آخر الخواطر

6- والأخيرة بحمد الله

بعد كدة الحمدلله كل اللي حصل كان العادي بقى بتاع كل موسم حج..

من مطرة وسيول في منى..

زحمة عشان ندخل مكة بس..

طواف في الدور الأخير عشان زحمة الصحن ..

دوخة عشان نلاقي باص الحملة وإحنا راجعين على جدة..

كلها في الطبيعي يعني.. وكلها كانت ميسرة بفضل الله بس الواحد ساعتها كلن لسة في حالة السخط إياها.. وخايف من أي حاجة ممكن تحصل مفاجأة..

وخصوصا إننا كنا مرتبين مع أصحابنا يروحوا هم الحرم الأول يخلصوا الطواف وإحنا نلحقهم على هناك بحيث نسيب لهم مريم عشان منعرضهاش لزحمة ولا لكتمة او لبرد أو أي حاجة وهي لسة مفاقتش من الدور إياه..

بس سبحان الله ربنا كان له ترتيب تاني خالص..

وأبى إلا أن تكون مريم معانا في طواف الوداع

أصحابنا فعلاً طلعوا من الجمرات على مكة.. اصلا لغاية ما وصلوا لمكة تقريباً مشي بسبب الزحمة كان العصر على الأبواب..

كنا إحنا لسة في منى بنستعد للرحيل وكله محضر شنطه ومستنين الباصات تدخل عشان تنقلنا..

وإذا بالرياح تهب والسما بقى لونها رمادي غامق..

وبدأ الأول البرق.. والرعد وراه..

وبدأ الذعر بقى في المخيم مع هطول الأمطار وسبحان الله كانت غزيرة جداااااااااا.. وكمان حبات البرد نزلت عليا وانا قاعدة في الخيمة :))

مش عايزة أقول إن أنا كنت قاعدة على فرشتي وواخدة مريم على حجري وماسكة الشمسية بالإيد التانية..

ما شاء الله المطرة كانت غزيرة لدرجة إنها اخترقت الخيمة مع إنها ضد المية ضد النار :D

ونزلت عليا سكينة سبحان الله ولا هامنني لا مطر ولا رعد ولا برق ولا تأخير ولا أي حاجة.. وكل اللي على لساني: سبحان الذي يسبح الرعد بحمده والملائكة من خيفته..

وأدعي لعلي ألحق حاجة من اللي فاتتني..

وخوفي على الناس اللي برة اللي من غير سقف فوقيهم..

وسبحان الهادي.. مريم وعلى عكس كل الولاد اللي مع كل رعدة يزيد صراخهم كانت هاديااااااااااااا ولا كأن في حاجة .. لا ده كمان كانت قال ايه بتسكت العيال التانيين وتحايلهم وتديهم تفاح أو أي حاجة في ايديها..

لدرجة الناس اللي معانا بقوا مستغربين بقى هي دي مريم مبطلة الحج ههههههههه..

قلت لهم يعني إحنا بقالنا 4 أيام مشفتوش مننا غير العياط والقرف.. كفاية نهدى شوية بقى هههههههه

عدت المطرة على خير

وبدأ توتر الناس وخوفهم إن يجي عليهم الليل وهم في منى ويضطروا يباتوا حسب الحكم الشرعي فيمن دخل عليه الليل وهو في منى..

وكله بقى اللي وراه طيران واللي وراه شغل واللي واللي..

والمرور برة مش عايز يدخل الباصات عشان الطرق لسة مليانة مية ومش مهيئة لكدة..

المهم طلع شيخ الحملة وطمن الناس إن ليس عليهم بيات في منى حتى لو أذن عليهم المغرب لأنهم أحصروا وإنهم فعلا كانوا مستعدين لمغادرتها وبكدة يمشوا في أي وقت ولا شيء عليهم..

الناس اتطمنت شوية .. بس لسة الباصات مدخلتش..

الحمدلله شوية شوية جات لنا الاخبار إن الباصات هتدخل بس عشان هتيجي من طرق بديلة فهتاخد وقت..

كله في حالة انتظار واستعداد للانقضاض على أي باص من غير لا ترتيب ولا تنظيم..

اللي يلحق يركب..

من ترتيباتنا إن شنط اصحابنا هتكون معانا نحطهالهم في الباص وياخدوها مع مريم في مكة وبكدة طه بقى متدبس في 7 شنط مطلوب منه ينقلهم على الباص اللي هو مش عارف انهي بالظبط

وكنا قبلها أصلاً وقبل فتوى الشيخ (لما دورنا عليها في كتاب الفتاوى بعد كدة لقينا إن سبحان الله الأمر في سعة كبيرة مش في الأمر ده بس في حاجات كتير بس إحنا اللي ساعات كتييييييير بنضقيها على نفسنا) عمالين نفكر طب نسيب الشنط ونطلع على أول منى مشي في المطرة دي عشان بس نلحق قبل دخول الليل علينا..

طيب شنطنا ماشي .. الامانة اللي معانا دي هنعمل فيها ايه؟

طيب البنت هنمشي بيها إزاي في الجو اللي مش باين له ملامح ده خالص لا هو برد ولا حر؟

من ستر ربنا الشباب المتطوع كان واقف - ربنا يبارك لهم في حالة استعداد لأي حد معاه أي مشكلة..

أول ما شافوا طه حاطط اتنين على كتفه وشايل في ايده شنطتين..

طلعوا يجروا عليه اخدوا منه وشالوا مع بعض وراحوا يدوروا على باص يحطوا فيه..

والحمدلله احنا كنا انتظرنا لغاية ما زحمة الناس على الباصات خلصت وبقى سهل علينا نشوف باص فاضي من غير لا نزاحم حد ولا نتدافع..

احنا خلاص مواعدنا اتخلبطت ومش عارفين هنوصل مكة إمتى واصحابنا خلصوا ولا لأ

ومريم دي هتيجي معانا في الزحمة ولا هنعمل فيها ايه؟

لا حول ولا قوة إلا بالله..

أنا بقى قلبي في رجليا..

يعني يا ربي حتى الحاجة الوحيدة اللي هعملها بنفسي في الحج عسيرة كدة..

ومبقاش في بقي ساعتها ولا جوايا غير يارب يسر .. اللهم لا سهل الا ما جعلته سهلا فاجعل الحزن إذا شئت ياربي سهلاً

طول الطريق اللي أخد ساعتين من منى لمكة (في حقيقة الأمر المسافة لا تتعدى ربع ساعة) مفيش في قلبي ولا على لساني إلا الدعاء ده..

خايفة على بنتي من الزحمة أنا معرفش الوضع في الطواف هيكون عامل ازاي.. وباين كدة مش هنقدر نقابل أصحابنا..

وفعلاً المساكين أخدوا المطرة دي كلها على راسهم وهم بيطوفوا مع البرد رجعوا خلاص..

كمان احنا محاصرين في الطريق الزحمة كان بيمشي خطوة خطوة.. وحرام نحبسهم جنبنا وهم تعبانين وكمان سايبين ابنهم تعبان في جدة عند قرايبهم ومامته هتموت من القلق عليه ..

وفي نفس الوقت هم مش عايزين يمشوا غير لما ياخدوا مريم عشان عارفين إنها تعبانة وخايفين عليها كمان..

لا حول ولا قوة إلا بالله..

المهم قلناهم توكلوا على الله انتم ومفيش مشكلة ان شاء الله ربنا هييسر وهناخدها معانا حتى لو اضطرينا إننا واحد فينا يقعد بيها والتاني يطوف وبعد كدة نبدل..

وقد كان..

وصلنا مكة الحمدلله..

وفييييييييين لما وصلنا الحرم من زحمة الطريق سبحان الله كله رايح هناك..

ووصلنا الحرم..

انا شفت المنظر في ساحة الحرم برة.. وقلبي بقى دوم دوم دوم دوم.. يارب سترك يارب سترك..

ناااااااااااااااااااااااااس

توكلنا على الله..

طبعا الصحن في علامة انه مقفول يعني مليان على آخره..

طلعنا الدور التاني.. مقدرتش حتى أمشي لغاية ما نوصل لعلامة بداية الطواف.. زحمة والعجل عامل مشكلة.. مع انه له مسار بس بيسيبه ويزاحم المشاه..

والناس في غلطة شنيعة بيعملوها ويوقفوا بيها الطواف عند علامة البداية..

الصح إن عند علامة الحجر الأسود وانت ماشي ترفع ايديك وتستلم الحجر وتسمي الله وتكبره..

الناس بقى تقف تكبر وتسلم وتدعي.. فبتوقف الطواف..

والعساكر الله يكون في عونهم.. ينبهوا والناس من ورا تقولهم مشي يا حاج وانت ماشي يا حاج .. لا تقف يا حاج..

بس بتقول لميييييييييين..

ربنا يهدي ..

