من هناك وهناك 2

لنستكمل معاً الحالات المستعصية دي

...........................

وبعدين قلة الادب اللي شغالة بحجة انه مدام رضي بالعمل العام يستحمل دي حجة بايخة ولا تقل قلة ادباً عن قلة الادب نفسها
يعني الراجل اللي بتقل ادبك عليه ده كان داس لك على طرف؟! جاب سيرة الست الوالدة في اي حوار بينكم؟!
مش معنى ان انت مش مخالف كلامه انك تشتمه او تسخر منه او تهينه باي شكل
قدر ان اولاً ان خلافكم فكري
ثانياً قدر ان في ناس تعرفه وبتحبه ويسوؤهم جداً شوفة شتيمته كدة
والا لو قلبناها مشتمة مش هنخلص وهتلف تلف وترجع لك في حد انت بتحبه
بصوا تعالوا نتفق منشتمش غير مبارك والداخلية والمجلس العسكري وشوية الفلول اللي ثابت عليهم التهم :))
كدة كل واحد يخليه في كوزه لما نعوزه ويشتم في سره لغاية ما الراجل او الست دي تتطرق في الحديث عن عيلته الكريمة ساعتها يبقى لك حق ترد

التاريخ: 2-12-2011
.............................

ولو اني عارفة اني بنفخ في قربة مقطوعة بس اهو اكون بعمل اللي عليا..
الراجل ده (ابو اسماعيل) من اكتر الناس في مرشحي الرئاسة اللي عندهم خطة ولولا اني عارفة ان خلاص اللي حط في دماغه حاجة مش هيشيلها كنت قلت اتفرج على حلقاته اللي فيها خطط عن كل مجال في البلد وازاي ممكن ننهض بيه
اللي بيحصل ايه بقى ان المذيعين المحترمين اللي بيقعد معاهم امثال الجلاد وعيسى والحديدي والابراشي وحتى لما جه على قناة الفجر الاسلامية
كلهم بيعملوا فلاليط وقال ايه بيزنقوا عليه في الكلام وقال بيحطوه في مزنق وبدل ما يسألوه عن خطط اقتصادية وتعليم وصحة ودولي وخلافه
تلاقي كل الاسئلة عن الست اللي في البيت الخمرة السياحة الحجاب السينما هتبقى نضيفة ولا متربة ولا موحلة
كلهم بلا استثناء لغاية ما الراجل كرع من الاسئلة دي وهو مضطر يجاوب احتراماً المشاهدين
ده مرة اقترحوا عليه ياخدلهم كاسيت ويشغل الاجابات توماتيكي
وتيجي بقى المواقع المحترمة برضه ومتعلقش او تجتزئ من حديثه غير الحتت دي واللي على مزاجهم سواء اسلامي او كريستيان دوجما حسب عايزين يثبتوا ايه؟! وتسيب بقية اللقاء
فيجوا الناس اللي مبتتفرجش على لقاءاته وبرامجه زي حضرتك يتفرجوا بس ع الحتت اللي بتنزلها المواقع المحترمة من البرامج المحترمة للمذيعين المحترمين فيتهألهم ان الراجل ده موارهوش غير الكلام في الموضوع ده

طبعاً مع اني عارفة انك مش هتعمليها برضه بس يمكن لو حد معدي يقرا ويعمل
اللي عايز يشوف فكر ابو اسماعيل ويعرف خططه لمصر غير الخمرة والسياحة والحجاب يتفرج على حلقاته رسول الله علمنا وحلقاته على قناة الناس هيلاقيها ع اليوتيوب
هذا والله الموفق والمستعان

