من هناك وهناك 3

ونوااااااااااااااصل..
..............................

خلاصة رأيي في موضوع الإخوان وحزبهم والافعال الفضائية المريعة اللي محدش عملها غيرهم والباقي كانوا خضرا الشريفة: طبعاً مش عذر ولا مبرر ان مدام كله بيعمل ان انا كمان اعمل
بس الاخوان ورغم استقتالهم ع البرلمان واي سلطة سياسية إلا أني أحسبهم من المخلصين لقضيتهم وألا وهي الحكم بشرع الله. هم باختصار مش طلاب مال وكلما عارفين مستواهم عامل ازاي
وطلاب سلطة بما يخدم هدفهم ومشروعهم واجتهدوا فأن أصابوا فالحمدلله ابشروا اننا هنقوم وإن أخطأوا فلهم اجر الاجتهاد واحنا لنا ميدان التحرير نجيبهم من قفاهم ونديهم على سنين الاتستقتال دي كلها على مفيش..
ومن هذا المنطلق فحكاية انهم كانوا بيصطادوا الغلابة ويخلوهم ينتخبوا مرشحينهم (ورغم خطأ الفعل نفسه) فالغلبان كدة كدة مكنش هيبقاله رأي عشان اللي عارف خلاص ولا ميت اعلان ولا دعاية كانت هتأثر فيه
فعندي في تقديري الشخصي صاحب اللارأي يقع تحت اخوان احسن ما كان يقع تحت فل من الفلول او تحت اي فصيل اخر غير معلوم اتجاهاته او مشكوك فيها
وانا منتخبتهمش بالمناسبة :))
فخلينا حلوين كدة ومنصفين وبلاش يعمينا الغل او التحزب
خليكوا فريش احنا في ثورة :))
اه اللي هيدخل يؤيد ويعمل لايك اهلاً وسهلاً به
اللي هيدخل في جدال سرمدي اعذرني مهما كانت محبتك في قلبي مش هرد عليك ده رأي نهائي مش دعوة للنقاش
وجدالك اكيد هيكون برضه كدة يبقى مالوش لازمة يا ولد العم الا لو كنت فعلاً ملخبط وعايز تسأل مش سفسطة وخلاص فأهلاً وسهلاً برضه
بس خلاص

التاريخ: 30-11-2011
................................

أنا غلبت في الدفاع عن الإخوان والسلفيين.. ماراشوف لنا حد تاني يا جدعان ادافع عنه مش كدة يعني..
هو عاملين للناس اخرام في دماغهم لدرجة تأليف قصص وحكايات ونشر أخبار مضللة ده إن كانت حقيقية أصلاً.. هو مفيش غيرهم في البلد ولا اييييييه؟! ولا خلاص مل الناس بقت ملايكة ومتبقاش غير أبالسة وتنانين الاسلاميين .. حبة تروي.. حبة تعقل.. حبة منطق.. حبة تقوى.. حبة رحمة قبل ما تنقل أي خبر في أي اتجاه يا نااااااس.. انتو بتشاركوا في فتنة وانتو مش واخدين بالكم..فعلاً بقى في ناس شغلها الشاغل نشر اخبار مضللة واشاعات ومعتمدة طبعاً على "حب الناس للاسلامين" وحضرتك بكل بساطة تدوس شير
مينفعش.. تروى تأكد تثبت
ده انت مباح لك الكذب للصلح بين اتنين فما بالك انك بتنشر اخبار في اغلبها باطل وهدفها توقع وتنشر العداوة بين قلوب الناس.. أوصيكم ونفسي بتقوى الله

التاريخ: 29-11-2011
...................................

مش ممكن أنا ماشية ورا الناس بالعصاية اقولهم تثبتوا من الاخبار..
محدش ينشر حاجة الا بدليل..
كله ينشر ويحكم بغير دليل ولا بينة..
طب وبعدين في قلة الضمير دي؟؟
وطبعاً لو رديت عن الاخوان أبقى اخوانجية مصلحجية بتاعت انتخابات
ولو رديت عن السلف ابقى سلفية ظلامية من اللي بياكلوا الودان
ولو رديت عن الليبراليين ابقى بردعاوية (حاشا لله) بتاعت دستور والشعب الجاهل
ولو رديت عن الاشتراكيين ابقى شيوعية رافضة لاقامة شرع الله في الارض

ارحموا نفسكم وكل واحد ليقل خيراً او ليصمت ايه لزمته خبر غير مؤكد من جريدة مشكوك في نواياها او من اكونت معروف انحيازه لجهة معينة في وقت العدو واقف متربص وعمال يشعلل فيها بين كل الاطياف
اتقوا الله في اخواتكم وفي بلدكم مش كدة..
هتنشر خبر يصلح اتفضل.. شايف خبرك ينشر كراهية لطائفة ولو كنت ضدها اتق الله واذكره قبل ما تنشر.. مش كدة يعني
بجد حاجة تحرق الدم..

التاريخ: 26-11-2011
..................................