المهم قلت لطه انا اتخنقت ومش قادرة اتنفس والبنت بدأت ترمي راسها تاني على كتفه..

ياللا بينا على فوق على الأقل فوقينا سما نعرف نتنفس..

طلعنا.. الحال ليس بأفضل عشان نفس مشكلة استلام الحجر فوق بس العساكر هنا واقفين بقى بالمرصاد للعجل بيخلوهم يمشوا في مسارهم وبينبهوا على الناس قبل ما يوصلوا العلامة..

والحمدلله عدى أول شوط في ربع ساعة..

والامور ميسرة والجو جميل..

قلنا حلو احنا نعمل شوطين تاني ونريح عشان أنا كتفي كان اتخدر خلاص وطه كان بقاله فترة شايل مريم ..

وعدى التاني والتالت.. ها يا عم الحاج نريح انا كتفي خلاص..

قالي لو قعدت مش هقوم .. حاولي تنسي وركزي في الدعاء وخلينا نكمل..

وأصر إنه يشيل مريم الطواف كله ..

وقد كان خلصنا كله كله في ساعة ونص في الدور التالت والحمدلله..

رقم قياسي بالنسبة لأي حد يسألنا..

تساهييييييييييييييييييييييييل..

خلصنا الحمدلله وارتوينا بزمزم..

وودعنا ورجعنا على باصنا بعد ما دورنا عليه شوية حلوين..

محستش بحالي غير وهو بيقولي احنا وصلنا جدة.. :D

عمرها ما حصلت معايا إني أنام من غير أحس كدة..

طبعا راجعة الأوتيل وانا مش شايفة قدامي ولا حاسة بأي حاجة..

ومريم هانم عايزة تلعب ماهي نايمة طول الطواف واحنا راجعين واحنا في الباص فخلاص بقى فاقت..

بس على ميييييييييين..

نوم بالإكراه يا ماما..

وصحينا الصبح .. وراحوا الرجالة يصلوا الجمعة في جدة..

وبعد كدة طلعنا على الكورنيش في انتظار ميعاد طائرة الرجوع للرياض..

ورجعنا بحمد الله وسلامته

مع شوية ذكريات لا يوووووووووووومكن تتنسي مع رجاء إنها متكونش آخر مرة.. ويكون في فصة تانية أعوض فيها اللي فاتني وأستفيد فيها من اخطائي واعمل فيها حساب اللي مكنتش عاملة حسابه..

بس الشوق الشوق .. نعمل ايه؟

وخصوصا مكة..

ربنا يوعدنا جميعاً بزيارات لا تنقطع ودعوات لا ترد

لسة مع خواطر ع الخاطر

4-

خلاص أكلنا وشربنا.. ياللا بقى ننام عشان هنصحى من بدري نطلع على عرفة..

اللــــــــــــــــــــــــــــــــــــــــــــه..

وأختكم بقى قاعدة مستنية اليوم ده بفارغ الصبر.. واوعى بقى مش هسيب المصحف وهدعي لنفسي ولزوجي وأهلي وأخواتي وإخواني والأصحاب والأحباب..

ماهو اه دي فرصة متتفوتش..

لغاية ما قمنا الفجر وصلينا وبدأ التجمع ومريم لسة لابسها العفريت ابن الناس.. وقامت معانا

وياللا عشان نمشي لغاية محطة القطار

هو قطار المشاعر.. معمول محطاته من عرفة للجمرات مروراً بمنى ومزدلفة.. هو شكله بالظبط زي مترو الأنفاق بتاعنا ونفس سرعته تقريباً.. ونظافة ايه وجمال ايه ونظام ايه..

يا مسهل يارب..

صحيح مشينا حبة حلوين عشان نوصل المحطة وطلعنا سلالم لسة مصبوبة أسمنت وعالية جداً..

بس ولو حلو برضه

أهو اي حاجة بدل الزحمة اللي الواحد كان بيشوفها في التلافزيون قبل كدة..

مريم اول مرة تشوف الأط (اللي هو القطر يعني) وتوت توت وكدة والجبل

والناس تلبي كلهم في صوت واحد..

إحساس جميل والله..

ورغم تعب أول يوم بس محدش حاسس بحاجة.. كله تمام وفل الفل.. كله مشتاق للوقفة في عرفة..

نزلنا من القطر وطبق الاأصل العلقة اللي فاتت سلالم عشان ننزل ومسافة عشان نوصل المخيم.. بس وماله.. كله بثوابه..

وصلنا المخيم الحمدلله.. الخيمة مكيفة برضه وكل واحد له فرشة خفيفة كدة يقعد عليها.. وطبعا الستات لوحدها والرجالة لوحدها..

ولسة بنقول يا هاااااااااااااادي..

تقوم الأخت مريم بللوء كل المية اللي شربتها من أول ما قامت من النوم..

قلت يمكن من خضخضة القطر.. سيبك منها..

بدأنا الزن..

الله أكبر..

زن وتشرب مية وبللوء..

زن وترضع وبللوء..

وهكذا من الساعة 8 الصبح لغاااااااااااية 2 الظهر..

طبعا أفسدنا على الناس خلوتها ودعاءها ووقفتها بين يدي الله وكل واحد مستني اللحظة دي من زمان عشان دعاء لا يرد..

بدأت الاتصالات بين مخيم الرجال والنساء

تعالى شوف بنتك ..

مالها..

معرفش عمالة تبللوء وتزن..

طيب هاتي..

خد..

رحنا لدكتور الحملة (وهو كان حاج معانا) يعني جاي بإحرامه لا سماعة بقى ولا أدوية ولا الهوا..

بس راجل كبارة وقال مافيهاش حاجة..

كل شوية نقطتين سفن اب أو عصير عشان متفقدش السوائل بس..

حاضر يا عم الحاج..

وفضلنا كدة جولات مكوكية ما بين المخيمين ومريم لا تنقطع عن الزن ولا البللوء

وأختكم بقى اللي جاي عليها عياط متواصل لا تكل ولا تمل..

البنت بدأ صوتها يروح من كتر الصراخ..

وبدأت هي بنفسها تطلب مية رغم انها مش كييفة يعني..

بس قالولي عشان بدأت تحس بجفاف فهي اللي بتطلب المية..

وانا اشربها حبة يا دوب .. تقوم بللوء على طول..

طبعا مفيش اكل..

مفيش رضاعة راضية تثبت في بطنها

الدنيا بدأت تحرر والتكيف مي محوق فيها..

الحق يقال الناس كلها بدأت تناقش المشكلة وكل اللي عنده حل طلع بيه

لمينا دكاترة الحملة علينا واللي معاه دوا طلعه لعل وعسى..

ودي أبدااااااااااا..

استقر الحال على إن لازمنا اسعاف حالاً..

طيب فين .. مفيش..

يا عالم ياهوووو .. طب حد يوصلنا لأقرب وحدة..

مفيش

طيب حد يتصل بالإسعاف ..

مفيش

طلع باباها يدور بنفسه على أي ملامح مركز صحي أو إسعاف..

وطلع واحد كمان ربنا يكرمه من ادارة الحملة يدور..

وفعلا لقينا إسعاف بس بعيييييييدة ومتقدرش تدخل المخيمات..

أخدوها مني وهي مخلصة من ايدي خالص.. وطلعوا بيها على الشارع الرئيسي.. وأنا أجري وراهم عشان احصلهم.. والدنيا شمس نار.. وحلقي جف مش قادرة حتى اتنفس..

والله اعلم هي حالها ايه.. بس كانت لسة بتعيط باللي فضل من صوتها..

ركبنا الإسعاف ووصلنا للوحدة الصحية..

اسعفوها بحقنتين لمنع القيء ومحلول جفاف المفترض تاخد منه كل شوية.. ودوا سخونية..

وفضلنا مستنيين شوية عشان نشوف اثر الدوا ..

جه باباها لحقنا على الوحدة بعد ما لف الدنيا برة..

ساعتين في الوحدة ورجعنا على المخيم بعد ما اطمنا انها من هترجع تاني..

الحمدلله رجعت مستقرة بس طبعا رايحة من الدنيا خالص..

أختكم بقى كانت في الوقت ده في أمس الحاجة لمحلول الجفاف فعلاً..

عيني مبقتش شايفة بيها.. صداع ماسك راسي مش سايبها..

قلبي مخلوع عليها.. وفي حسرة إني معملتش أي حاجة من اللي كنت ناوية أعملها.. ولا مسكت المصحف حتى..

بقيت حتى الكلام مش قادرة.. بقيت بكلم ربنا من غير ما افتح بقي..

مش قادرة حتى احرك شفايفي..

...............................................

5-

بعد ما رجعنا المخيم وهي مستقرة نسبياً على قرب المغرب كدة..

يادوب نامت شوية وانا قمت صليت الظهر والعصر جمع تأخير.. ولسة بقول يا هادي وهمسك المصحف..

