وحدوه- 8

(8)

بسم الله الرحمن الرحيم..

سلام الله عليكم ورحمته وبركاته..
كيف الحال شباب؟
أعتذر عن التأخير الطويل..
المرة دي هتكون آخر حلقة في السلسلة حتى يفتح الله بأخرى..

كنا بنتكلم عن ايه؟!
مراتب لا إله إلا الله..
وقلنا إنهم أربع مراتب.. منقدرش نطلع لواحدة غير ما نكون رضينا وعملنا اللي قبلها..
والله المستعان..
المرتبة الأولى كانت:
الإيمان بالله وحده والتوجه له بالعبادة والدعاء والطلب وترك كل ماهو دونه على الإطلاق.. والتيقن تمام اليقين ان ما سوى الله لا يملك لنفسه ولا لغيره نفعًا ولا ضراً.. مفيش فصال
(قُلِ ادْعُوا الَّذِينَ زَعَمْتُم مِّن دُونِهِ فَلَا يَمْلِكُونَ كَشْفَ الضُّرِّ‌ عَنكُمْ وَلَا تَحْوِيلًا ﴿٥٦﴾ أُولَـٰئِكَ الَّذِينَ يَدْعُونَ يَبْتَغُونَ إِلَىٰ رَ‌بِّهِمُ الْوَسِيلَةَ أَيُّهُمْ أَقْرَ‌بُ وَيَرْ‌جُونَ رَ‌حْمَتَهُ وَيَخَافُونَ عَذَابَهُ ۚ إِنَّ عَذَابَ رَ‌بِّكَ كَانَ مَحْذُورً‌ا)

المرتبة الثانية كانت:
الولاء لله ولرسوله وللمؤمنين والبراءة من الشرك والمشركين (الحب في الله والبغض في الله).
(لقدْ كَانَتْ لَكُمْ أُسْوَةٌ حَسَنَةٌ فِي إِبْرَ‌اهِيمَ وَالَّذِينَ مَعَهُ إِذْ قَالُوا لِقَوْمِهِمْ إِنَّا بُرَ‌آءُ مِنكُمْ وَمِمَّا تَعْبُدُونَ مِن دُونِ اللَّـهِ كَفَرْ‌نَا بِكُمْ وَبَدَا بَيْنَنَا وَبَيْنَكُمُ الْعَدَاوَةُ وَالْبَغْضَاءُ أَبَدًا حَتَّىٰ تُؤْمِنُوا بِاللَّـهِ وَحْدَهُ إِلَّا قَوْلَ إِبْرَ‌اهِيمَ لِأَبِيهِ لَأَسْتَغْفِرَ‌نَّ لَكَ وَمَا أَمْلِكُ لَكَ مِنَ اللَّـهِ مِن شَيْءٍ ۖ رَّ‌بَّنَا عَلَيْكَ تَوَكَّلْنَا وَإِلَيْكَ أَنَبْنَا وَإِلَيْكَ الْمَصِيرُ‌)

طيب عرفت الاتنين دول؟؟ دخلوا قلبك ويقينك تمام؟؟ ارتقي للمرتبة الثالثة بقى:
ربنا أحب ليك من الدنيا وما فيها.. أحب إليك من نفسك..
أحب إليك من حب المشركين لمعبوداتهم
أحب إليك من عيالك.. ومالك وبلدك..
بصوا كدة معايا..
(وَمِنَ النَّاسِ مَن يَتَّخِذُ مِن دُونِ اللَّـهِ أَندَادًا يُحِبُّونَهُمْ كَحُبِّ اللَّـهِ ۖ وَالَّذِينَ آمَنُوا أَشَدُّ حُبًّا لِّلَّـهِ) سورة البقرة: 165
قالك فيه ناس جعلوا لله أنداد يحبونهم كحب الله..
مينفعش ولا يصح ولا يجوز في حق المؤمن.. المؤمن الحق حب الله عنده أعلى وأقوى
وفي الحديث الصحيح.. من وصفات حلاوة الإيمان للي عايز يتذوق أن يكون الله ورسوله أحب إليه مما سواهما..
هتقولوا لي طب الحمدلله الكلام ده عن المشركين الوثنيين اللي بيعبدوا الأصنام..
لكن احنا الحمدلله موحدين مالناش دعوة..