خيالات: الانتخابات تتعمل دلوقت والناس تفرح وتهيص والمجلس يتشكل ويجتمع تحت القبة وموافقة بقى واني اعترض وكدة.. يجوا يطلعوا مشروع قانون تحت عمو العسكري ودستور تحت عمو العسكري وقرارات تحت عمو العسكري..
الشعب طبعاً قامت قيامته.. مش هيعجبه الحال وخصوصاً ان القوانين والدستور هيكونوا بتوع عمو العسكري
يروحوا يعتصموا عند مجلس الشعب
يقوم اييييييه؟!
يطلع لهم ولاد عم عمو العسكري من الداخلية ويعملوا معاهم الصح..
ويضحك النواب جميعاً فرحين موافقين مصفقين
يارب خيب ظني.. ولو اني مش موافقة بس مش هسيب لهم صوتي
يلعن ابو دي حوسة
دبر لنا يارب إنا لا نحسن التدبير :(((

التاريخ:25-11-2011
...................................

انا من ناحية الغربة جبلة بالعكس صحتي النفسية جاية عليها جداً واهلي معايا ٢٤ ساعة اونلاين.. بس فعلاً الخمس ايام اللي فاتوا ولغاية دلوقت عرفت يعني ايه غربة.. يلعن ابو كدة
احساسي ٢٥ يناير وانا في وسط اهلي وجيراني واشاعات هجوم البلطجية والذعر والحظر كان ارحم مين مرة من القرف اللي انا فيه دلوقت
يارب قدر اي الخير ويسرهولي ياااااارب

التاريخ: 24-11-2011

...................................

الاخوة والاخوات بتوع احنا شعب اهطل واهبل وبيتجر لمواجهات واي حد يضحك عليه بكلمتين حتى القناة الاولى وتوفيق عكاشة
احنا اتجرينا خلاص والناس نزلت هي بلطجية محمد محمود بقوا يد واحدة واتضربوا بقنابل ورصاص واحد.. حضرتك تحب نعمل ايه دلوقت غير انك تشمت وتمجد في القرارات الحكيمة بتاعت شيوخك المكشوف عنهم الحجاب ولم ينجروا لمثل هذه الخدع وابوا ان تقطر دم واحدة منهم لتمتزج بدماء الرعاع من امثال الشعب ابو ريالة.، عايزين ايه؟!
انا رأيي بجد احمي نفسك واهلك وارحمنا من تعاطفك وقلقك المريع علينا وخوفك ع العوام الغوغاء اهو يا سيدي نريحكم منهم عشان لما يروحوا وتمسكوا البلد وتقيموا شرع الله ودستوره يبقى علئ نضافة.. بلا غلابة بلا ليبراليين بلا علمانيين بلا مصريين بلا قرف بقى..
بس ريحنا من اجتهاداتك ومنّك وأذاك
بالله عليكم ريحونا واتبروا مننا خاااااالص واعتبرونا مش موجودين على حسب نبوءاتكم اللي مبتنزلش الارض الشعب الغوغائي بيتلم في الميدان اهو عشان يخلصوا عليه ادعوا انتوا بس بالتعجيل وربنا يلهم المجلس العسكري الصواب ويريحكم من امثالنا في القريب العاجل واقنتوا في صلاتكم متنسوش

التاريخ: 24-11-2011

...................................

مهمات اللي قاعدين في البيت بجانب الدعاء والصلاة:
1- هي قوموا أهاليهم من قدام محطات المجلس العسكري، شدوا الفيشة، العبوا في الارسالات، اكسروا الجهاز اعملوا اي حاجة.. المهم يقوموا ياما يتفرجوا على قناة تحترم مخ الناس.

2-أي حد لجنة الكترونية ابن كلب او فلول ابن كنبة او سلفي من احفاد ابو لهب او ليبرالي ابن كارنيجي ريبورت سبام.. الشخصيات الطفيلية دي سبب البلا اللي احنا فيه بخنوعهم وهمهم على بطونهم وقال مستقبل ولادهم الاسود اصلا انهم متربين مع ام او اب زي دول.. او بياكلوا من فلوس المجلس والجزب الوطني الحرام بشغلهم في اللجان الالكترونية ضد الشباب الرجالة الابطال.

3- اللي ليها اخ، اب، زوج، ، ابن، عم، خال من شرطة أو جيش تبعت له تحلفه بربنا وتفكره بالرحم ما يمد ايد على اخواته وتصبره ع الشهادة لو رست على كدة وتفكره بعقاب ربنا لمن يسفك دم نفس بغير حق

4- احشد على اد ما تقدر تموين للميدان وشوف مين نازل من منطقتك وتابع وابعت معاه.. غالباً بتكون ادوية ضد حساسية الصدر، قطرة للعين، بطاطين، أكل شرب تجهيزات اسعافات اولية، جواكت او لبس تقيل للبرد.

5- إياك ثم إياك ثم إياك تشير أي خبر وخصوصاً أخبار بث الذعر إلا لو تعرف اللي بيقول شخصياً كلنا جربنا اشاعات الذعر الخايبة واللي عملته في 25.. اللي واقفين في الميدان رجالة واصلا مفيش حاجة هتخوفهم بس برضه مالوش لازمة طالما مش متاكد

كل ما افتكر حاجة هضيفها واللي عنده حاجة يقولها كمان ونحاول نوصلها..
ربنا يتقبل منا ومنكم ومن أطهر شباب ويحسن ختامنا جميعاً على شهادة في سبيله

التاريخ: 21-11-2011

.....................................