قامت حبيبتي وهي مولعة من السخونة.. ورجعت تاني ترجع بغزارة لدرجة إننا بهدلنا فرشتين للناس وانا هدومي من ورا ومن قدام حصلها اللي حصلها..

بس سبحان الله عشان كانت مية بس فمكنش ليها ريحة.. أصلها كانت ناقصة يعني.. :D

وبدأنا تاني إسعافات السخونية وخناقات المحلول عشان أعوض لها السوائل .. وفضلت حبيبتي تاخد المحلول وترجعه وتسخن وتبرد

وما شاء الله لا قوة إلا بالله الناس كانت متعاونة جداً

يعني في الفترة بتاعت نفرة الحجاج من عرفات.. كنا توجهنا تاني لمحطة القطر عشان نروح على مزدلفة.. وكانت زحمة طبعاً بس معقولة برضه..

أول ما قلت البنت سخنت تاني.. اللي إداني إزازة مية عشان اغسلها وشها واللي عرضت عليا دوا السخونية بتاع ولادها.. واللي بيوسع لي عشان أقعد بيها لغاية ما الطابور يمشي..

واللي بيعرض على طه وصاحبه إنه يشيل معاهم الشنطة

ما شاء الله كانت روح جميلة تهون على الواحد التعب اللي كان فيه

المهم إنها كووووووول ده كانت خلاص فقدت القدرة على الحركة أو المناغشة أو الكلام.. بس تحط راسها على كتفي أو كتف باباها وهي ساكتة خاااااااااااالص..

وصلنا مزدلفة الحمدلله.. وكانت الحملة موفرة لكل واحد سليبج باج (منامة) لزوم البيات في مزدلفة

ومتحددلنا مكان تجمع معين مفروش بالحصير..

وحطينا رحالنا وهي كانت هديت الحمدلله والهوا كان حلو ورضعت ونامت شوية وانا ريحت جنبها شوية..

محدش بقى يسأل فين الدعاء وفين الذكر وفين المصحف.. كله من جوة

وجه وقت الرجوع لمنى..

ها تحبي تباتي هنا ولا نمشي بعد نص الليل..

طبعاً الإجابة الطبيعية في الحالة دي إني أمشي..

على الأقل ألاقي حمام وأغير هدومي اللي الله أعلم صالحة للصلاة ولا لأ.. والبنت تنام في مكان مقفول بعيد عن التراب وكدة

اضطرينا آسفين إننا نرجع على منى

وخد عندك ساعتين كمان وقفة في طابور القطر لغاية ما يجي دورنا ونركب..

بس موقفناش.. بقينا قاعدين واحتسبناها ضمن مبيتنا في مزدلفة..

رجعنا منى الحمدلله وغيرنا هدومنا وحالنا ومحتالنا ووصلنا لفترة سكون ما قبل الفجر..

أنا من كتر التعب مش قادرة أنام.. والناس بدأت تهل علينا اللي جاي من مزدلفة واللي رجع من رمي الجمار وبدأت الناس تتحلل من إحرامها

وما شاء الله رغم الكل تعبان واللي راح مشي واللي وقف في طوابير واللي مش نايم واللي واللي واللي

بس الفرحة في عينهم وهم راجعين وبعد ما تحللوا ما شاء الله لا قوة إلا بالله

ربنا يرزق الجميع ويتقبل منهم

طبعا كان الاتفاق إن خلاص ماليش رمي .. فوكلت زوجي إنه يرمي عني

وفضلت أنا قاعدة في المخيم ضيفة شرف.. أغير وأمسح وأعافر عشان تاخد المحلول والأدوية..

بس الحالة فضلت زي ما هي مفيش تغيير .. البنت بدأت تنشف وبقت تطلع لسانها تمسح على شفايفها بتدور على مية وأنا مش قادرة اشربها مية كتير عشان معدتها..

وزي ما قالي الدكتور بتاع المركز الصحي..

الدكاترة اللي كانوا معانا - ربنا يبارك لهم- قالولي انها محتاجة يتعلق لها محاليل.. عشان كدة وصلت لعلامة لخطر.. حكاية انها تطلع لسانها دي وعينيها اللي طلعت من محجرها..

كان ساعتها طه لسة بيرمي ومرجعش..

أخدتها وطلعت بيها على باب المخيم.. الدنيا برة زحمة جداااااااااا وكل الناس ماشية في اتجاه واحد ناحية الجمرات..

تحس سيل من البشر..

حد من الإدارة أخدني وأنا شايلاها على ايدي عشان يوصلني لأقرب مستشفى..

أنا عن نفسي مش فاكرة أنا كنت ماشية إزاي وسط الناس دي كلها..

المهم قبل ما نوصل المستشفى لقينا مركز طبي قلت للشاب اللي كان ماشي قدامي أنا هدخلها هنا مش هقدر امشي اكتر من كدة بيها في الزحمة والشمس دي..

ربنا يكرمه دخل معايا وجاب لي ورقة الكشف ودخلت للدكتور بااااااااارضه نفس الكلام..

حقن ومحلول جفاف..

أنا ساعتها وقفت لهم قلت لهم انا عايزة اركب لها محلول البنت خلاص مش متقبلة اي حاجة بتدخل عن طريق الفم.. وخليته هو بنفسه يجرب يديها الدوا .. ومعرفش

اداها الحقنتين بتوع الترجيع وقالي طيب خليكم هنا لغاية ما نشوف هتعمل ايه.. بس أكد لي انها مش محتاجة محاليل عشان معندا علامات الجفاف المعروفة..

خلاص هي مرمية على ايدي

وأنا اللي جاي عليا عياااااااااااااااط

استنيت شوية

بصراحة المكان كان نضيف جداً ما شاء الله والمعاملة في منتهى الذوق والأدب من كبيرهم لصغيرهم حتى لو مش عارفين يعملوا حاجة بس كفاية لسانهم الحلو وأدبهم

أخدتها ورجعت المخيم .. تخيلوا بقى السيل اللي كان ماشي ده.. مشيت عكسه..

وبرضه مش فاكرة أنا كنت ماشية ازاي حطيتها في حضني وحطيت عليها الطرحة بتاعتي واخترقت الزحام.. كنت خايفة عليها من أي حاجة ممكن تلمسها حتى

ورجعنا نفس الموال حرارة بتعلى وتوطى.. ترجيع مستمر وانا شغالة معاها بالمحاليل ومخبية عنها أي إزازة مية عشان حبيبتي مكنش في بقها غير كلمة مية..

جه باباها من الجمرات..

قلت له اطلع بيها على المستشفى تاني اتصرف أنا مش قادرة اعمل حاجة..

اخدها وطلع بيها على المستشفى الكبيرة..

ولقى دكتورة أطفال مصرية كمان

وأخد اللي فيه القسمة والنصيب من التأنيب والتقريع عن ازاي يجيب بنت صغيرة معاه واحنا يا مصرين كدة ومش عارفة ايه..

المهم انها برضه رفضت تعلق لها محاليل وادتها حقنتين تانيين..

طب وأخرتها.. مفيش

قضينا الليلة كدة..

تهدى شوية وبعدين ترجع ترجع وتسخن تاني..

كل دده حبيبتي مش قادرة تعمل حمام كمان..

ومرمية بمعنى الكلمة على الفرشة.. حتى اللي يجي يلاعبها او يهزر معاها يادوب تبتسم ابتسامة كدة ومتكملهاش وترجع تاني مفنجلة عنيها ورامية راسها لورا..

وأنا ايييييييه؟؟

برافو.. أعيط

تاني يوم أو نقول تالت يوم ..

قامت الصبح لوحدها من غير ما تعيط ولا حاجة الناس فرحوا بيها ولقوها راجت قعدت معاهم وهم بيفطروا حبوا يدوقوها اي حاجة قامت قالت لهم بصوت ضعيف بيتة (يعني بيضة) بيقولولي (عشان كنت نايمة في دنيا تانية) قطعت قلبهم وادوها حتة من البياض وخافوا يدوها تاني..

كنت صحيت على صوتهم وهم بيلاعبوها.. قلت لهم خير خير.. وحاولنا نديها حتة جبنة.. اخدت فتفوتة ورجعت رمت نفسها تاني على المخدة كأنها عملت مجهود فظيع..

قلت الحمدلله إنها حتى قامت ولو شوية..

واشتغلت معاها تاني دوا ومحاليل ..

قامت رجعت تاني كل اللي أكلته

وفضلت بعدها شوية محترمين كل ما تاخد حاجة ترجعها..

لا حول ولا قوة إلا بالله..

كدة بقى خلاااااااااااااااااص.. تالت يوم ترجيع

دكتور أطفال زوج واحدة من اللي كانوا معانا طلب يشوفها وطلب كمان إننا نجيب حتى عدة المحلول وهو يعلقها في العيادة بتاعت المخيم..

