تأملات في جماعة الستات

(تحذير لصاحبات المرارات الضيقات.. البوست طويل.. طويل.. طويل.. طويل العمر ويزهزه عصره وينصره على من يعاديه هاي هيء)
وبما إني من هواة "الدن في المساجد"- على قولة أمي الله يصبحها بالخير- أو بالأحرى كنت :"( فقدرت بفضل الله الخروج بهذا التعداد لأخواتنا الستات الحلوات الجميلات المشاركات في صلوات الجماعات في المساجد والمصليات..
بس ملاحظة رفيعة كدة.. مش هتكلم عن الست غالية اللي بتروح المسجد وهي فيها من روائع الروائح من خيرات الله والمطبخ والعيال ولا هتكلم عن اللي بيروحوا بهدوم البيت من باديهات وجينزات وشانيلات وتلفح عليهم الاسدال قبل الصلاة ولا الستات اللي معاهم عيال عشان دول اتهرسوا في خمسميت بوست قبل كدة :))

* فمنهن الست الوتد..
ودي حبيبتي اللي بتقعد في حتة ووقت الصلاة تقف وتدددددددد ولا حد يقدر يتحتحها من مكانها حتى لو لقت نفسها على آخر الصلاة لوحدها.. ابتاااااااااااااااااااااااان نيفر ايفر اتحرك قيد أنملة.. يا حاجة يهديكي يرضيكي حازي يا به حازي.. أبداً.. طب فيه عيل هتسجدي عليه.. نيفر.. طب الشجرة هتقع عليكي.. ايفر.. ومش حكاية خشوع بقى لأن أثناء عملية دق الوتد تاتي من الحركات والتنبيهات الزغرات بالنظرات ما شاء الله..
أُخيتي.. أحبك في الله.. بس والله العظيم وانتي بتصلي يجوز تتحركي وتحازي ع اليمين ويجوز كمان لو حصل فجوة في الصف اللي قدامك تقدمي عشان تسدي الفرجة وتاخدي ثواب اكتمال صف المسلمين ولكِ الأجر والثواب كمان..

* وعندك الست العشرية..
ودي بقى عسل وحبوبة وبتلاقيها كدة عايزة تشيلك وتحطك على حجرها من كتر ما بتلزق فيكي وصباع رجلها الصغير يفضل يلاعب ويعاكس وينط ويفط على صباع رجلك الصغير.. ومفيش مانع من ضربات الكوع ولولا الملامة كانت "تأنججك" كمان عشان متهربيش من جنبها..
ليه يا اوختي.. يا حبيبتي كدة؟؟ طب أنا كمان بحبك وعايزة مصلحتنا ونفسي صلاتنا تتقبل زيك بالظبط بس مش كدة.. صدقيني هنقف صف وهنسد الفرج وكله هيبقى زي الفل من غير عمليات الكر والفر دي.. طب افرضي ان انا بغير.. يرضيكي اقضي صلاتي كلها وانا "بضرَّس"؟؟ ميرضيكيش صح؟!! بس أنا بحبك برضه :))

* ومعانا الست المستقلة في نفسيتها..
سيدة بسم الله ما شاء الله.. شخصية.. وقوة.. وتمرد وعناد وحاجة كدة الله أكبر يعني..:))
قطقوطة دي تدخل المسجد تلاقي كام صف كدة وكل صف فيه ما فيه من المصليات تقوم رايحة في أي حتة تفرش مصليتها وتحط زمزميتها في أي حتة مافيهاش بشر وحذاري ثم حذاري حد يجي جنبها.. ونظام والله لأنا سايبالكم الجامع وماشية
طب حد زعلك يا توتي؟؟ طب انتي جاية صلاة جماعة.. جمااااااااااااااااعة يعني ناس وبشر واقفين كدة صف واحد ما شاء الله كالبنيان المرصوص يشد بعضه بعضاَ ويعينوا بعض ع الطاعة ويأمنوا على دعاء بعض.. تعالي يا حبيبتي مع اخواتك وأنا اضمن لك محدش هيهوب ناحية علبة السندويتشات

* وفيه بقى أبلة نظيفة برعاية ديتول..
النظافة من الإيمان.. والله جميل يحب الجمال.. وأما بنعمة ربك فحدث.. ويا بني أدم خذوا زينتكم عند كل مسجد.. كل ده جميييييييييييل.. بس الله يكرمك من غير ما تحسسي أختك اللي واقفة جنبك إنها جربة أو كتلة متحركة من الجراثيم.. يعني حلو تجيبي الصلية النونو كونونو بتاع الوش دي بس.. ومفيش مانع تمسحي بالوايبس قبل ما تحطيها وبعد ما تحطيها وفي وسط الاكل وقبل النوم وكله.. بس معلش والله الدنيا مليانة بلاوي وخصوصاً لو واقفة في الحرم والله ما هتقدري تقضي على 99% من الجراثيم فروقي كدة معانا وخليكي حلوة وبالمعقول حافظي على شعور الاخرين مش مسحة قبل الصلاة وبعد الصلاة (طب قبل الصلاة ماشي.. بعد الصلاة ليه.. مين عمل لك ايه اثناء الصلاة عشان تمسحي بهيستيريا كدة؟!!) روستخ روستخ يا زكي يا روستخ