هقولكم طب استنوااااااااااا.. وبصوا كدة على حياتنا..
قلت لكم قبل كدة في حلقات فاتت.. مش لازم الواحد يجيب صنم ولا بقرة ولا فار عشان يبقى كدة مشرك بعبادة الله..
احنا في حياتنا اليومية في حاجات والله لو تأملناها وتأملنا علاقتنا بيها نلاقي نفسنا والعياذ بالله قاب قوسين أو أدنى من الشرك..
تصدق إن عيالك ممكن يبقوا ند لله؟؟وحبهم عندك زي حبك لله ويمكن يطغى كمان؟؟!!
مش مصدقني؟؟
طب راجعوا علاقتكم بيهم..
وشوفوا ﻷي مدى ممكن تعصوا أمر من أوامر الله عشان بس تراضوهم وتنفذوا لهم اللي هم عايزينه..
ها؟!! أخدتم بالكم؟؟
وهكذا قيسوا على كل أمور حياتنا..
خلي بالك يكون حبك لشغلك ولا لوالديك ولا لبلدك ولا لزوجك ولا لزوجتك ولا عشيرتك ولا ﻷصحابك ولا لنفسك أكتر من حبك لربنا.. ولا حتى زيه..
ومش بقول انك تكره الحاجات دي.. ﻷ طبعاً ده حبهم من فروض الله علينا.. بس دايماً وازن أمورك وأول ما تلاقي كفة حاجة فيهم هتعلى على أمر من أوامر الله فرمل وحاسب..
وافتكر
والذين ءامنوا أشد حباً لله..

وصلنا بالسلامة للدرجة دي.. ياللا ع اللي بعدها بقى..
المرتبة الرابعة..
(قُلْ إِن كُنتُمْ تُحِبُّونَ اللَّـهَ فَاتَّبِعُونِي يُحْبِبْكُمُ اللَّـهُ وَيَغْفِرْ‌ لَكُمْ ذُنُوبَكُمْ ۗ وَاللَّـهُ غَفُورٌ‌ رَّ‌حِيمٌ)
(فَلَا وَرَ‌بِّكَ لَا يُؤْمِنُونَ حَتَّىٰ يُحَكِّمُوكَ فِيمَا شَجَرَ‌ بَيْنَهُمْ ثُمَّ لَا يَجِدُوا فِي أَنفُسِهِمْ حَرَ‌جًا مِّمَّا قَضَيْتَ وَيُسَلِّمُوا تَسْلِيمًا)

شفتوا المرتبة الخطيرة دي؟!!
يعني ميجيش حد يقولك أنا الحمدلله بحب ربنا أوي أوي أوي.. وبقرا قرآن.. بس متقوليش حديث وأنا إيش عرفني الأحاديث دي صح ولا غلط ما هو منها موضوع كتير ومش صحيح.. وبعدين إحنا مش عندنا قراااااااااان.. خلاص يبقى إيه لازمة الحديث..
أو حد يقولك: بص أنا من ناحية ربنا قشطة مؤمن ومسلم بكل اللي بتقوله توحيد ربوبية وتوحيد الوهية وصفات وكله.. بس بصراحة من ناحية الرسول محمد عندي شكوك كتير كدة من ناحيته ويقوم يرص لك كام شبهة كدة من بتوع المستشرقين أو النصارى..