شافها قال دي لازم يتعلق لها محاليل حالاً يا إما هتدخل في حاجة اسمها اسيدوسز (حاجة زي كدة يعني)

طبعا عيادة المخيم غير معدة لحاجة زي كدة

رجع باباها من الجمرات طلع بيها على مستشفى تانية للقوات المسلحة ومرضيش ياخدني معاه..

اتصل بيا كمان شوية وسمعت صوتها وراه بتحاول تصرخ اتاريهم حبيبتي علقوها لها المحاليل وادوها ابر تاني عشان الترجيع.. طبعا طلعت اجري عشان لازم ست هي اللي تقعد بيها في قسم النساء

بس الحمدلله سمحوا لطه يقعد بيها لغاية ما رحت أنا..

ما شاء الله لتالت مرة أو رابع مرة المستشفى ماشاء الله في منتهى النضافة .. الأوض .. السراير .. حتى لبس العاملين

ومعاملة الدكاترة والطقم كله ..

ربنا يبارك لهم يارب..

دخلت أخدتها في حضني وهي رامية راسها على كتفي وكانت عايزة تعيط.. فقعدوا الممرضات يلعبوا معاها سكتت وطبعا معلقة ايديها في الهوا خايفة من الكانيولا..

مع إن في السرير اللي جنبها ولد ما شاء الله زي العسل كان واقف على السرير وعمال يلعب ويتنطط وهو متعلقه له محاليل في ايده برضه :D

مامته قعدت تقولي أصله بقاله فترة فاخد الجرعة وفاق بقى هههههههه

بدأت مريومة تفوق وصوتها بدأ يطلع وقعدت تسمع لي الكلمات اللي هي عارفها.. وتشاور على الحاجة وانا اقولها دي ايه..

ولقيتها بتقولي أووزززز (يعني رز)

الهانم عايزة تتغدى) هم قبلها كانوا جايبين وجبات في غرفة التنويم دي.. وبدأوا يوزعوا على كل اللي قاعدين سواء المرضى أو المرافقين.. وأنا كنت قلت للممرضة أنا مش عايزة وهي قعدت تقولي ده رز نضيف ومسقعة وحتة جاتوه والله نضيف ومش عارف ايه.. قلت لها والله عارفة بس أنا ماليش نفس أكل..

هي القردة قاعدة رامية ودنها..

وشافت الست اللي قدامنا الممرضة بتأكلها.. فقالت وليه لأ..هههههههه

سمعتها الممرضة وهي بتقول كدة.. قالت يا سلااااااام.. قامت جابت لها وجبة كاملة ولبنونو كمان :D

المهم على الدوشة دي كلها أكلت معلقتين وشربت بقين لبن رايب..

قلت الحمدلله ..

فاقت وبقت تلاعب الممرضات كمان..

وجه الدكتور وكتبلها خروج وقالي على التعليمات ونبهني لو رجعت ارجع لهم المستشفى تاني

وحذرني إن هيجليها -أكرمكم الله- إسهال عشان معدتها بعد الجفاف اللي كانت فيها هتبدي تشتغل .. وهي كانت فعلا بدأت من واحنا في المستشفى..

أخدتها ورجعنا المخيم عشان كان بابا راح يرمي قبل المغرب..

وأول ما دخلنا ما شاء الله لا قوة إلا بالله رضعتها وقامت بقى تمارس المهام .. وتحيي الجماهير والناس اللي افسدت عليهم حجتهم :D

وتروح من هنا لهنا وتلاعب في الولاد التانيين..

والناس فرحوا بيها أوي..

قلت خير الحمدلله..كدة ممكن اسيبها مع صحبتي بكرة ان شاء الله وأروح ألحق وأرمي أي حاجة أو حتى بس أروح أشوف الناس كانت بتعمل ايه اليومين اللي فاتوا..

طلع لي القرار بإنه لأ مفيش خروج من المخيم عشان البنت..

والحمدلله إن حصل كدة لأن معدتها بقى اشتغلت واللي حصل حصل..

الحمدلله رب العالمين بهدلنا الدنيا.. وقضيت أغلب اليوم أداري وأمسح وأغسل أخطاء بنتي :D

الحالة النفسية طبعا في الحضيض.. وما كان مهون عليا غير إني شفتها فايقة قدامي وبتلعب

بس كنت متغاظة منها غيييييييييييظ..

يعني حضرتك تتعبي في الأيام اللي فيها حاجة.. وتفوقي لي لما نخلص..

طييييييييييييب يا مريم

قدر الله وما شاء فعل

خواطر ع الخاطر..

اضطريت أغير العنوان .. لقيته كدة أحسن بعد ما هديت شوية
2-

أنا لقيت خير اللهم اجعله خير الباص داخل في شارع صغير.. يادوب يعدي باصين تلاتة جنبه.. بي في الظروف دي يادوب يعدي لوحده ويحمد ربنا إن مخدتش مية ولا اتنين تحت عجله وهو معدي..

مش دي القضية.. دول 2 مليون حاج يا ناس مش مشكلة..

الناس اللي فارشة على الجنبين من كل شكل وكل لون فيكي يا أرض وإن كان يخيم عليهم طابع الفقر المدعق..

زحمة مش طبيعية.. مش دي القضية برضه.. المشكلة في الفوضى اللي بتيجي مع الزحمة زي الكثافة السكانية كدة .. هي في حد ذاتها مش مشكلة .. المشكلة في توابعها لو ما استغلتش صح..

لا علينا..

طب احكي على الغوغائية اللي بانت من شباك من الباص من غير ما أنزل على أرض الواقع؟؟

ولا اتكلم عن الزبالة اللي الناس فارشة وسطها وقاعدة؟؟؟

تخيلوا رايحين أطهر مكان على وجه الأرض.. وهو نفسه المفروض يكون في أطهر حالاته النفسي والجسمانية عشان هيؤدي عبادة من أطهر العبادات.. مش أي حد ربنا بيسرله بيعملها.. وقاعد وسط الزبالة..

طب إزاااااااااااااااااي؟؟

النظافة مالهاش علاقة بالفقر.. مش عشان انت فقير او مش معاك تطلع في حملة منظمة تبقى مزبل ومزبل للي حواليك

ودي بانت بقى مع اللي طالعين بالفعل مع الحملات المنظمة..

اللي منهم ناس عايزين اللي ينضف وراهم حتى حاجاتهم الشخصية..

ليه كدة يا مسلمين.. وبعد كدة نزعل لما يقولوا علينا همج وزبالة الشعوب؟؟

المهم هنا بدأ قلبي ينقبض..

وبدأت أفكر.. الحج ده مش من حكمه إننا نحس إننا سواسية؟؟

مفيش فرق بين الفقير والغني؟؟

إزاي بقى وأنا كمان شوية هنزل من الباص بتاعي المكيف على خيمة مكيفة ومخدومة بمشروباتها بأكلها بحمامتها وبفرشها (هنيجي بعدين للنقطة دي.. وعلى بعد خطوات من باب المخيم ناس قاعدة على الزبالة الله أعلم بتاكل منين .. بتدخل حمام إزاي.. هتنام إزاي هتقضي الوقت في شمس مكة الحارقة إزاي؟؟

فين السواسية؟؟

طيب يبقى انا اللي غلطانة اني دافعة فلوس لزوم راحتي ودفعاً للمشقة للتفرغ للعبادة؟؟

ولا غيري هو اللي غلطان إنه بلطج وتغاضى عن القوانين وكان كل همه وحلم حياته إنه يؤدي شعيرة ربما لا يعرف عنها غير اسمها؟؟

..........................................................

3-

اه لغاية ما صعقت من مشهد المفترشين ..

ودخلنا المخيم..

آن آن آآآآآآآآآآآآآآآآن تشششششش..

معدتش ومفكرتش أعد كان فيه كام منامة في الخيمة..

بس على العموم أنا من زمان وانا بحب الرحلات والمعسكرات والتجمعات دي..

بس المرة دي أنا مش لوحدي..

مين .. فين.. إيه؟؟

دا أنا معايا طفلة.. ومش أي طفلة.. طفلة تقول للفقر والنكد قوموا يا حبايبي ناموا جوة وانا بدالكم طول العمر..

المهم الحملة بدأت تظهر على حقيقتها منذ هذه اللحظة.. وبدأت تبان الديفوهات بقى..

يعني خيمتنا الوحيدة اللي كان محطوط فيها منامات (فرشة عريضة تتفرد تبقى سرير تتني تبقى كرسي) زيادة عن العدد المفروض يتحط.. لدرجة مفيش مكان ممكن احط فيه الشنطة اللي معايا..

ولقينا لما جينا نفردها عشان النوم إن ما الخيمة إلا سرير كبير يا والدي.. وزي ما نكون نايمين كلنا جنب بعض..

