تأملات في أيام الثورة..

السلام عليكم ورحمة الله وبركاته
والله وباضت لك في القفص يا أوسة وبقى ليكي تأملات وامتى في أيام الثورة.. ياااااااااااه
الواحد كبر وبقاله أيام ثورة .. لولولولييييييييييي

دي مجموعة تأملات في الأيام اللي فاتت من أول يوم 25 لغاية النهاردة 4 فبراير 2011 كتبتها على الفيس .. هجمعها هنا الأول وبعدين نبقى نظبطها .. بس ده قبل ما الواحد ينسى.. احنا بقينا أرباب ثورات والسن له أحكامه برضه :D

اكتشفت إنه كان بقاله 30 سنة بيكهن الجيش لدرجة إن العرب والبدو بقى عندهم اسلحة أكتر واقوى منهم.. وإنه عمل حوالين كل منطقة سكنية منطقة عشوائية عشان وقت اللزوم يطلقهم أو من عشوائيتهم يتطلقوا لوحدهم.. أنا اتحكالي من زمااااااااااااان بس مكنتش فاكرة إنها عملية بالقذارة دي.. حد يجي يقولي ان حوالين منطقته مفيش عشوائية

تكملة لتأملات ما كان يفعله مبارك في 30سنة بجانب تكهين الجيش وتوزيع العشوائيات..إنه خلى كل واحد بقى في حاله تماما..كله نفسه وبيته ومن بعده الطوفان..لهى الناس في أكل العيش من صباح ربنا لغاية مغرب ربنا برضه.. اللي مش مصدق يبص على الشباب واللجان الشعبية اللي تحت بيته وهم واقفين مع بعض حوالين النار او عند المتاريس بيتسامروا ولا كأنهم في رحلة..ربنا يحميهم ويديم المحبة بينهم،وينتقم منك باللي عملته بين الناس من فرقة وأنانية ولامبالاة

بص يا عم من الآخر.. عم (فلان) عايش في الريف.. وواضح ان الريف اتغير..
اقولك انا على الوضع في المدينة سواء في المناطق الراقية او المناطق الشعبية اللي ليا ناس قرايبي فيها هنا او هنا..
الناس بتنزل من القبل المغرب وتقف تحت عماراتها ومداخل الشوارع وتفتش اللي طالع واللي داخل حتى عربيات الشرطة اللي نزلت امبارح.. ويفضلوا مرابطين لغاااااااااااااااااية الصبح ومنهم بيكمل .. حسب المنطقة..
بالنسبة للأكل.. لغاية دلوقت محصلش مجاعات .. وأصحاب الخير تحايلوا على المبتزين المتستغلين وراحوا بالعربيات النقل جابوا الخضار ولوازم الناس وباعوها للناس بنفس السعر اللي اشتروه بيها..احنا في بيتنا الجيران اتبادلوا العيش وأي حاجة تانية اللي بيطلب يلاقي..
فلغاية دلوقت مفيش مشاكل ان شاء الله..
الزبالة في الشوارع .. الشباب والرجالة هم اللي بينزلوا يلموها بنفسهم وبيصرفوها اما بحرقها بالليل عشان يتدفوا بيها وهم واقفين بيحرسوا اهلهم يا اما بيدوها حتة صحرا .. ده من خلال اللي انا شفته بعيني او كلام قرايبي في حتت تانية

تابع التأملات: عندنا في مدينة نصر.. وعند اهل ليا في حلوان وجسر السويس .. كانت المية والنور بيقطعوا على طول.. حتى لو في مدينة نصر اقل نسبيا من الاتنين التانيين.. سبحان الله من ساعة ما قامت الثورة مقطعتش ولا مرة.. حد لاحظ كدة ولا دي مجرد محاسن الحلو برضه؟؟ :D