لا سيدي
لا يا حبيبي
لا يا فندم..
هي باكدج على بعضها.. يعني إزاي بتحب ربنا ومؤمن بألوهيته وربوبيته وأسمائه وصفاته وتشك في رسوله؟؟
وإنتي يا خالتي قرآن إيه اللي بتقريه وبتاخدي بيه من غير أحاديث النبي صلى الله عليه وسلم؟؟
طب أقيموا الصلاة وءاتوا الزكاة.. عرفتي كام ركعة منين؟؟ ولا نصاب الزكاة حسبتيه إنتي وذوقك يعني؟؟
عشان ميبقاش الواحد يقول أي كلام وخلاص..
هو شرط محبة الله اتباع الرسول الكريم.. اللي جاء بشرح وتفصيل ﻷوامر الله ونواهيه ومش الرسول هو اللي وضع لنفسه المكانة دي..
لا ده من رب العالمين في كتابه المحكم..
وزي ما ربنا سبحانه وتعالى حفظ القرآن الكريم من التحريف .. فسبحانه وتعالى حفظ لنا الحديث الشريف كمان..
وسخر له من عباده اللي يدور ورا الحديث الواحد ويسافر بالسنين عشان يتأكدوا من صحته.. والحمدلله رب العالمين أن سخر لنا دلوقتي وسائل بضغطة زر واحدة تعرف تجيب قرار الحديث واذا كان صحيح ولا ضعيف ولا موضوع ولا مقطوع..
فملناش حجة..

(فَلَا وَرَ‌بِّكَ لَا يُؤْمِنُونَ حَتَّىٰ يُحَكِّمُوكَ فِيمَا شَجَرَ‌ بَيْنَهُمْ ثُمَّ لَا يَجِدُوا فِي أَنفُسِهِمْ حَرَ‌جًا مِّمَّا قَضَيْتَ وَيُسَلِّمُوا تَسْلِيمًا)
آية في منتهى الخطورة.. لما نتأملها كويس والله نبكي بدل الدموع دم..
ربنا جعل شرط الإيمان تحكيم الرسول صلى الله عليه وسلم في الأمر وكمان نطمن للحكم (يعني منكونش مزمزقين منه) ونسلم بيه تمااااااااااماً..
انزل بالتطبيق الواقعي للآية على حياتنا..
مفييييييييييييييش..
مفييييييييش..

حكام .. بالقانون الوضعي الفرنسي أو ميثاق الأمم المنتحرة أو دساتير- لا مؤاخذة- ديمواقراطية أو قوانين حامورابي أي بتنجان والسلام
مجتمعات.. بالعادات والتقاليد والأعراف أو نتطور ونتحضر بقى ونقب على وش الفتة ونمشيها أفرنجي
أفراد.. بفتاوى العلامة البحبحاني أو قسم الفتاوى في مجلة سيدتي

ويا سلام لو جه موضوع مش على هوا الناس.. على الحيل والألاعيب والهابرا كادبرا عشان يطلعوا من أي زنقور هنا ولا هنا ويهربوا من الأمر أو النهي..
والتساهل والتمييع ومش مهم والمهم القلب أبيض .. واستفتي قلبك ولو افتوك الناس.. وسيبك من الناس وكلام الناس (هنا في الغالب بيكون قصدهم الناس اللي بتنصح بالمعروف)..
وحاجة يعني اللهم ارحمنا
وتلاقي اللي رضي يتبع وهو على عينه ومتوجس خيفة من اللي حواليه..
اللي هو التفسير الحرفي (يجدوا في أنفسهم حرجاً)

طبعاً في استثناءات فردية الحمدلله ربنا يجعلنا منهم
ممن رضوا وارتضوا بأمر الله ورسوله..
وينفخ في صورتنا لغاية ما نبقى جماعة كبيرة ثم مجتمع أكبر.. ثم تكون إيه؟؟

المفاجأة :)
خلافة على منهاج النبوة..
بإذن الله تعالى :)
ونحكم فيها أمر الله ورسوله ونسلم به تسليمًا.

بلغنا الله وإياكم