هل عندك شك؟؟

سلام الله عليكم يا شباب

صلوا بينا ع النبي الغالي.. اللهم صلي وسلم على سيدنا محمد وعلى آله وصحبه والأنبياء جميعاً

..

هل عندك شك إن مصر دي دولة محورية وأساسية في المنطقة ومن غيرها وبيها حاجات كتير مكمن تتغير؟؟

هل عندك شك إن في مواجهة جاية جاية مع إسرائيل وإننا هنكون منتصرين بإذن الله؟؟ واللي هتكون بداية النهاية .. هو كدة التطور الطبيعي للأحداث هم ليهم علوين في الأرض وإحنا (الموحدين المؤمنين) لينا علوين والغلبة في الآخر.. وخلاص إسرائيل في علوها دلوقت.. والدائرة بتدور.. وهانت إن شاء الله

طيب خليك معايا لو سمحت

دلوقت الناس اللي عمالة تعيط وتتشحفت على الأمن والاستقرار والنماء والرفاهية والسلام- ويا عيني ع السلام- اللي كنا بتمرغ فيها في عهد مبارك.. مالكم يا حبايبي؟؟ اهدوا كدة وبلاش الفزع اللي انتو فيه ده

كوووووووول ده لو كان موجود أصلا وكنتو الحمدلله بفضل الدش والمولات والاغاني والراقصين ولاراقصات حاسين بيه.. فده كان وهم وخداع..

لا كنا عايشين في أمن ولا سلام..

أي أمن وسلام وإحنا بناخد قوتنا من ماما أمريكا مقابل الصمت الرهيييييييييب؟..

أي أمن وسلام وانت على حدودك عدو من ساعة ما التاريخ كتب وهو عدو للإنسانية كلها.. وواقف ومتربص لك ومستني لك على هفة.. صح مبارك كان صمام الامان لكن ليهم هما مش لينا إحنا.. عشان هو عارف وإحنا عارفين إن لو قامت قومة للشعب المصري هتكون هي القومة وياااااااااارب تكون هي دي..

أي أمن وسلام وانت الجيش بتاعك بقاله 30 سنة بيتكهن .. ولا تكنولوجيا ولا صيانة من جوة؟..

ده لو مصر ربنا كتب عليها دلوقت حرب مفيش قدامنا ولا جيشنا غير الأسلحة البيضاء وشوية فضلات أسلحة قديمة والعزيمة والإيمان.. وكفى بالله وكيلاً..

أي أمن وسلام وانت حضرتك شخصياً بتتكهن بقالك 30 سنة انت واخوك وجيرانك واللي خلفوك؟.. 40 % من بني وطنك تحت خط الفقر بيجي دورين تلاتة عشرة..

قولي تعرف كام واحد الفترة اللي فاتت مات او مرض بالسرطان -عفانا الله وإياكم-؟؟

أي أمن وسلام وانت وشباب بلدك كان بيتلعب بيكم وبعقولكم ليل نهار.. تعليم زبالة.. كورة وأغاني وهجص وهيافة وتفاهة؟؟

هااااااا نقول كمان ولا تجيب انت من عندك واللي شفته حواليك طول عمرك؟؟

نرجع لموضوعنا.. الشك..

شايف ايه مشترك بين اللي حصل واللي المفروض هيحصل؟؟

مصر دولة محورية.. لو قامت هتقوم هتغير كتير.. مين اللي متضرر من قومة مصر على رجلها..

اسم الله عليييييييييييييك.. جيران الغبرة مفيش غيرهم

يبقى ايه مصلحتهم بقى في اللي كنا فيه؟؟

كل المصلحة يا أخويا.. جيش تعبان.. شعب مريض مخوخ صحياً ونفسياً وسلوكياً وأخلاقياً

مين الجميل اللي كان مسؤل عن كول الإنجازات العزيييييييمة دي؟؟

هو اللي انت عمال تشحتف في نفسك عشانه وداير وانت بتنفنف آسفين يا ريس ..

آسفين على ايه؟؟

آسف انك مش هتكمل دورك في دولة الخنوع والذل للعدو؟؟

ولا آسف ان خلاص مبقاش لا عقل ولا صحة عشان حتى تدافع عن البلد دي يوم يجي عليها الدور - وهيجي هيجي- غصب عنك وعني هيجي..

ولا آسف إنك هتسيب حياة التفاهة والهيافة واللعب والخيابة وهندخل ع الشغل اللي بجد

ولا آسف على ايه بالظبط؟؟

الفرق إنك لو ملحقتش نفسك طورتها وساعدت بلدك تقوم من مكانها ويبقى عندها اقتصادها اللي تأكل بيه عيالها ..و تعالج بيه ناسها وتبني بيه جيشها.. يبقى عليها السلااااااام خلاص..

وساعتها حلني بقى لما تقوم لها قومة تاني.. وهتقوم لا محالة.. بس الفرق ساعتها إنك مش هتكون موجود.. وتبقى خسرت الفرصة اللي جاتلك..

افرض عملت وانهزمنا.. يبقى اخدت ثواب العمل

طب افرض عملت وانتصرت.. يبقى أخدت ثواب العمل وجائزة النصر بحمدالله..

