وحدوه-1

لا دي مش جنازة ولا أنا حانوتي..
هو ده غرض السلسلة بالظبط.. نوحد الله..
نوحد الله بالقول والعمل..
نوحده في قلوبنا ليظهر توحيده على جوارحنا..
نرجع تاني نحط الألفاظ والمعاني في مكانها الصحيح.. وميبقاش ذكر الله مرتبط بمواقف الحزن والموت.. ولا القرآن مرتبط بالجنازة.. ولا العقيدة مرتبطة بدرس الشيخ فلان في المسجد وشكراً على كدة..
وعشان نوحده لازم نتعرف عليه.. هنحاول مع بعض نقف على معاني التوحيد وتطبيقاتها في حياتنا.. في دراسة من كتب التوحيد مطعمة بالواقع الجميل اللي عايشنه..

فتح الله علينا وعليكم ورزقنا وإياكم الإخلاص.. وتقبل منا ومنكم.. وأعاننا على ذكره وشكره وحسن عبادته.

(1)

بسم الله الرحمن الرحيم..
وبه نستعين..
أشهد أن لا إله إلا الله.. وأن محمد عبده ورسوله..

زي ما انتو شايفين السلسلة اسمها وحدوه..
الكلمة دي اللي ارتبطت في وعينا الجمعي إن الحانوتي بيقولها وهو بيغسل أو وهو بيدفن..
أو حد قاعد في جنازة والناس قاعدة ساكتة يقوم مديها واحدة وحدووووووووووه..
وتلاقي الكل في نفس واحد لااااااااااااااااا إله إلا هوووووووووووووووو..

احنا بقى هنا هنوحدوه في الفرح قبل الحزن.. هنحاول نرجع للكلمة معناها الحقيقي بعد ما ضاع بالتريقة والأفلام والمسلسلات.. وهنشوف كلمات تاني بقينا بنستخدمها أو نفهمها غلط في حياتنا..

وعشان نبدأ صح.. لازم بداية نعرف يعني ايه توحيد.. يعني ايه نوحد ربنا مش مجرد كلمة لا إله إلا الله اللي بنرددها ورا المؤذن.. أو واحنا زعلانين وخلاص..
ولا بنعلمها للعيال الصغيرة في المدرسة كأول ركن من أركان الإسلام وشكرًا على كدة

نبدأ بسم الله
بداية التوحيد كلمة مشتقة من الفعل وحد: وهو جعل الشيء واحدًا..
ما يعنينا هنا هو التوحيد بمفهومه الشرعي وهو بكل بساطة شهادة أن لا إله إلا الله وأن محمدًا رسول الله..

طب هل يكفي الشهادة باللسان؟؟
طبعاً لأ.. لازم توحيد باللسان والقلب والعمل.. إزاي؟؟
نعرف أقسام التوحيد واللي منها نقدر نطلع بإيه المطلوب مننا تحديدًا عشان نحقق التوحيد في حياتنا..
والتوحيد بينقسم إلى ثلاثة أقسام:
توحيد ربوبية
توحيد ألوهية
توحيد أسماء وصفات

والتلاتة مطلوبين.. وبيكملوا بعض ولا استغناء لواحد عن التاني.. هي باكدج على بعضها مش هننقي..
ولو سقط منهم واحد وقعنا في الشرك والعياذ بالله.. ساعات واحنا حاسين وساعات واحنا مش حاسين.. أعاذنا الله وإياكم..

صدقوني هيبقى موقفنا وحش أوي لو عملنا زي ما عمل بني إسرائيل من قبل وربنا عاب عليهم لما قعدوا ينقوا في الكتاب.. ونطبق دي .. لأ منطبقش دي.. دي حلوة هاتوها.. ودي مش أوي خلوها.. فكان التحذير بخيبة في الحياة الدنيا وضنك ولسة يوم القيامة أشد العذاب.. ربنا يعافينا..

"أَفَتُؤمِنونَ بِبَعضِ الكِتابِ وَتَكفُر‌ونَ بِبَعضٍ ۚ فَما جَزاءُ مَن يَفعَلُ ذٰلِكَ مِنكُم إِلّا خِزيٌ فِي الحَياةِ الدُّنيا ۖ وَيَومَ القِيامَةِ يُرَ‌دّونَ إِلىٰ أَشَدِّ العَذابِ ۗ وَمَا اللَّـهُ بِغافِلٍ عَمّا تَعمَلونَ"
(سورة البقرة: 85)

طيب نقول وحدوووووووووووووه.. ونقول أول أقسام التوحيد وهو توحيد الربوبية عبارة عن ايه؟

ده اللي هنعرفه الحلقة الجاية :D