السلام عليكم ورحمة الله وبركاته..
بعد ما الفيس بوك- ربنا يخليه لأمه- فتح عدد الحروف في الاستاتيس والواحد بقى بيكتب مقالات فحبيت أعمل تجميعة هنا لبعض حالاتي اللي هي في حقيقة الأمر عرائض حال :D ..
بس مش هلتزم ترتيب زمني معين لأن الكلام مش مرتبط الحقيقة بترتيب .. وأهو كلام والسلام
......................................
عايزة ازايد ع الشعب النهاردة بقى:
ألا يا شعبي.. انت يالا
انت شعب لا مؤاخذة خرونج (ولو اني معرفش معناها) بس اهو كدة بقى
مفيش حد تبقى حريته وحقوقه في ايديه ويروح يزيها للي سرقه يحافظ له عليها
كل يوم والتاني المجلس العسكري وزبانية مبارك بيأكدوا انهم لسة على عهدهم القديم القذر
وانت يا شعبي الصبور المهاود ما تصدق يا عين أمك يتضحك عليك ببيانين ولا صندوقين انتخابات وتقول أهو نصبر يمكن يحن علينا.. وعدوك بعد ما كان سارقك بقى قاتلك وانت مش عارفة خانع ليه وبتتلكك ع الاستيكرار.. يا دي الخيبة عليك
بقالك ٦٠ سنة مستكير في القاع مش كفاية بقى ولا ايه؟!
الانتخابات دي بتتضرب على كبير اوي انيل من ايام المجحوم بأمر الله
عشان المرة دي بتتضرب ويصدروا الناس لبعضها تقطع في بعض
يطرمخها ويقولك الحق الحزب الفلاني بيزور وجاب ورق مضروب .. الحق الحزب العلاني بيوزع سفن فضائية قدام اللجان.. حلق الكتلة العلانية رموا الصناديق في قاع المحيط..
ووسط ده كله الجيش الحنين والشرطة الطيبة أمنا كلنا بتأمن العملية.. يا سلاااااام.. بتامنها من مين؟! من البلطجية بتوعهم؟!
ملعون أبو الغباء والاستغباء والهبل والاستهبال والغفلة والاستغفال
والله ما عارفة المفروض يحصل ايه عشان الناس تصدق ان المجلس هو مبارك ومبارك هو المجلس؟!
يعني لازم يدخلوا عليكم البيوت وينزلوا فيكم بالرشاشات عشان تصدقوا؟!
التاريخ: 6-12-2011
..........................................
فيديوهين لعبدالله كمال على تويتر لعبد الناصر والسادات.. وسبحان الله نفس طريقة كلام الليبراليين ومهاليع الشريعة دلوقت.. نفس المغالطات وقولبة الكلام والافترا في القول والسطحية.. ولو دورنا هنلاقي لمبارك العجب ولو ان موقفه من الجماعات الإسلامية والإسلام واضح طبعاً
ألا يكفي أن كان هؤلاء على مختلف توجهاتهم يهاجمون الاسلام لكن نتمسك نحن بتطبيقه
مش كفاية ان مبارك كان بيفزع بيهم عشان تعرفوا انهم مستأنسين ومبيعضوش؟! واللي كان بيظهر منهم هم المرضي عنهم من امن الدولة عشان يرعبوا الناس اكتر واكتر
حد اخد في اعتباره الناس دي حرفياً كانت في خمول واقتصر علمهم على المسجد وكتب التراث ومكنش فيه اللي يخليهم يجتهدوا ويحاولوا يخرجوا من قمقمهم ويطبقوا الاسلام واصوله بما يتناسب مع العصر..
بس شوية شوية اكيد هيعرفوا انهم مضطرين يخرجوا الكتب من الجامع ويبدأوا يطوعوا ويسقطوا بقى ع الواقع بما يناسب الظرف والزمان والمكان
بس بالمنظر ده كله ضرب ضرب مفيش شتيمة
لله الأمر من قبل ومن بعد
التاريخ: 3-12-2011
.............................................
موقف بعض المهلوعين والمرعوبين من مجرد فكرة تطبيق الشريعة الاسلامية (ولو انها مش واردة دلوقت خاااااالص) فكروني بالنكتة بتاعت
مرة واحد سأل واحد قاله عندك اسلام، قاله اه وهو معندوش جوة
(مكتوبة صح كدة)
التاريخ: 3-12-2011
.............................................
ويكأن الإسلام وشرائعه وفرائضه وسننه لسة نازلة علينا اليومين دول.. في ايييييييييييييييه؟!! ولما انتو حلوين ومسلمين وموحدين وبينكم وبين ربنا عمار كدة مالكم كدة هارين على نفسكم كدة وخايفين منه ومن تطبيقه
واحد/ة فلحوسـ/ة دلوقت يطلع يقولي احنا مش خايفين من الإسلام إحنا خايفين من المتأسلمين..
أقوله: لا معلش العب غيرها.. لو شيلت دقن "المتأسلم" ده ومعرفتش انه تبع الحزب الفلاني وأخدت كلامه مجرد من أي أحكام مسبقة ولا أكليشيهات خايبة من بتاعت الجلاد ولا عيسى ولا طبعاً بتاعت أورومبا هتعرف إن "أغلب" كلامه صح بس احنا اللي بنحاول نحور على نفسنا ومش قابلين اننا نطلع غلطانين ومصدقين نفسنا اننا خلاص وصلنا اليقين في عبادة الله في أرضه (وطبعا مش قصدي الصلاة والصوم يا حلوين)
.. ماهو يا تن تن يا تن تن.. مالهاش خيار تالت
لا حول ولا قوة الا بالله..خليتوا الواحد يطلعه عن شعوره لغاية ما اقرع.. حسبي الله ونعم الوكيل
التاريخ: 3-12-2011
...............................................
طب والله الحكام دول أغبى خلق الله..
ما انت بدل المصاريف اللي بتصرفها على مخابراتك وعساكرك وقنابلك ورصاصك واعتقالاتك لو صرفت نصها بس مش كلها ع الشعب مكنش يحصل اللي بيحصل ده؟؟
ماهي كدة كدة فلوس رايحة بس لااااااااااا.. ملعون أبو العجب والكرسي والكبر والجبروت اللي بينسي الواحد نفسه انه جيفة قذرة في الاخر ومش هياخد منها غير عمله
يا سوااااااااااااده
التاريخ: 3-12-2011
No comments:
Post a Comment