بس مش مشكلة.. أهو العيال برضه تبقى متحاوطة ومتقعش على الآرض..

والحمدلله فيه مكان نبات فيه ومكيف وحاجة على راسنا تقينا الحر أو المطر زي ما حصل في آخر يوم..

مريوم حبيبتي بقى خلفت توقعاتي.. ولقيتها ولا خايفة من الناس ولا العيال ولا حاجة..

بتحاول تروح لهم وتقعد معاهم وتلعب.. قلت: خير اللهم اجعله خير.. ربنا يكملك بعقلك يا حبيبتي..

وفتح البوفيه (لا داعي بقى للحديث عن عدم نظامه ولا نظام الناس اللي واقفة ولا كميات الأكل اللي اترمت بعدين)

جالي الأكل الحمدلله من صحبتي اللي كانت معايا.. ربنا يكرمها يارب..

وأكلت مريوم وأنا حاولت اكل بس مجدرتش يا ولدي..

وبدأت آخد موقف من الأكل

وعشت بعدها على العصير والفاكهة والبقسماط او ما يشبهه من مقرمشات..

عدت الليلة.. وبدأت اخد على جو المخيم .. الناس لطيفة.. الجو لذيذ..

مريم هادية وساكتة ونامت..

اللهم لك الحمد .. ومازال التيسير مستمراً..

اكتر من كدة أبقى مفترية.. كدة ولا ايه؟؟

خواطر متسرش الخاطر -1

مش الواحد بيكون خارج من رمضان حاسس إنه عمل حاجة أو معملش..

كذا في الحج.. الواحد بيرجع وهو عارف وحاسس إذا عمل ولا معملش..

مع الوضع في الاعتبار إن رحمة ربنا فوق كل شيء

استبشرت خير لما لقيت الرحلة بدأت موفقة من مكان ما نزلنا في جدة ولما لقينا الحملة بدايتها كويسة ومريم لبسها العفريت الهادي المؤدب ابن الناس وقلت خير .. رغم ان الواحد قبلها كان مبلبع كورس مضادات حيوية لزوم البرد السخونية وغيره الحمدلله..

وبدأنا الرحلة لمكة وبدأنا بتيسر طواف القدوم والسعي وعلى الرغم من حرارة الشمس إلا إن الحمدلله عدت وبدل ما كان اتنين بيشيلوه الست هانم بقوا خمسة تحت أمر السيادة..

ولك الحمد يا رب..

حر وشمس وتعب بس إحساس بلذة بعدها وسعادة إن جزء عدى على خير..

رايحين على منى..

وما أدراك ما منى..

غالبا الواحد بيصر إن يعيش نفسه في أحلام وخيالات مش هنشوفها غير في الجنة (ربنا يرزقنا)

بقى هي دي منى مجمعة المسلمين لمدة 3 ايام او اكتر؟؟

هم دول المسلمين اللي منهم دافع بلا اي مبالغة دم قلبه عشان يلبي النداء ويكمل الركن الخامس؟؟

وبدأت الانقباضات تتسلل إلى قلبي من مناظر أنا مكنتش اتخليها..

.......................................

المعجم المحيط لكلام تاوتاو العبيط

ماما= ماما .. سهلة دي

هاباه= هبة (ماما)

بابا= بابا .. بديهي يعني

تاتا= طه.. (بابا)

تيتة= تيتة..

إدو= جدو..

تاويتو= تاوتاو..

مامم= مريم..

اومااااا= سومة.. دلع تيتة ماما..

تزيتزي= زيزي.. بدلع تيتة بابا.. :))

اييين= حسين.. اسم جدو..

آلو= خالو..

اداة= حمادة..

لالا= تالة صبحتشي..

لي لي= لي لي صبحتشي برضه..

بيببببببببببفففف= متعب.. وده خالو برضه اسمه أحمد بس دلعه متعب..

جكوجكو = جوجو.. خالو جهاد..

ألو= ألو.. بسيطة برضه

ااااااااااااامممممممم= الحمدلله.. الاختصار حلو ..

أوكاااااااااا= شكراً..

بادي= زبادي..

نونوووو= لبن..

أللي= تاكلي..

أبي= تشربي..

بيتييييييييي= حبيبتييييييييي..

بيبيييي= حبيبيييييييي..

ابببببه= أكبر.. وممكن تيجي الله أكبر.. حسب موقعها في الجملة..

تبببببه= كعبة..

باه= باي..

عمو= عمو الهندي بتاع البادي والنونو..

أتة= قطة..

بلِاَّاح= حلق.. محدش يسأل إزاي هو كدة..

اينه= عينه..

بوءو= بقه.. واضحة دي..

ادو= خده..

اجه= رجله..

اعوه= شعره..

دوادودو= الدوا الشرير..

ناننه= مية..

دوووووببببب= دب..

بيليبيلب= فلفل.. هو كدة ولا نفس

طاطس= بطاطس..

لولو= جزر.. بس ماما بتقولي جزرورو..:D

آنة= برتقانة..

اووووس= موز..

خكوخكة= فرخوخة..

ايييييس= عيش..

اللوووووء= الشغل..

ءااااااابببببب= سكراب.. خبيرة تجميل طبعاً

ءامبو= شامبو..

اونة= لو في المطبخ تبقى لمونة لو في الحمام تبقى صابونة..

نااااااسسس= أي قرآن أسمعه يبقى سورة الناس.. هو كدة بلطجة بقى..

لولالولا= أغنية ديمة الاولى..

ءاتة= أغنية شحاتة في كراميش..

اوتة= أغنية رغودة..

أنسس= الاسم الوحيد اللي بنطقه صح.. وأنس ده واحد صحبي انتو متعرفهوش :P

ابقو اتكوا أوي على الحروف عشان تنطقوها صح زيي .. هع هع هع هع

ومازال التهييس مستمراً..

ولسة بقى لما ندخل على الجمل.. هتبقى مسخرة ......

لغاية دلوقت الكلام ده بيطلع قطاعي.. مفرد.. فرط.. بس حاولوا بقى تركبوا الجمل وقولولي النتيجة ههههههههه

لجمالك سيدتي

المقادير:

- علبة زبادي.

- معلقة أطفال (هنرميها بعدين عشان هنستعمل الإيدين).

- وجه طفولي بريء.

الطريقة:

- لازم في الأول نخطط للموضوع من بدري شوية إننا نخلي ماما تعتقد إنك كبرتي وبقيتي حلوة وممكن تاكلي زبادي لوحدك بالمعلقة.

- خلي ماما في المطبخ مش واخدة بالها.

- خدي علبة الزبادي والمعلقة واقعدي في أوضتك اتفرجي على طيور الجنة.

- شوية كدة وخلي ماما تدخل عليكي لما متسمعش حسك وتبقى متأكدة تماما إنك اكيد بتعملي مصيبة، وخليها تفاجئ بالمنظر ده:

كيفية وضع ماسك الزبادي على الشعر بكل سلاسة

- طبعا هتتاخدي من قفاكي على الحمام.. عااااااااادي ولا يهمك متخافيش كلها حاجات بسيطة وبتحصل يعني..

بعد الرجوع لمكان الجريمة .. قصدي بعد غسل الشعر بالذوق بالعافية لازم تغسليه طبعاً

- تسرحي شعرك عاااااااادي خالص بالمشط بعد ما تكوني جننتي الست وجرتيها وراكي الشقة كلها.. وهيكون ناعم كالحرير

هنا سيدتي أصبحتي ولا الأسطة أونكل عزت يا نور النبي ..

الحلوة دي قامت تعجن في العصرية :))

السلام عليكم ورحمة الله وبركاته
عيطنا كتير البوست اللي فات واتشحتفنا.. بس اوعوا اياكم حد ينسى الدعاء.. انا بحذركم أهو.. وقد أعجر من أنسر..
خلاص بقى..
نشوف شغلنا

دي عجينة بيتزا عادية جداً وعملت منها خلية المفاجآت
والباقي توست

المقادير:
- 2 كوب دقيق أسمر كامل بالنخالة أو الردة بتاعته
- كوب ونص دقيق أبيض
- 4 ملاعق لبن بودرة
- خميرة وسكر
- ذرة ملح
- نص معلقة محسِّن (موحاسين) خبز.. ويمكن الاستغناء عنه ..
- للعجن كوب ونص من السائل الآتي (لبن- مية- لبن رايب) اختاري من بين الأقواس
- معلقتين زيت زيتون ويمكن الاستغناء عنه أيضاً
- بيضة مضروبة بمعلقة لبن
- حبة البركة وسمسم للتزيين

الحشوات:
- بيض ببقدونس ومملح بالجبنة والكمون
- سجق مقطع ومستوي مع بصلة وفلفل أخضر ونص حباية طماطم .. عشان غالية..:P
- بيبروني مع حتت جبنة موتزاريلا لبنة وزعتر أو جبنة وزعتر أو حتى عبلة وزعتر مش هنختلف
- شكلي ما بدك الموجود في التلاجة حطيه
بس اوعي تحطي العيال

الطريقة:
عزيزتي حواء حطي المقادير كلها على بعشضيها ولتي واعجني (ارحمي المسكين شوية) وخدي وهاتي (مش كله هات هات) لغاية ما العجينة تلم في ايدك وتعمل كورة
ومش شرط كمية السائل تكفي.. حطي تاني لو حسيتي انها هتحتاج بس متستعجليش وتقولي طريت.. وبتلزق.. اصبري واعجني لغاااااااااية ما تلم
شوية زيت في الطبق اللي عجنتي فيه وتحطي الكورة وتغطيها ببلاستك وفوقيها قماشة عشان تبقى طرية وفي نفس الوقت تتدفى وتنفش
ساعة وافتحي عليها ولميها في بعض وابدأي شكلي..

