فشي غلك بعيد عنه حبيبتشي

هو ليه الحجاب بقى الحيطة المايلة بتاعت الستات؟!!!
تتخطب تقلع
تخس تقلع
تطلق تقلع
تكتئب تقلع
تتجوز تقلع
تشتغل تقلع
تترفد تقلع
صوباع رجلها الصغير يتخبط في الكومدينو تقلع

ليه؟!
ليييييييه؟! (بصوت شوبير)

يا أوختي والله ما عند الله لا يُنال إلا برضا الله
وإحنا كل حاجتنا عند ربنا والله مش عند حد تاني
وصضئيني يا نوال إنتي وهي الحجاب مكنش ومش هيكون العقبة اللي موقفة حياتك ولا مشاكلك هتتحل بقلعه ولو وسوس لك الشيطان لفترة وضحك عليكي وفهمك إنك بقيتي أحلى وأجمل وأرق وأصغر وأحسن وأمز وأفرش (من fresh ) من وإنتي بالحجاب
ده مجرد إحساس مزيف بيستدرجك بيه الشيطان
وكل ما هتفضلي تقنعي نفسك بكدة هتلاقي رجوعك بقى أصعب

يعني لما تبقي محجبة ومخنوقة طولي الحجاب شوية
قللي الميكب
التزمي بشروطه أكتر مش تقومي شايلاه خالص
إحنا عمالين نقول دارينا يا حيط واستر علينا يارب لغاية ما نلقاك وإنتي تقومي جايبة ضرفها... ايه يا شيخة؟!!... ايه ده يا شيخة!!!

استهدي بالله يا أختي يا حبيبتي ودوري على حل مشاكلك بعيد عن حجابك الله لا يسيئك

أه ولما تخسي ميبقاش شكر ربنا على النعمة دي جحود أوامره وتجري تلبسي الكارينا والاسكيني والايشي والشفتشي واكسسورات الحنطور وتمشي ترني في الشارع
والا قادر يرجعك بزيادة ١٥٠ كيلو
هاه
وإنتي حرة بقى.. تتنصحي تتنصحي.. متتنصحيش متتنصحيش
ماهو إنتي هتلبسيه هتلبسيه
فإلبسيه على حياة عينك أكرم وأحلى وأثوب