عض كارنيجي ولا تعض ديني

السلام عليكم يا أهل الهدى..

هو الناس زعلانة من بن كارنيجي ليه؟؟

انا شايفاه راجل متسق مع أفكاره ومبادئه.. يعني هيقول ربراري ويرجع يقولك التزام بشريعة (ايا كانت) مفتكرش يعني ان كان هيبقى له مصداقية لكلامه خصوصا في أوساط الربراريين أمثاله..

بس هو مشكلته انه عالج المشكلة غلط..

محدش يمسكني.. انا هعرفه غلطه بس..

هو انت يا عم الكارنيجي متعرفش ان عندنا في الاسلام لتفادي مشكلات الزواج عندنا طلاق والجديد خلع لو الراجل دماغه نعناعة ومش عايز يسيب؟؟

طيب يبقى احنا كدة كدة مش محتاجين للزواج المدني بتاعك ده..

وبعدين هو الجواز المدني ده مش اللي بيتوثق في الحكومة وكدة؟ طيب اومال اللي احنا بنعمله ده ايه؟؟

في الميسحية ما جمعه الرب لا يفرقه إنسان (مش كدة؟)

هم عندهم مشكلة في الطلاق.. وبيقولوا ان دي عقيدتهم.. اروح انا اقولهم ماتلتزموش؟ طب ده انا ما ارضهاش لنفسي

واللي ميت اوي ع الطلاق بيعمل البدع عشان يطلق لدرجة بتوصل انه يغير ملته جوه ديانته.. خلاص هو حر.. ويتحمل نتيجة اختياراته

ففكرة الزواج المدني دي جاية عشان مين؟؟

المسلمة اللي عايزة تتجوز واحد على غير ملتها؟.. طيب ما تتجوزه بعيد عننا

غالبا والله اعلم دي هتبقى من الناس اللي مش ملتزمة بدينها أساساً ولا عايزاه ولا بتفكر فيه.. وغالبا يعني برضه مش هيفرق معاهم جواز من طلاق.. بس انت عايز تأسس لهم قاعدة في المجتمع .. لصالح مين يا ولد كارنيجي؟.. هاه؟.. رد عليا يا وِلد

شوية شوية تيجي تقولي المثليين كمان ليهم حق الزواج والاعتراف بيهم (ما هو برضه كلام هيتسق مع فكرك الربراري) وتبقى هيصة.. اخص عليك وعلى اللي مشغلينك وسايبينك تلعب كدة في التشين.. ياللا يا بابا اخزي الشيطان وروح اغسل ايدك ورجلك واتوضا وصلي لك ركعتين او اقرالك ترنيمتين قبل ما تتخمد تنام .. ومتلعبش مع كارنيجي تاني.. أصل كارنيجي ده وحش وقليل الأدب.. وسمعت انه مات منتحر كمان ..

ولا أقولكم.. سيبوهم يعملوه ونغربل بقى حتى يميز الله الخبيث من الطيب.. عايزين نرش مية بقى ونفوق

ثبتنا يااااااااااا رب