أدي الجامع وأدي الكباريه.. وءاااادي اللي قال هات حتة..

السلام عليكم ورحمة الله وبركاته..

في حوار مع أحدهم مصري مغترب في دولة (عربية) قال جملة بتلخص إشكالية الحكم الإسلامي اللي حاصلة في مصر دلوقت
البلد اللي هو عايش فيها (دبي بدون ذكر اسماء) في دبي 180 جنسية وعايشين مع بعض ومفيش اي فتنة .. كلام جميل
طبعاً مش جميل!!!
هو في حال يفضل مستقر وحياة وردي أصلاً وتبقى الدنيا ماشية طبيعي كدة؟ !!

ده الواحد لو عدى اسبوع من غير ما يكون في حاجة تعكنن عليه عيشته يبقى اكيد في حاجة غلط..
أحسب الناس أن يقولوا آمنا وهم لا يفتنون؟!
طب خلي كدة دبي تقول مفيش خمرة او مفيش معاملات ربوية واتفرج على نكد السنين
يبقى في حاجة غلط ولا مفيش؟

وإذا عُرف السبب بطل العجب..
دبي وشاكلتها من المدن العربية (اللي بالغلط بيتقال انهم تحت حكم إسلامي) اتفتحتوا خلاص.. مبقاش في حدود كل شيء مباح وعشان كدة كل اللي عايز حاجة بيلاقيها.. صح ولا لأ؟!!
الرد: الحكومة بتقول :أنا أبني الجامع وأبني الملهى الليلي وكل واحد يختار..
اللــــــــــــــــــــــــــه.. هو ده بالظبط اللي بيحصل في مصر دلوقت واللي الناس طالعة تشد في شعرها كل شوة في التليفزيون عشانه نظام سيبني وانا اختار .. ومتتحكمش فيا..

طيب أنا بقى عندي كلمتنين كدة لا هم محاضرة ولا درس علم ولا حتى هجيب دلائل من قرآن ولا من سنة أنا هقول اللي أنا حاسة بيه كمسلمة خلاص أخدت الرسالة أمانة وعندي ثقة لا تهتز إن شرع الله لا بديل عنه وهو اللي هيحقق العدل والتقدم لبلدي وللدنيا كلها بمن فيها مسلمين وغير مسلميان.. دي ايمان إن شاء الله أسأل الله له الثبات في قلبي والسداد في عملي لغاية ما أوصله أو أكون ولو طوبة في أمة إسلامية يرضى عنها الله ولو معشتهاش أنا هتعيشها بنتي أو أحفادي مش مشكلة.. بس المهم تكون في حسناتي

لا خلاف إن ربنا خلقنا وخلق لنا الحلال والحرام وترك لينا الخيار: من شاء فليؤمن ومن شاء فليكفر.. صح؟!! الحمدلله
أنا دلوقت كمسلم خلاص اخترت الإيمان..
وأخدت الرسالة كخليفة لله في الأرض.. أعبده فيها وأُعبّدها لعبادته وحده لا شريك له..
يبقى خلاص كدة.. لا تراجع ولا استسلام
حضرتي بقى مين عشان يبقى عندي القدرة والسلطة والعلم والحكمة اني اعمل زي ما ربنا عمل؟!!
يعني مثلاً أنا مسلمة وملتزمة خلاص.. أقوم بقى من باب الديموقراطية وعشان ابقى كول اجيب لولادي في البيت السجاير والخمرة وافتح لهم كله ع الغارب واقولهم اتفضلوا يا ولادي اختاروا يا حبايبي وكل واحد حر ياللا اليوم خمر ونساء انطلقواااااااااا؟!!
وأبقى أنا كدة ملتزمة؟؟

طيب حد فكر في وقفتي يوم القيامة قدام رب العالمين هقوله ايه؟! هقوله انا كنت كويسة والله بس انا ديموقراطية ومؤمنة بالحريات وعشان كدة انا وريتهم الطريقين وهم يختاروا؟!!
حد يديني إجابة مقنعة لو سمحتم

في فرق بين اني اربيهم الأول وأوفر لهم أسباب الهداية مع منع اسباب الضلال عنهم أو على الأقل تحت سقفي وتحت مسؤوليتي..
ثم عندما يبلغوا الرشد ينطلقوا بقى بعيد عني وفي بيوتهم ويكون لسة ليهم عليا حق النصح .. ساعتها هعرف اجاوب كويس

واعتقد بالمثل حاكم البلد او المسؤول..
هو مش كلكم راعٍ وكلكم مسؤول عن رعيته؟! يييييييه انا قلت مش هجيب احاديث .. بس معلش هو كلامي كدة استحملوا :)
هو الحاكم ده مثلاً مرفوع عنه القلم؟؟ مش هيحاكم ولا يتسأل يوم القيامة؟؟ مالوش نفس يدخل الجنة هو كمان ولا ايه؟!!