عايزة تعمليها بيتزا ماشي..
عايزة تعمليها كايزر اوك..
عايزة تعمليها توست ميضرش..
عايزة تعملي خلية المفاجآت إليكِ سيدتي..
تكوري العجينة ويفضل تكون كور صغيرة.. وتجهزي طبعا صينية مدهونة بسيط أوي زيت
كل كورة تحطي فيها الحشوة اللي تعجبك وتقفلي عليها من تحت وتكوريها تاني وترصي في الصينية جنب بعضه جنب بعضه بس تسيبي مسافة صغيرة شوية عشان لسة هتخمر تاني ..

بعدين ترجعيها تاني المكان الدافي وتسبيها تلت كدة او نص حسب ما تلاقيها نفشت والكور لزقت في بعض

سخني الفرن وحطي فيها صينية فاضية وهي بتسخن..
وسخني شوية مية على النار..
بعد كدة ضيفي المية السخنة على الصينية السخنة اللي في الفرن السخنة (ربنا يعيذنا
وإياكم من حر جهنم)

ادهني الوش بالبيض ورشي السمسم أو حبة بركة أو ينسون أو كمون .. اللي تحبيه
نحطها في الفرن ونسيبها قيمة نص ساعة على حرارة متوسطة إلى مرتفعة..
لما تلاقي الجناب احمرت حلو..
افتحي الشواية من فوق شوية تاخد اللون ..
طلعيها حطيها على منديل مطبخ أو فوطة نضيفة وغطيها عشان متنشفش

السيد توست بقى .. تمسكي العجينة وتلفي فيها بين ايدكي على الرخامة.. تسحبي وتبرمي تسحبي وتبرمي .. عشان يعمل زي طبقات التوست جوة ويدخل له هوا..
انتي بتعجني العجينة عادي على الرخامة.. وتمطيها على الرخامة برضه.. وانتي بترجعيها بتلفيها في بعضها..
...وتفضلي رايحة جاية.. يعني تعجنيها وانتي بتلفي.. مش تلفي كأنك بتعملي رول عادي..
يارب تكون وضحت ..

وبعدين تحطيه في صينية مستطيلة بجوانب مرفوعة وتسبيه برضه يخمر وبعد كدة تدهني الوش بيض وتحطي اللي انتي عايزاه من حبوب وفي نفس ظروف الفرن القاسية تحطيه مع الخلية
وبالهنا والعافية

الملحوظات كالعادة:
- طبعاً الحلوة قامت تعجن في العصرية لغاية ما المعدولة قامت من النوم وفاقت وقررت.. ودي حاجة من متطلبات العصر.. ملناش فيها :D
- اوعي تسمعي كلامي في المقادير.. مش قلت لك قبل كدة أنا مش بتاعت مقادير..
- الحركة الجريئة بتاعت الصينية السخنة المية في الفرن السخنة لييييييييييه؟؟
عشان نضمن رطوبة الفرن والخلية متنشفش مننا.. ولو إنتي كيفة خبيز اعملي الحركة دي مع اي خبيز عيش أو فينو أو كايزر أو توست بتعمليه عشان يطلع طري
- للحصول على نتائج أفضل من دي الصراحة يعني ممكن تقللي سمك العجينة لو ناوية تبقى وجبة من غير ما تستعيني بغموس جنبها..
يعني تبقى طبقة العيش اقل في السمك والحشو أكتر.. عشان تحسي بطعمها.. إلا لو كنتي بتحبي العيش اكتر ..
- ممكن تتعمل بدقيق أبيض خالص وافتكر طعمه هيبقى أحلى بس دي أفيد عشان الألياف وكدة

هكلمه وأقوله والله لأقوله..

بسم الله الرحمن الرحيم..
السلام عليكم ورحمة الله وبركاته
وحشتني أوي أوي أوي..
ووحشتني قعدتي في بيتك فاضية مش ورايا حاجة غير دروسي وشغلي.. أقوم أنام أخرج أروح أجي.. إنت عارفني وواثق فيا ومخليني براحتي وعارف إن حد الله بيننا هو الرقيب
وحشتني ولا عمري فكرت ولا تخيلت إنك هتوحشني كدة..
وحشتني قعدتنا مع بعض نحكي ونشكي ونتناقش ونتخانق وناخد رأي بعض..
وحشتني فرحتك بيا لما كنت أصحيك لصلاة الفجر.. فاكر لما شجعتك تنزل تصلي في المسجد وأنا عارفة إن السلم بتاعه متعب ليك.. ورجعت لي متعور.. اخص عليا.. بس بصراحة كل ما افتكر اضحك.. :D..
وحشتني وانت بتتخانق معانا عشان الصلاة في وقتها.. ولا لما قاطعت القعدة والأكل مع اللي مكنش بيصلي ..
وحشتني وانت عايزنا نسرح لك شعرك ونوضب لك هدومك قبل الصلاة.. عشان رايح تقابل ربنا وهو احق إنك بتقابله في أحسن حال
وحشتني وإنت قايم يوم الجمعة قبل الشباب الصغير وتغتسل وتظبط نفسك وتنزل تجري على المسجد ومتستناش حد عشان تلحق الجمعة من أولها مش من تاني ركعة فيها زي إخوانا اياهم :))
وحشتني خناقتنا على كوي البيجامة قال ايه عشان تنام بيها.. أو عشان تسرح شعرك قبل ما تنام.. بقى يا راجل حد يسرح شعره قبل ما ينام..
اه وليه لأ.. عشان عايز تقابل ربنا وانت جميل..
وحشتني خرجتك من البيت وانت على سنجة عشرة ولا وإنت رايح أي فرح.. اللي يشوفك يفتكرك العريس.. ولما نحب نطلسأ ولا نعمل أي كلام.. تقولنا لاااااا.. الراجل اللي يطلع من بيته مبهدل الناس هتقول مراته هي السبب :))
وحشتني وانت قايم بالليل تصلي لوحدك.. مع إنك كنت بتصحيني بصوتك وأحيانا ببقى عايزة اقوم أقولك ارحم نفسك وارحمنا بقى ونام.. بس وحشتني..
وحشتني وإنت بتشجعني على المذاكرة وعايزني أطلع معيدة وفي سلك التدرييس في الجامعة..
أي نعم أنا خيبت ظنك.. بس والله جربت ومقدرتش.. ما انت عارفني أنتوخة..
وحشتني وانت بتتخانق مع العيال عشان مش عايزني أركب العربية واتعلم السواقة.. شجعتني وخلتني زغبن عنهم اركبها وأسوقها.. حتى لومكنتش طلعت رخصة لغاية دلوقت بس سوقتها (هييييييييييه)
وحشتني وانت مش يائس وعايز تعمل اللي في جهدك وأكتر منه ولا هامك تعبك ولا هامك اللي حواليك (رغم ساعات بتغيظنا)
وحشتني وانت قايم من النوم بدري وتقوم البيت كله عشان تلبس وتنزل تروح الكلية قبل حتى ما الطلبة بتوعك يصحوا من النوم.. عشان عايز تبقى هناك قبلهم ومتأكلش عيالك من حرام..
وحشتني وانت نازل من البيت وانت تعبان حتى الأيام اللي محدش بيروح عشان ترضي ربنا وترضي ضميرك..
وحشتني وإنت قاعد مش وراك حاجة غير الأبحاث والشغل وإنت عارف وإحنا عارفين إن تعبك بيجي من هنا.. بس ولا هامك.. هي دي راحتك..
وحشتني وانت بتعافر في الدنيا .. لما عملت زي الشيخ حسني في الكيت كات لما ساق الموتوسيكل.. ورحت انت وانت عارف ايديك مش هتساعدك وسقت العربية ومطلعتش منها غير وانت دافع للعمارة اللي وقعت شجرها الشيء الفلاني.. هههههههه..
وحشتني وانت بتشجع أخويا بعد جاب العربية عجينة أنه يركبها تاني وتالت ورابع لغاية ما طلع العقدة..
وحشتني بتجري هنا وهناك وانت متأكد وموقن إن الرزق بيد الله لكن عارف إن عليك السعي وليس عليك إدراك النجاح..
وحشتني وإنت بتفكر في مشاريع يمكن تبان خيالية.. بس اديك بتفكر..
وحشتني وإنت قانع وراضي بس في نفس الوقت مش ساكت ولا متواكل..
وحشتني وانت بتغيظنا وتشغل الطيبة مع الناس اللي متستاهلش عشان إنت بتعامل ربنا في الآخر مش الناس.. وعايز ده يقعد في عيالك..
وحشتني وانت بتبكي (رغم ساعات بتزودها) بس دي علامة القلب الصاحي والإحساس اللي في نطاق الخدمة مش مرفوع.. :))
وحشتني وانت بتناكف فيها وإنت عارف ومفيش مناسبة بتيجي غير وبتفتكر وقفتها جنبك من غير ولا نفس.. وعارف إنها حتى لو نفست بيبقى في العيال مش فيك.. ههههههههههه
مش لاقية زيك..
الشباب الورور بقى يا إما دنيا يا إما دين..
حد بيجري اوي على رزقه اللي مش هيجيله أكتر من اللي مكتوبله ..
والتاني واخد جنب وساكت .. مالوش فيها..


