حدوه- 5

(5)

بسم الله الرحمن الرحيم..
وبه نستعين..
الحمدلله رب العالمين الذي رزقنا لا إله إلا الله.. نسأله الثبات عليها.. والهداية إليها وللعمل بها قدر ما يرضيه عنا

عشنا في الدروس اللي فاتت مع معاني توحيد الربوبية وتوحيد الأسماء والصفات..
واللي نقدر نقول بيندرجوا تحت التوحيد القلبي الاعتقادي..
اللي هو اه آمنت بالله الواحد الأحد الفرد الصمد إن له الأسماء الحسنى.. وإنه هو اللي بيحيي ويميت ويخلق ويزرق ويستجيب ويجير وينفع ويضر وووووو إلخ..

طيب خلاص كدة؟؟ لا طبعاً.. يجي القسم الثالث من أقسام التوحيد وهو توحيد الألوهية

ايه هو توحيد الألوهية بداية؟!!
توحيد الألوهية هو: إفراد الله سبحانه وتعالى بالعبادة يعني بمعنى آخر (توحيد العبادة) وأساسه التوجه بكل العبادات والأفعال من كبيرها لصغيرها ومن سرها إلى معلنها لله وحده لا شريك له..
خالصة مخلصة لوجهه الكريم..
كلمة ألوهية بقى.. كلمة جميلة وفيها معاني عظيمة يا حبذا الواحد يشعر بيها وهو بيفكر بعبادته ويعملها لوجه الله
لفظة ألوهية: جاية من فعل أله- يأله من الحب والتعظيم..
يعني توحيد ألوهية من معانيها: عبد معظماً محباً (وهو الله تعالى) عبادة فيها تعظيم ومحبة ورضا بالحال والرغب والرهب..
مش عبادة متضرر ومغصوب.. (عشان كدة في الإسلام مفيش غصب ومالوش معنى ولا له لازمة إن مكنش الإنسان يشعر بأحقية الله تعالى وحده بعبادته وأفعاله ونواياه وحياته كلها فكل عمله هباااااااااااااااء وإن كان يظهر صوام قوام متصدق مسبح ومن ملائكة الأرض)

أنا أؤمن بأحقية الله سبحانه وتعالى بالتعظيم والحب والجلال بسبب أفعاله التي لا تخفى على كل ذي عقل.. فأنا وبكامل الإرادة أتوجه له وحده بهذا الحب والتعظيم والإجلال عن طريق عبادتي إياه له وحده لا شريك له..
وده مسمى
وهو ده التوحيد اللي جه به الرسل والأنبياء.. وهو ده التوحيد اللي طلعت السيوف تجاهد في سبيل الله من أجله..
هو ده التوحيد اللي بيفرق أهل الإيمان من أهل الشرك

فاكرين لما قلنا ان أقوام السابقين مكنش عندهم مشكلة أبدًا في مسألة توحيد الربوبية.. وكانوا مدركين ومقرين بأن الله هو الخالق الرازق الواهب منزل الأمطار مجري السحاب..
فكانت مشكلتهم في توحيد الألوهية ده..
كانوا بيشركوا مع الله ألهة أخرى في العبادة والدعاء وطلب الرزق وتفريج الهموم والاستشفاء (طلب الشفاء) والاستستقاء (طلب المطر)
أو كانوا بيعبدوا الله بمزاجهم هم.. على غير إرادة الله منهم.. يعني يألف عبادة كدة من عنده ويقول أديني بعبدك يارب وأحسن من اللي طلبته مني (وكذبوا طبعاً)
فكان الأنبياء والرسل مهمتهم الأولى والأساسية هي دعوة الناس لعبادة الله الواحد وإفراده بهذه العبادة وحده لا شريك له.. وعلى مراد الله منهم أن يعبدوه.. يعني يعبدوا الله وحده كما يريد الله لا كما يريدون هم..

وتوحيد الألوهية ملازم للاتنين التانيين (الربوبية والأسماء والصفات).. مكمل لهم.. لا هو يصح من غيرهم ولا هم يصحوا من
غيره.. وهو دليل عليهم.. وهم دليل عليه.. يعني لو انت موحد بالله ومؤمن بأفعاله وأسمائه وصفاته يبقى وجب عليك إنك توحده بأفعالك إنت له وحده..
والعكس.. لو انت بتعبد الله وحده لا شريك.. يبقى ده دليل انك مصدق أو مؤمن بأفعال الله وإن له الأسماء الحسنى..
يعني مينفعش تبقى عارف ان ربنا اللي خلقك وبيرزقك.. ومؤمن بكدة تماماً وتروح تطلب من عبد زيه زيك أو ميت إنه يوسع عليك.. مثلاً يعني..
وفي نفس الوقت مينفعش تبقى واحد جميل كدة وبيصلي وبيصوم ومفيش بعد كدة.. وتنسى إن ربنا هو اللي بيرزق وبينفع ويضر فتعيش ذليل لعبد زيه زيك عشان ميأذكش في أكل عيشك أو ميأذيش عيالك..
وصلت الفكرة؟؟ لا ده ينفع ولا ده ينفع..

يعني تعمل حسابك.. هتدخل التوحيد تحط في دماغك إنك تخلص نفسك كدة لله.. بالعقل بالقلب بالعمل بالعلم بالظاهر بالباطن وكله كله كله..
متنقيش أو مترزكش على حتة وتسيب التانية.. الشرط ايه؟!
"أُدخلوا في السلم كاااااافة"

يعني جملة واحدة مفيش قطاعي..

معنى كدة إن لا إله إلا الله.. هي المسألة؟!!
أي نعم.. هي المسألة.. وهي الحياة والموت.. وهي السبب لوجودنا على هذه الأرض.. وهي السبب لدخولنا الجنة إن شاء الله..
يعني الموضوع كبييييييييييييير.. جدًا جدًا جدًا
:))

طب ايه؟!
هنعمل ايه؟!
إزاي نعيش عليها؟!
إزاي نطلب من ربنا الثبات عليها؟
إزاي نخلص النية والعمل لله؟!
إزاي نبعد عن الشرك ما خفي منه وما ظهر؟

بإذن الله ده وغيره هنعرفه مع بعض واحدة واحدة في الحلقات الجاية إن أحيانا ربنا لذلك..

تفاعل الأسبوع..
نبحث مع بعض ونتدبر في القرآن الكريم عن آيات بتتكلم عن:
- الغاية من خلق الله لنا..
- والغاية من إرسال الله- سبحانه وتعالى- الأنبياء والرسل للأقوام على مر الزمان

سبحانك اللهم وبحمدك أستغفرك وأتوب إليك أشهد أن لا إله إلا الله وأن محمدًا رسول الله