طب افرض معملتش وانهزمنا.. يبقى انت شاركت في الهزيمة..

طب افرض معملتش وانتصرنا.. يبقى ملكش نصيب يا فالح

يبقى سواء النصر في جيلك أو في اللي بعد أو اللي بعد بعدك.. يبقى اسمك أديت اللي عليك..

ها يبقى مين اللي هيخسر أو هيكسب على طول الخط؟؟

بلاش تبقى أناني وعجول وتبقى عايز تشوف نتايج اللي انت عملته قدام عينيك وبسرعة.. عشان ممكن متجيش كدة..

بص لثواب الآخرة.. بص لولادك.. لو أنت موصلتش لنتيجة.. يمكن اللي هتعمله يكون تمهيد لولادك من بعدك..

وميجيش يوم يقولوا عليك زي ما احنا قلنا على أهلنا الله يسامحكم.. حتى لو كانوا خايفين علينا.. بس خوفهم علينا ده خلاهم سكتوا على اللي كان بيحصل كل ده لغاية ما طلعنا بقينا خايفين نبص للشمس.. بقينا خايفين من الجهاد.. خايفين من معركة جاية جاية .. بقينا خايفين ومش مستعدين ومعندناش استعداد حتى نستعد

يبقى المواجهة جاية جاية.. والنصر آت آت إن شاء الله..

انت بقى هيكون دورك إيه في النصر ده تلك هي المسألة.. ولا إنت ناوي تستنى المحطة التانية..

مافيهاش يا حبيبي.. الفرص مش بتيجي ميت مرة في العمر..

الواحد كان خايف يجي الحياة ويروح من غير ما يعمل حاجة غير إنه خذل وطنه وأمته من غير ما يعمل حاجة..

وانت تجي لك الفرصة لغاية عندك وتسيبها؟؟

دلوقت هسأل تاني.. هل عندك شك؟؟

لو اه يبقى ياللا يا بابا اتفضل خد دورك في اللي عايزين يهاجروا واكفينا شرك وشر أمثالك وروح احبط في حتة تانية ملكش لازمة وسطينا..

صباحيتك يا بهية

السلااااااااااااااااااااااااام عليكم ورحمة الله وبركاته

صباحيتك مش مباركة يا بهية..
لااااااااااااااااااااااااا
دي صباحية حرية
صباحية شهداء أحياء عند ربهم يرزقون
صباحية أمل وعمل
صباحية شباب زي الورد وقف لك وبان على أصله يا أصيلة
صباحيتك كل حاجة حلوة
ولولولولولولييييييييييييييييييييييييييييييييييييييييييييييييييي

منك لله.. منك لله.. يا عديم الشهداء

سلام عليكم ورحمة الله وبركاته..
هيشلني..
الراجل ده فعلا كان هيشلني..
صوت من بعيييييييييييييد: بس ما تقوليش راجل..
طيب.. بس أنا الدم نطر في دماغي وانا بسمع السخام اللي كان بيرجعه من بقه اللي فكه فيه مش عارف يتلم ع التاني.. وصوته مبحوح زي ما يكون كان في المظاهرات هو كمان.. له حق ماهو من تناحته ممكن يتظاهر ضد نفسه..
مش ممكن البرود والنطاعة دي..
وأول قصديته كانت كفر.. لن ولن وسوف..
ياااااااااااا طول أملك في الدنيا..
ده الواحد لسة معتبش التلاتين وكل حركة بيخطيها كاتب وصيته وحاسس انه مش هيكملها .. وانت لسة عندك أمل لسة تعمل وتسوي..إلهي ما توعى تتنفس حتى يا شيخ..

انت جنس جبلتك ايه؟؟
عايز ايه قبل ما ترحل؟؟
عايز تولعها؟؟ طب ان شاء الله فيك وفي اللي معاك..
عارفة انك تملكتك عقدة الحكم وشهوة السلطة.. وده مرض نفسي بس مش قادرة ادعي ان ربنا يشفيك..
في حد يسيب نفسه عبد للحكم والسلطة للدرجة دي؟؟
ده الغني بيدفع شهوة المال بالزكاة ولو مش مسلم بالأعمال الخيرية
وقيس على كدة ..
وانت خلاص يعني الست شهور اللي باقين هيحيوك ويعيدوا بعثك من جديد.. ياخي النه..

خلاص مبقاش فيه كلام تاني.. انت بانت لبتك.. عايزاها خرابة علينا قبل ما تمشي.. وكدة كدة المحروس مش هيورثها فخلاص بقى..

يا إما إنك بتعد العدة وبتطوق العزبة قبل ما تبعت لحبايبك وقرايبك الصهاينة ومن ولاهم يجيوا يمسكوا ويستلموا نضيف زي ما ادوك نضيف..
منك لله إنت واللي سبقك ما هو السبب في الوحلة دي هو معاهدة السخام اللي عملها.. منكم لله..
انت اعمى البصر والبصيرة؟؟

وبعدين طرشت كلمة طلعت كل اللي في قلبك رغم انك كنت عايز تعمل فيها سونة العاشق..
بتقولنا شهداؤكم وجرحاكم؟؟
ليك حق.. إنت أحقر وأنتن وأصغر من إن يكون ليك شهداء بإذن الله أحياء عند ربهم يرزقون..
مسمعكش يا حسنك انت تقول تاني وطني وشعبي واخواني واخواتي..
احنا ولا وطنك ولا شعبك ولا اخوانك ولا احفادك ولا حتى نعرفك من بعيد..