* وطبعاً لا يفوتنا ولا يطوفنا الست الفواحة..
عم الرايق اللي بيجي من هنا تلاقي المسجد حصله انتعاش زي اللي بيحصل للي غاسل سنانه بسيجنال بقوة النعناع المضاعفة.. وتلاقي ايشاربات الستات بتطير كدة من نسمات الروائح.. أهلاً بريحة الحبايب :))
بسبوسة في الشارع برة عمالين يلموا الجثث اللي كانت ماشية وراكي وشموا ريحة البرفان اللي طالعة للدور السابع.. ايه يا شيخة.. ايه ده يا شيخة.. ليه تعملي فينا كدة؟؟ اترضيه لزوجك؟؟ ينفع كدة؟؟ شبهتي مصلى الستات كله..
احنا الحمدلله ربنا مش طالب مننا أكتر من ستر نفسها بحاجة واسعة وحشمة ونضيفة هو يا ريحة "تبيخ" يا ريحة الخنفري؟؟ مينفعش نروح المسجد "سايلنت"؟؟
اذا كان بتشممي المصليين كلهم الحلاوة دي اومال جوزه في البيت بيشم ايه؟؟ (يا بختك ياعم)

* ونختم بست الحبايب يا حنانا ننتا..
ماما وماما ستو والكرسي الحائر الدائر معاهم في كل وقت وكل زمان ومكان صحرا إن كان أو بستان..
دول بقى حبايبي حبايبي حبايبي.. بجد والله وبركة كدة وفيهم همة أسأل الله إني أكون زيهم لما أوصل لسنهم..
بس دماغي وايدي بيتعوروا واوا لما أكون بسجد وألاقي فجأة خير اللهم اجعله خير رجل كرسي طراااااااااخ لبست فيها عشان حضرتك عايزة تحطيه عشان تلحقي مكان 5 سم × 5سم في الصف الأول أو التاني.. يا خالتو انتي جيتي متأخر ممكن تحطي الكرسي ورا.. وكمان تحطيه على جنب مش بين الصفوف ونلاقي الصف الأول دخل في التاني والعاشر طالع يشقر ع الثامن عشان أبعاد الكرسي وندخل في ديلمة طب نحازي مع رجلين الكرسي اللي قدام ولا اللي ورا؟؟! طب نسجد تحت الكرسي ولا على راس اللي جنبي عشان مخبطش؟؟
أحلى حل للكراسي ورا وعلى الأطراف عشان الناس تحازي عليه وبإذن الله مأجورة بالنية وعلى قدر المشقة وربنا يديكي الصحة والعافية

الخلاصة: نفسي احنا الستات نستشعر قيمة ومعنى صلاة الجماعة.. احنا بننزل نصلي جماعة عشان كلمة (جماعة) بنيان مرصوص يشد بعضه بعضاً.. نقف جنب بعض "ماسكين في بعض" بغض النظر عن مستوياتنا المختلفة..
قبل ما ننزل نصلي نعرف آداب صلاة الجماعة.. ومنها:
- التيمن: يعني نبدأ من اليمين.. محدش يسيب الصف ويقوم واقف في اخره عشان تحت المروحة أو في وش التكييف أو عايزة تقعد جنب الشباك .. وأحازي ع اليمين دايماً.. لقيت حد مشي أو الصف اتحرك يجوز في الحالة دي أتحرك طالما أنا لسة في اتجاه القبلة خطوة ولا اتنين لليمين وأنا في صلاتي من غير ما أسلم ولا أحرم أجرها.
- سد الفُرج: لقيت في الصف اللي قدامي مكان فضي لأي سبب من الأسباب من سكات وأنا جوة صلاتي أقدم خطوة وأقف عادي لا حرج ولا ينقض الصلاة..
- أحازي دايماً على اللي جنبي من غير ما اطلع على كتافها .. عشان احنا مأمورين بسد الفرج.. نستشعر معنى البنيان المرصوص في الوضع ده جداً كأن دي اختي وبنتحامى في بعض
- الاستقامة طبعاً وتحري القبلة اللي مش دايماً بتكون في اتجاه الحيطة.. بتيجي بالورب ساعات كتير والله وفيه علامات في السجاد والأرض.. مش كل شوية هفضل أحرك فيكي عايزين نصلي بقى..
- طبعاً زينة المرأة عند كل مسجد زي ما قلنا العادي.. الثوب اللي ترضى تقف بيه قدام ربنا في الصلاة وغير الصلاة نظيف- لا يصف ولا يشف- ولا يكون زينة في حد ذاته (مش بروبورء ولا حركات سوبر مان ولا درابيهات الستاير ولا شخاليل) وطبعاً لا يكون معطر.. الطبيعي يعني بتاع الواحدة وهي برة بيتها..

وأهم حاجة.. حبوا بعض يا ولاد وساعوا بعض.. والتمسوا لبعض الأعذار من غير تأفف ولا ضيق دي هي كلها خمس دقايق هنقف جنب بعض ويا عالم مين هيقابل مين تاني ولا مين اتقبل منه ومين متقبلش..
يعني وانتي بتأمني خدي في نيتك انك بتأمني ليكي وللي جنبك.. وادعي ربنا يستجيب لكي وللي جنبك.. يا سعدنا يا هنانا لو أمنا كلنا في مرة وبينا واحدة قلبها أبيض فلة وربنا استجاب لنا علشانها..

طولت عليكم .. معلش بقى الفراخ مع الأرق يعملوا أكتر من كدة..
تقبل الله منا ومنكم صالح الأعمال.. ورزقنا وإياكم الإخلاص في القول والعمل
وألف قلوبنا على حبه وحب من يحبه وحب كل عمل يقرب إلى حبه
آميييييييين