وحدوه - 6

(6)

بسم الله الرحمن الرحيم

الحمدلله رب العالمين.. وبه نستعين..
أشهد أن لا إله الله وأن محمدًا عبده ورسوله..
اللهم صلِ عليه وعلى آله وصحبه وسلم ومن والاه..

حاولنا نلخص في الحلقات السابقة أقسام التوحيد التلاتة
ربوبية: توحيد الأفعال لرب العالمين..
أسماء وصفات: توحيد الأسماء الحسنة والصفات العلى لله الواحد الأحد
ألوهية: توحيد عبادتنا لله وحده لا شريك له..
وقلنا التلاتة واحد لا ينفصلوا عن بعض.. وعشان تصدق ده بالعمل لازم وحتمًا ولابد تحقق دوكهم بالقول والقلب والعمل.. وهكذا..

طيب لا إله إلا الله يا جماعة.. ما توحدووووووووه :D
عارفين!!
(من صحيح الأحاديث) من قال لا إله إلا الله وكفر بما يُعبد من دون الله حرم ماله ودمه، وحسابه على الله..

* طب ما احنا بنقول لا إله إلا الله في اليوم 30 مرة محصلش يعني..
لا يا فندم.. مش كفاية تقولها باللفظ..

* طب ولا بالقلب؟!!
ولا بالكبدة حتى :D
* طب والله بعبد ربنا لوحده ومش مشرك بيه ما انت عارف.. انت عايز تكفرني ولا ايه؟؟!!
لا يا سيدي أكفر ايه بس استهدى بالله..
* كمان استهدى بالله؟!! انت شايفني مجنون؟!!
لا حول ولا قوة الا بالله.. طب خليك معايا بس واحدة واحدة..
شهادة أن لا إله إلا الله محتاجة تقولها باللفظ.. وتقرها بالقلب.. وتصدق عليها بالعمل وإيه بقى..اسمع دي عشان دي الكبيرة..
تكفر بما يعبد من دون الله.. اييييوووووووون.. تكفر بما يُعبد من دون الله..
عشان توصل لمرحلة عصمة المال والدم والحساب العظيم بقى على مالك الملك (تخيل انت بقى)
كبيرة والله وتستحق.. إحنا عايزين ايه من الدنيا دي غير كدة؟؟
* يا سلااااااااااام يا أخي جبت انت التايهة.. ما هو معروف يعني بما إني بعبد ربنا وحده لا شريك له يبقى اكيد مش هعبد أي حاجة تانية.. مش محتاجة فكاكة يعني..
لا يا سيدي.. هو انت فاكر إن الشرك إن تجيب صنم ولا بقرة ولا فار وتقعد تسجد لهم وتصلي بس؟؟ لااااااااااا...
ده الموضوع طلع كبيييييير.. ومافيش حد فينا إلا وبيتعرض في حياته لشوية مصايد كدة لولا هدى الله وغفرانه ورحمته التي وسعت كل شيء كنا طلعنا منها كلنا مشركين..
عشان كدة قلنا نتدبر كويس اوي في معاني التوحيد الألوهية والربوبية والأسماء والصفات.. ودايما نخلينا موصولين بها وبمعانيها.. وإلا ضعنا.. وهربت مننا زي الناس اللي بتسرح وتشطح بعقولها وتلاقيهم في النص نسيوا ان الواحد الأحد الفرد الصمد الذي ليس كمثله شيء وهو السميع البصير..
وترى ظاهرهم علماء وبياعين كلام زي ما بيقولوا.. بس الأساس كان ضعيف.. وهواهم هو اللي حاكمهم.. والشيطان يتمكن منهم.. فتلاقي أسئلة بلا إجابات في رأيهم.. مع ان الإجابة واضحة في العقيدة..

ندي مثال..
عارفين الناس بتوع أنا مؤمن بربنا وبصلي وبصوم وبتصدق وأخلاقي كويسة.. بس في حاجة قلقاني.. إزاي ربنا رحيم كدة وهو بيقول على نفسه رحمته وسعت كل شيء وسايب كل الشر ده في الأرض.. وسايب الأطفال يموتوا والناس تقتل بعضها؟؟
أوباااااااااا.. بالراحة بالراحة.. متخفش.. تعالى أقولك.. انت عارف انه رحيم.. طب ماهو حكيم.. وعليم.. وهو مالك الملك.. على كل شيء قدير.. يعني أحاط بعلمه كل شيء.. وله حكمة من كل أمر بيدبر له ويقدره على خلق.. هو كتب على فلان إنه يفقد ابنه الوحيد.. والراجل تعب صحيح.. بس ربنا أرحم بيه منك ومنه.. وربنا عالم هو عمل فيه كدة ليه وعشان ايه.. (ارجع كدة لسورة الكهف حكاية سيدنا الخضر مع موسى)