بعد كل العمر ده ولسة بتتعالى في كلامك؟.. انا عمري ما صدقتك يا عم انت ولا كلامك كان حتى بيقرب من تنتوفة من قلبي.. عارف ليه؟؟
عشان تعابير وشك اللي بتبين نوعية كلامك وعنجهيتك والكبر اللي ماليك..
اخص عليك وعلى مستشارينك واللي سايقينك واللي جارينك .. ربنا ينتقم منك وقت اذان الفجر دلوقت ويورينا فيك يوم قريب..
أنا أحسن الظن بربي أنه سوف يرينا فيك ومن والاك وأيدك ومشى في ركابك عجائب قدرته سبحانه..
وينتقم منك لكل دم كنت السبب فيه..
وكل فقر كنت وراه..
وكل واحد وواحدة روعت أمنهم ..
ربنا ينتقم منك يا فرعون.. مش هيسبك والله وعزته وجلاله مش هيسيبك

تأملات في أيام الثورة..

السلام عليكم ورحمة الله وبركاته
والله وباضت لك في القفص يا أوسة وبقى ليكي تأملات وامتى في أيام الثورة.. ياااااااااااه
الواحد كبر وبقاله أيام ثورة .. لولولولييييييييييي

دي مجموعة تأملات في الأيام اللي فاتت من أول يوم 25 لغاية النهاردة 4 فبراير 2011 كتبتها على الفيس .. هجمعها هنا الأول وبعدين نبقى نظبطها .. بس ده قبل ما الواحد ينسى.. احنا بقينا أرباب ثورات والسن له أحكامه برضه :D

اكتشفت إنه كان بقاله 30 سنة بيكهن الجيش لدرجة إن العرب والبدو بقى عندهم اسلحة أكتر واقوى منهم.. وإنه عمل حوالين كل منطقة سكنية منطقة عشوائية عشان وقت اللزوم يطلقهم أو من عشوائيتهم يتطلقوا لوحدهم.. أنا اتحكالي من زمااااااااااااان بس مكنتش فاكرة إنها عملية بالقذارة دي.. حد يجي يقولي ان حوالين منطقته مفيش عشوائية

تكملة لتأملات ما كان يفعله مبارك في 30سنة بجانب تكهين الجيش وتوزيع العشوائيات..إنه خلى كل واحد بقى في حاله تماما..كله نفسه وبيته ومن بعده الطوفان..لهى الناس في أكل العيش من صباح ربنا لغاية مغرب ربنا برضه.. اللي مش مصدق يبص على الشباب واللجان الشعبية اللي تحت بيته وهم واقفين مع بعض حوالين النار او عند المتاريس بيتسامروا ولا كأنهم في رحلة..ربنا يحميهم ويديم المحبة بينهم،وينتقم منك باللي عملته بين الناس من فرقة وأنانية ولامبالاة

بص يا عم من الآخر.. عم (فلان) عايش في الريف.. وواضح ان الريف اتغير..
اقولك انا على الوضع في المدينة سواء في المناطق الراقية او المناطق الشعبية اللي ليا ناس قرايبي فيها هنا او هنا..
الناس بتنزل من القبل المغرب وتقف تحت عماراتها ومداخل الشوارع وتفتش اللي طالع واللي داخل حتى عربيات الشرطة اللي نزلت امبارح.. ويفضلوا مرابطين لغاااااااااااااااااية الصبح ومنهم بيكمل .. حسب المنطقة..
بالنسبة للأكل.. لغاية دلوقت محصلش مجاعات .. وأصحاب الخير تحايلوا على المبتزين المتستغلين وراحوا بالعربيات النقل جابوا الخضار ولوازم الناس وباعوها للناس بنفس السعر اللي اشتروه بيها..احنا في بيتنا الجيران اتبادلوا العيش وأي حاجة تانية اللي بيطلب يلاقي..
فلغاية دلوقت مفيش مشاكل ان شاء الله..
الزبالة في الشوارع .. الشباب والرجالة هم اللي بينزلوا يلموها بنفسهم وبيصرفوها اما بحرقها بالليل عشان يتدفوا بيها وهم واقفين بيحرسوا اهلهم يا اما بيدوها حتة صحرا .. ده من خلال اللي انا شفته بعيني او كلام قرايبي في حتت تانية

تابع التأملات: عندنا في مدينة نصر.. وعند اهل ليا في حلوان وجسر السويس .. كانت المية والنور بيقطعوا على طول.. حتى لو في مدينة نصر اقل نسبيا من الاتنين التانيين.. سبحان الله من ساعة ما قامت الثورة مقطعتش ولا مرة.. حد لاحظ كدة ولا دي مجرد محاسن الحلو برضه؟؟ :D