التاريخ: 2-12-2011
......................................
كنت عايزة اسمع بقية الضيوف.. كلامه ماقنعنيش وخصوصاً انه استشهد بملك اسبانيا ومثاله حلو وينفع جداً في الاقتصاد التجارة التعليم الحاجات اللي الخيارات فيها مش هتودي اللي حاططها في داهية يوم القيامة
لكن لو انا حاكم وولي أمر وهتسأل عن الناس اللي تحت حكمي قدام ربنا يقوم القيامة هخاف وهراجع نفسي الف ولا مليون مرة قبل ما انظم لهم طرق لقلع الحجاب او لبسه او طرق لبيع الخمرة وتسويقها او منعها او طرق لشواطئ عراه واخرى لملتزمين واخليهم يختاروا بقى ..
مش عارفة اجابة يارب انا ماليش دعوة انا عملت الاتنين وهم اللي اختاروا هتتحسب ولا لأ..
الخيار خلاص اتحط من رب العالمين وانا مش إله عشان ادي خيار لأ .. انا مأمور أأمر بالمعروف وأنهى عن المنكر
وفي الاخر كل واحد هيبقى حر بس ذنبه مش هيبقى في رقبتي اني سهلت له او سبت له الخيار انه يعمل اللي عايزه
وف نفس الوقت-ودي المعضلة- مينفعش اتبع نموذج للفرض بالقوة او اني استبق حاجة قبل حاجة..
ولا إني أتخلى عن مبدأ الحكمة والموعظة الحسنة في الدعوة
وعشان كدة عجبتني اجابة ابو اسماعيل مع الجلاد اول اول امبارح لما سمع مكالمات الهلع بتاعت الحجاب
قالهم يا ناس متفتكروش ان الحجاب او اي شيء اخر ممكن يتفرض بالطريقة الدرامية اللي ف خيالكم دي
في حاجة اسمها دولة لازم تتبني الأول والناس تاخد حقوقها وتشوف خير من اللي هيمسك والحجاب وغيره هيجي لوحده وعن طيب خاطر وبحب لا فرض ولا عقاب
وكذا مرة قال كله بالرحمة واثبات الاول حسن المنهج وان هو سبب سعادة البشرية بما مبالغة
يعني لا مطلوب النموذج السعودي ولا النموذج التركي او التونسي القديم
بس ممكن النموذج التركي الحالي مع تغيير ما يتناسب مع حالة مصر الخاصة

وبعدين اللي هيمسك رئاسة ولا مسؤلية في البلد ده مالوش نفس يعني يدخل الجنة ولا هيبقى مكتوب عليهم يشيلوا ذنوب العباد عشان خاطر العباد ينباساطوا؟!! :D

عشان كدة مش فرحانة ولا طيرانة من الفرحة بفوز الاسلاميين ولا قربهم من المسؤلية عشان المسؤلية كبييييييييرة مش بس في الدنيا لأ في الاخرة كمان
وبدعي ربنا يسدد خطوات اي حد عايز يقيم شرعه في الارض ويجمع عليه القلوب ويفتحهاله

التاريخ: 4-12-2011 وده كان من ضمن الردود
......................................

محدش يتفلسف ويقول ان شاف تجربة اسلامية في اي حتة بكل بساطةلأن لا مسلمين مصر ولااخوانها ولاسلفييها ولااقباطها ولا طبيعتها زي اي حتة في الدنيا

التاريخ: 1-12-2011
.....................................

وجهة نظر تانية: الشعب الجاهل اللي اتضحك عليه انه هيختار الاسلام ويدخل الجنة لو اختار الاسلاميين تفتكروا ربنا هيضيعه حتى لو كان اللي قالهم كدة نصاب؟

التاريخ: 30-11-2011
...................................

لكن لما الاقي حد متحامل على حد بشكل مستمر ومش شايف منه خير ابداً.. ومن ناحية تانية بيشكر في حد اوي باستمرار ومش شايف منه حاجة وحشة يبقى اكيد حكمه عندي واي معلومة من طرفه هيبقى فيها محل شك..
وعشان كدة مباخدش من حد كدة معلومات.. للاسف مصدر المعلومة عندي بقى من مضمونها ..
يعني.. ممكن اخد من اون تي في خبر في صالح الاسلاميين وافضل انشر فيه هنا وهنا ده لو حصل..
لكن ماخدش منها هجوم..
او اخد من قناة الناس او الحكمة او شخصية اسلامية شكر او كلمة طيبة في حق البرادعي او حمزاوي او او بس مش هاخد منهم هجوم .

التاريخ: 30-11-2011
..............................

بيتهيألي ان اللي اخد الاصوات لازم نعزيه ونواسيه ونقف جنبه مش نهنيه ونفضل ننفخ فيه لغاية ما يفرقع.. ربنا يجعلهم عند حسن الظن

قلبي عند الاخوان والسلفيين لو فازوا:(( ليكونوا فاكرينها رحلة ولا غزوة. ده ابتلاء عظيم. ربنا يقدركم عليه بصراحة للبرلمان ده كله

التاريخ: 30-11-2011
...............................