وحشتني أوي يا أبويا يا حبيبي..
والله حبيبي.. ربنا يخليك ليا ولا يحرمني منك أبداً ويرحمك إنت وأمي ويغفر لكما كما ربيتماني صغيرة..
ويسبغ عليكم الصحة والعافية.. ويبارك لكم فينا.. ويفرحكم بيا وبإخواتي ويقر عينكم بينا.. ويجمعنا وإياكم في الجنة

فخذة تيس- الجدي

هنبدأ بسم الله الرحمن الرحيم بحاجة كدة خفيفة عـ المعدة
بجد وبحق وحقيقي

فخدة تيس (اللي هو الجدي)

تجيبي الفخدة (بتكون صغيرة مش كبيرة يعني) بس ما شاء الله بتكفي يعني
وتتبليها ملح وفلفل وبهار حلو (اسمه بالإنجليزي all spice)
بشر قشر الليمون وانا أضفت بشر قشر البرتقال عشان الزفارة طبعا) وشوية زنجبيل وتعملي مساج للفخدة..
تقطعي بصلة جوانح رفيع اوي وعليها التتبيلة بتاعتها مع خل وقرفة ودبس الرمان (اختياري) بجانب اي بهار تاني وتمسجي برضه الفخدة
وممكن بقى دي تجهز من بالليل ف التلاجة

تطليعيها قبل العزومة ب3 ساعات وتجهزي خضار مقطع مكعبات كبيرة
جزر- بطاطس- قرع- كوسة ممكن- طماطم للون
قلبتهم في بعض بشوية ملح وزعتر وورق لوري (الغار) وفلفل وشوية زيت زيتون
وحطيتهم معاها في الصينية وشوية مية وورقة فويل من فوق وهوووووووووب في الفرن وانسي بقى يا حاجة..

ممكن يتحط كل ده في كيس فرن مش هياخد الوقت ده..
بالفويل اخدت تقريبا ساعتين ونص .. بس طلعت اللحمة مفصولة عن العضم واللحمة على راي ماما زي الزبدة

وبالهنا والعافية

ملحوظات صغيرة كدة:
- مش هتلاقي عندي معايير ولا مقادير.. كله كدة بالتقدير.. يمكن الحلويات لكن أغلب الأكل على حسب المزاج وذوق اللي هياكل..
- لحم الجدي او التيس زي ما بيقولوا هنا لحم طيب المذاق ورخيص وأصح بمراحل من اللحم الضاني يعني متخافيش على الميزانية ولا صحة الولاد..
- الخضار برضه هنا على حسب ذوقك إنتي واللي هياكل.. وهي فرصة حلوة للولاد تغيري شكل الخضار وطعمه وتحطي حاجات مفتكسة تفتح النفس
- باقي الخضار اللي يفضل بعد ما اللحم يتنسف اوعي ترميه.. في خلاط وشوية مية صغيرين او شوربة واهرسيه واعمليه شوربة وحطي عليه شوية ليمون ومعلقتين كريمة لباني أو حتى من غير كريمة وهتلاقي شوربة جديدة مختلفة ولذيذة وصحية كمان..

بدايات المزاجات

السلام عليكم ورحمة الله وبركاته
بعد طول انقطاع وتدوينتين كئيبتين
ورمضان وعيد وانقباضات وانفراجات
رجعنا بالمزاجات...

طول عمري معتقدة إن المطبخ ده مزاجات والتشبيخ ده نفس..
وعايز دماغ عالية ومزاج صافي ونية طيبة (أهم حاجة النية دي)

وعشان كدة هحاول انزل هنا بعض الوصفات اللي انا عملتها شخصياً بمزاج.. وده طبعا مع وجود تاوتاو هانم خاتون بيكون في الاعياد والمناسبات العامة والأجازات الرسمية فقط..
يعني محدش يفتكر إني حاطة السرير في المطبخ ووبقوم أغسل وشي على البوتاجاز :D..

لااااااااااااااااا.. ده أنا ست مين يطلسأ وحط من ده على ده.. تطلع أكلات ولا ليها علاقة بالموروث الشيعبي
ده اتجاه جديد في المطبخ العصري الحداثي التقدمي..
بس هنا هحاول أكون كلاسيكية شوية.. مفيش مانع من إضافات حداثية بس بسيطة يعني محدش يقلق.. :))

نبدأ على بركة الله

حبة صغيرين يارب أعرف أكمل بيهم

سلبية
استسلام
خنوع
استسهال
يأس
انهزامية

كدة مينفعش

قهر
عجز
هم
حزن
تعاسة
انهيااااااااااااااااااااااااااار

حبة برود يارب أعرف أكمل بيهم

اللهم إني أعوذ بك من الهم والحزن، وأعوذ بك من العجز والكسل، وأعوذ بك من العجز والكسل، وأعوذ بك من العجز والكسل
وأعوذ بك من غلبة الدين وقهر الرجال
وقهر الرجال
وقهر الرجال

ده أنا كنت بيضة وحلوة وصغيرة.. ايه اللي حصل؟

السلام عليكم ورحمة الله وبركاته

طبعاً لا كنت بيضة ولا حلوة .. بس أكيد يعني فسيولوجياً كنت صغيرة زي أي حد..
القصد إني كنت معقولة.. كويسة.. بريئة.. في محيطي الآمن.. فالمعدن الأصيل مظهرش..
طبيعي يعني .. واحدة عايشة في بيت أبوها مع عيلتها وبعض من الأصدقاء المقربين اللي كانت العلاقة ما بينهم لا يمكن تسمح بأي نوع من المشاحنات ولا الخناقات ولا الخلافات ولا الزونب ولا أي حاجة وحشة.. والأقارب الحمدلله علاقات لا بأس بها.. حتى في وجود مشاكل بين الكبار.. الصغار ما اييييييييه؟؟ برافو.. ميدخلوش.. دي حاجة ودي حاجة..
ومن نشاط لنشاط.. كان الواحد عايش حياته للأمانة وكان عنده أمل في ربنا إنه لو قبضه هيكون إن شاء الله على خير..(صحيح كله في علم الله وتحت رحمته) بس فعلاً كان الواحد بعيد عن الكبائر وأغلب اللمم مش كله طبعاً.. وكان الواحد عشمااااااااااان أوي أوي أوي..

طبعاً دي مش حياة.. البمبي دي مش موجودة غير في فيلم أميرة حبه هو.. وفي الآخر برضه اتقلبت كحلي على دماغهم..
لا علينا..
الحياة بتتغير والإنسان بيتغير وبتدخل عليه عوامل جديدة وبتمر بيه تجارب جديدة مع أشخاص جديدة في الليلة الجديدة (غالباً قلبت على مليجي أخو أوشة) الناس دي بقى والتجارب دي بتطلع اللي كان مستخبي في الواحد ومكنش ظاهر لعدم وجود سبب لظهوره..

مش عايزة اطول الخلاصة إن اختكم امة الله الفقيرة إليه طلعت ايه في الإمتحانات الجديدة دي؟؟
فاااااااااااااشلة مع مرتبة الشرف..