مثال تاني:
على فكرة أنا كست مش محتاجة إني أغطي شعري أو أحتشم في لبسي عشان الناس تحترمني أو تعاملني كويس.. وعلى فكرة انا بكلم رجالة عادي ومبيحصلش حاجة وكلهم إخواتي.. ومفيش الكلام بتاع الشيطان ثالثهما والخرافات دي.. أهم حاجة التربية والقلب الأبيض

أهلاً وسهلاً.. حضرتك قلتي لي مين اللي خلقك؟؟
ربنا طبعاً..

أه يعني هو اللي معاه الكتالوج بتاع الصنع بتااعك وبتاع الرجالة..

أه طبعاً..
وهو اللي عارف إيه اللي يصلحك وإيه اللي يبوظك؟
مفروض..
طب وهو بجلال قدره وعلو شأنه قالك احتشمي واتلمي وحطي حدود مع الغرباء..
حضرتك مين بقى عشان تقاوحي وتغيري في أوامره وتخالفيها كمان؟؟

اممممممممم (سكتة لسانية)

مثال ثالث:
مش إنتو بتقولوا الصلاة عماد الدين وهي الصلة بين الانسان وربه؟؟
أه طبعاً.. عارف طريقتي..

يا حلاوة يا ولاد.. وانت لما تحب تتصل بحد بتاخد نمرته منه ولا بتروح تألف نمرة من دماغك وتتصل بيه؟؟
هو رب العالمين اللي خلقك واللي بدعك واللي آويك وبرزقك من أرضه وسمائه بيقولك كلمني بالطريقة دي.. تقوله مش عاجبني ومتحبكهاش ومشيها دعاء بس؟؟
ينفع الكلام ده؟؟

النية الطيبة لا تصلح العمل الفاسد (قاعدة)

واحد تاني..
ده سيدنا الشيخ.. سر الأسرار ونور الممبار وعلم الأشجار.. مولانا عبد الجبار اللي بيتغدى بالولعة ويتعشى بالنار.. اللي أفتى لنا إن عادي ممكن تقتل الناس وقال عليهم إنهم مجرمين وريحتهم وحشة.. وإحنا بنصدق مولانا .. أي نعم هم أهلنا وأخواتنا وأعمامنا وجيرانا اللي عايشين معاهم بقالنا قرون.. بس إحنا هنعرف أكتر من الشيخ..

(لا تعليق)

تحبوا نتكلم عن مش هقدر أعمل كذا عشان الولاد؟؟
أو أنا أعمل اللالي عشان جوزي يرضى عني.. وأي حاجة يطلبها حتى لو حرام بعملها عشان بس يحبني ويرضى عني (مشوها جوزها)
ولا.. أبويا وأمي كلامهم سيف على رقبتي يا جدع ده ربنا قال وبالوالدين إحسانًا.. وأنا أمي قالت لي أبطل صلاة عشان بيقفشوا اللي بيصلوا.. لازم أسمع كلامها..
وأنا العيلة عندي متضايقين مني أوي عشان اتحجبت ولازم أقلع الحجاب عشان مظهر العيلة الاجتماعي بقى ياااااااااي.. هو مش ربنا قال نسمع كلام أهالينا؟!!

وهكذا الأمثلة كتييييييييييير..

شفتوا الموضوع كبير إزاي.. يعني جهل مدعق.. وعلم طاغي.. وهوى نفس شيطان.. ممكن ينقل الواحد من مرتبة لمرتبة في التوحيد.. ده ممكن ينقله كمان من التوحيد للشرك والعياذ بالله
ولو الإنسان مأخدش باله وتعهد نفسه بالتفكر والتذكر وخلى نفسه موصول بالله في كل سكنة وكل حركة ممكن بكل سهولة يضيع ولا حول ولا قوة إلا بالله..

ومن خلال الأمثلة اللي فاتت دي ممكن نوصل لمراتب لا إله إلا الله.. وإزاي أبرأ نفسي تمامًا من الشرك ما كبر منه وما صغر وما خفي منه وما ظهر؟؟
نخليها المرة الجاية إن شاء الله عشان منبقاش طولنا..

وعندكم الأمثلة أهو نتأمل ونتدبر ونراجع ونعمل فلاش باك كدة لحياتنا وحاضرنا ونجدد العهد والنية.. والله المستعان

سبحانك اللهم وبحمدك أستغفرك وأتوب إليك.. أشهد أن لا إله إلا الله وأن محمدًا رسول الله