء بتوع فلسطين - هههههه- ماما كانت بتقول يارب يا مريوم تبقي من الشهداء عشان ندخل على قفاكي الجنة هههههههههه..

وخدوني لماما..
رحت وأول ما ماما شافتني وهي لسة في البنج وبتقول بسم الله الرحمن الرحيم .. ما شاء الله.. قامت قالت بصوت عالي.. اييييييييييييييه ده .. دي شبه باباها بالظااااااابط

وفعلا أنا كنت شبه بابا أوي ولغاية دلوقت شبه.. مش عارفة بقى الايام مخبية ايه .. ربنا يستر ههههههههههههه
بس يا سادة..
وطلعت بعد كدة على الأوضة .. وماما كانت مستنياني هي وبابا.. وكانت أول مرة بقى أدوق طعم الزاد.. بابا جاب التمر وماما حنكتني عشان السنة.. وبعدين عرفت طريقي لغدايا - سبحان الله الهادي.. لوحدي كدة من عند ربنا من غير ما حد يعلمني سبحان الله.. وأكلت ونمت.. وكل شوية بقى اكل وأنام وأقوم أعيط وأكل وأنام .

ماما ساعتها كانت تعبانة شوية.. بس في نفس الوقت مكنتش عايزة تسيبني..
وبابا يا عيني كان رايح جاي على الأوضة ويروح يجيب حاجات ويرجع.. وفضلنا كدة لغاية بالليل.. وجم ناس زارونا
تيتة ماجدة..
خالتو ريهام وعمو صادق ونور وفرح
خالتو نهلة وعمو أحمد سماط
عمو طارق وعمو أحمد ابراهيم وعمو أحمد طاهر (الفنان المشهور) أصحاب بابا..
وجابولي معاهم عرايس حلوة اوي

بس بقى خلص اليوم وأنا نمت مع ماما في الأوضة اهاهاهاه.. عشان كنت كل ما ينزلوني في الحضانة مع العيال التانيين كنت اقولهم عااااااااااااااااااااا.. انا عايزة اروح لماما بس بطريقتي بقى ههههههه
وجه تاني يوم..


احكي لكم عليه مرة تانية.. السلام عليكم