بسم الله المعين
اليوم الثلاثاء 13 أغسطس
ثالث أيام عيد الأضحى المبارك 1440 هـ
بداية التحضير لمرحلة جديدة في حياتي بعد استقرار 11 سنة تقريبا
كنت بتحاشى اللحظة دي بقالي شهور من ساعة ما عرفت إن فيه احتمال
ولكن حانت لحظة الحقيقة
قلت بدل ما أكربس نفسي في آخر لحظة أبتدي بدري واحدة واحدة
منها آخد راحتي
ومنها أدرب نفسي على استخدام أقل الأشياء
ومنها أشغل نفسي عن التفكير في عواقب الخطوة دي
الخطوة اللي هتفصلني عن عمر عشته في أكتر مكان حبيته أكتر من بلدي حتى...
عن ناس حبيتها واخترتها بمحض إرادتي جمعتني بيهم أحلى أوقات.. الناس اللي فهمتني وعرفتني وخلاص مش محتاجة أقعد أشرح نفسي معاهم... ياااااااه لسة بعد السن ده هرجع أقابل ناس جديدة وأعرفهم ويعرفوني ونشرح ونحسس ونعتذر؟!! مفتكرش
عن شارعنا الجميل المليان حياة
عن منطقتنا
عن دارنا
عن وعن وعن وعن
بكلم نفسي إن الأصل الإنسان ميتعودش ويألف عشان ميتعلقش
بس غصب عن الواحد اتعلق والله المستعان
جه وقت التنفيذ بعد تنظير كتييييير عن هوان الدنيا وإنها مش دار قرار.. وعش في الدنيا كأنك عابر سبيل.
وبأدعي ربنا أكون أد الكلام اللي كنت بقوله ويهون عليا وعلى ولادي ويخلفنا خير ويهيألنا من أمرنا رشدا...
كدة كدة مش الدنيا دي هدفنا ولا غاية أملنا...