يعني ايه ابقى حاكم مسلم وبدعي إني أعرف حق الله وبقيم شريعته في المكان اللي هو وصلني له.. وارجع اقول بس انا هسيب كل واحد براحته؟؟
لا يا حبيبي مش براحته.. هو اه طبعاً براحته بس من غير ما ميزان سيئاتك انت ما يطب يا فالح..
انت هتبني مسجد حلو جميل .. لك ان شاء الله اجره واجر من صلى فيه وبالمثل اي مؤسسة هدفها خدمة الناس واي خدمة سهلتها للناس

تعالى بقى لما تبني ملهى ليلي او تسهل للعباد الوصول للمحرمات (حتى لو انت ملتزم ولا تأتيها) سيئاتهم في رقبة مين؟!!
مين اللي سهل وبنى ووفر لهم وسائل المتعة الحرام دي؟؟!!
مش حضرتك؟؟ ولا انت مستغني؟؟

مثال دبي بقى: مشكورين حكام دبي وامثالها من المدن اللي بتقول انها اسلامية او محسوبة ع الدول الاسلامية (اللي انا شخصياً مش عارفة منهم ولا واحدة بتطبق إسلام أصلاً) بس اهو الصيت ولا الغنى..
بتبنوا المساجد وتتفنوا في زخرفتها.. بتقدموا للناس خدمات تحترم ادميتهم سواء تعليم- صحة- تجارة- .. إلخ
يُقال في بعضهم الناس تعامل بقدر كاف من العدل الاجتماعي وكل واحد بياخد على اد جهده.. جميييييييييييييييل..
وإن شاء الله في ميزانكم لو تبتغون به وجه الله لا وجه العالم الغربي والاستثمارات.. :))

لكن من ناحية تانية.. تركت الملاهي وسمحت بالخمور.. فتحت الأبواب للمعاملات الربوية.. تركت الرذيلة في الشوارع عياناً بياناً..
وهتكلم عن الحجاب كمان (فرض غصب عن عين اي حد) الستات في بلادكم قلعت تحت عينكم..
طيب ايه؟؟ هتقولي وانا مالي انا مبعملش زيهم؟!!
اومال انت حاكم في ايه؟؟ ربنا وصل لك للمنصب ده عشان تعمل ايه.. مش تأمر بالمعروف وتنهى عن المنكر؟؟
واديك امرت بالمعروف لكن هل نهيت عن المنكر؟!!
وانت مصيبتك أكبر.. يعني الرجل العادي في الشارع اخره نصيحة أو إنكار قلبي.. لكن إنت يا حاكم ياللي في ايدك وضع قوانين واصدارها عملت ايه؟!!

أنا شخصياً نفسي أعرف الراجل الحاكم أو المسوؤل ده ممكن يرد يقول ايه لربنا يوم القيامة.. حد يديني ردود يمكن يعجبني رد واظبط بقى مع بنتي بدل الغلب اللي الواحد فيه من مجرد التفكير هكبرها ازاي

طب ايه الحل من غير ما تكون متجبر أو ديكتاتور أو إنك تتطاول على حقوق الناس او حرياتهم الشخصية؟
في بوست آخر إن شاء الله :)

ملحوظة:
البوست ده أنا بتكلم آخرة.. مليش دعوة بالدنيا
أنا الدنيا دي معمولة عشان أوصل لآخرة فيها جنة مش حاجة تانية.. أنا اللي أمشي الدنيا على أسلوبي عشان أوصل لهدفي.. مش هي اللي تمشيني ويا عالم هتوصلني فين.. ولو إن معروف انها دنيا غرورة :)

الجزء التاني هنعمل إيه في اللي قال هات حتة؟