يعني همة واقعة.. ولو اتكلمنا بصراحة مش عايزة تقوم..
كسل مرضي..
سواااااااااااد كحلي من جوة.. من هنا مش حلو خالص.. مش بتنسى وقلبها ايسسسسسسسسسسود
عندها تدعي على اللي أذاها أحسن من إنها تدعي له بالهداية ودي طبعا مش من صفات المحسنين
اللسان زاااااااااااااااالف وعايز قطعه.. حتى لو كان بينطق بالحق.. بس بعيد عن القارئين بيدبشه مش بينطقه..
عصبية غير طبيعية وللأسف ملهاش عذر.. يعني حتى موصلتش لدرجة الجنون حيث يرفع الحرج في العقاب..
سوء ظن لأقسى درجة وخصوصاً مع أصحاب السوابق لأ ومش كدة وبس.. سوء الظن ده بيتبني عليه حوارات وقرارات.. حتى لو صح بس برضه مينفعش الواحد ينساق كدة ورا سوء ظنه حتى عشان نفسه متتعبش.. بس نقول ايه بقى سوااااااااااااد والعياذ بالله
حب النكد.. ولو انه مكنش لها تقل عليه.. لكن دلوقت بقى من لوازم الحياة اللي لو غاب شوية تنكش عليه بإبرة وتجيبه وتطبطب عليه..
واييييييييييييييييييه..

من الآخر حاجة تجيب المرض.. وهو ده اللي حاصل.. عيشة ضنك..
نفسياً واقعة..
إيمانياً ضايعة..
اجتماعياً بتحاول تتعايش بما تبقى لها من حياتها السابقة..
فسيولوجيا.. مفستكة طبعاً من كتر الغليان اللي جوة بتحس بحرقان في معاميعها ..

حاجة مش طبيعية أبداً..

اعترف اني من الناس اللي بتحب اللمة
أهو حد يشد من هنا وحد يهزأ من هنا والحياة كانت ماشية وجميلة.. دلوقت الواحد بيحس انه لوحده محدش حتى موجود يهزأه على الحال اللي وصلها.. فوقعت..

فوضت أمري إليك يا رب.. هتسيبني؟؟
طب أروح فين؟؟
مفيش مكان..
مفيش حد..
أعمل ايه لو موقفتش جنبي؟
لو مصفتش نفسي أول حد هيتأذي أنا مش حد تاني..
وهو ده اللي ابتدا يحصل..
يقيني فيك كبيييييييييييييييييييير وعشمي مالوش آخر انك هتصلح لي حالي مع نفسي قبل ما تصلحني مع غيري..
يارب ألحق قبل ما أقابلك.. عشان لو مكنش كدة مش هشوفك.. ويبقى خسرت أي وعزتك وجلالك خسرت

ياااااااااارب.. آت نفسي تقواها وزكها أنت خير من زكاها.. أنت يا ربي وليها مولاها.. لك مماتها ومحياها..
ياااااااااارب لا تكلني إلى نفسي طرفة عين ولا أقل من ذلك.. انا مش عايزة ابقى مع نفسي.. خليها معاك يارب.. معايا هتضيع والله.. والله هتضيييييييع

بين غفلة وإفاقة.. وبين وكسة وانتكاسة

لا الموضوع مش عن نكسة 67 ولا وكستنا اللي مش عارفين نطلع منها لغاية دلوقت

دي حياتي من ساعة ما حملت..
أنا سبت تاوتاو ترغي كتير.. ادونا فرصتنا بقىىىىىىىى..

عايزة أتكلم عن الأمومة.. ومش من ناحية سيد الحبايب يا حناناننتا لأن كله بيتكلم عن الناحية لدرجة اني حسيت انها كدبة أو وهم الستات بتحب تعيش نفسها فيه..

أنا عارفة اني مجرد ما أنام وأصحى وتاوتاو تقعد تلعب هرجع اغنيها بس برضه.. هسجل اللحظات دي..

دلوقت السؤال بيقول: هل المرأة كائن سادي؟؟
ج: بعد خبرة سنتين حمل وولادة ورضاعة بقول نعم 1000 مرة
بتحب تعذب نفسها.. بدليل إن الواحدة رغم ألم الحمل ووجع الولادة وما بعد الولادة بتصر تعيدها تاني وتالت ورابع وعاشر.. سبحان الله.. اكيد له حكمة.. وسبحان الله اللي أنعم علينا بنعمة النسيان فعلاً..
والله لولاها كان زمان البشرية انقرضت.. سبحانه كل شيء عنده بمقدار

أما إنها بتحب تعذب الآخرين فدي مش مشكلتي دلوقت.. بس يعني بديهي واحدة بتحب تعذب نفسها فعادي يعني لو عذبت الآخرين..

البنت دي طلعت مني حاجات أنا لا يمكن أتخيل إنها كانت تطلع مني لو عملت ايه.. وحولتني برضه لشيء الصراحة انا كارهاه..
(طبعا الكلام ده بحسه في اللحظات الغامقة وما أكثرها) حيث ان لحظات الفرفشة بقت أقل بكتييييييير..
ما انتو خليكوا مطرحي واحدة كل همها في الدنيا انها تنام كويس ومتواصل.. تيجي منين الفرفشة والنعنشة؟

أنا كنت قبل الجواز نشيطة جداً وبروح وباجي وبعمل وبسوي.. (وفي حد قر ليا قرة جامدة يعني) الله يسامحه..
تحولت لواحدة بروطة بمعنى الكلمة..
الذاكرة بقت حضيض.. بقيت بفتكر الحاجة اللي لسة متقالة قدامي بالعافية..
الصحة بووووووومب بس مفرقع.. :(( التهابات اعصاب في كل حتة فيك يا جسمي.. بتعب من أقل مجهود.. مفيش داعي اتكلم عن الوزن الزايد..
المزاج.. اغلب الوقت معكنن والسبب معروف طبعا..
الزوج الله يكون في عونه والله يسامحه في نفس ذات الوقت..
القرآن .. سيبت حفظه.. يا دووووب الورد بالعافية لو عملته.. ودي من اكتر الحاجات اللي مأثرة فيا بجد..
ماهو طبعا واحدة بقت بروطة.. ذاكرتها ميح.. كل همها انها تنام.. تحفظ ايه دي ولا تروح فين ولا تعمل ايه؟؟
حتى الصلاة .. مع البنت دي عرفت يعني ايه اركان الصلاة وفروضها.. كان زمان الواحد يصلي الاركان والزوايا والحيطان وكله ويصلي الفروض والنوافل والسنن المؤكدة والغير مؤكدة.. دلوقت بحمد ربنا لو صليت الفروض بس .. الحمدلله موصلتش لدرجة اني اصلي بالفاتحة بس وهي أدنى حاجة.. الحمدلله بقرا بعدها حاجة صغيرة.. الحمدالله الحمدلله
ده ربنا يستر على الواحد وتقصيره

طلعت من جوايا شخصية صوتها عالي لأقصى درجة.. وبعد ما كنت متفقة مع نفسي اني مشتمهاش ولا ادعي عليها.. حتى لو قلت لفظة دعاء أحولها في ساعتها على الشيطان واليهود والكفرة والمشركين ومفيش مانع الحزب الوطني..
بس بقفش نفسي في لحظات كتير ان الشتيمة ولا الدعوة بتيجي فيها (بستغفر ربنا في ساعتها ومفيش يمكن خمس دقايق واعيد الكرة ويا يتيجي يا متجيش)

أنا اتجننت خلاص.. صح؟؟
قولوا لي الحقيقة .. محدش يخبي عليا..
نفسي في هدنة.. وقفة مع النفسي..
سيبوني بس مع نفسي شوية وأنا هقف بس سيبونييييييييييييي
أنا وصلت لمرحلة إني كارهة نفسي.. بجد مش هزار.. حتى لو شعور مؤقت بس بكرها اغلب الوقت..

طب ليه كدة..
مين بقى اللي ضحك عليا وقالي دي احلى حاجة في الدنيا الأمومة؟؟

هي لحظات وبتتبخر مع أول زنة.. سبحان الله دي منة من ربنا ان الستات تنسنى اللي بيحصلها معظم اوقاتها .. لأ وتتمادى في النسيان لدرجة انها تضحك على نفسها وتخلي اوحش الأوقات وكأنها لحظات لا تنسى من حلاوتها..اما كائن سادي صحيح..
أنا حتى لحظات الرضاعة اللي بيقولوا عليها أحلى لحظات تجمع الطفل وأمه .. كانت اتعس لحظات حياتي كلها عياط وتوجع وتأوه.. قرف قرف يعني.. ولغاية دلوقت .. وارجعوا لتاوتاو وهي بتحكي عن العبر والمواعظ وانتو تعرفوا غلطة من غلطات عمري اللي بتعاقب عليها حتى الآن..

وكل ما اقول خلاص دي كبرت وبقت حلوة واتظبت.. نرجع تاني للغلب من أول وجديد.. ما نصدق نطلع من نقرة.. الاقي نفسي في دحضيرة.. وشكل الحالة هتستمر على كدة.. سترك ياااااااااااااارب



رحمتك يارب.. عايزة مخرج لنفسي من نفسي..
ارزقني همة ترفعني.. واهدي بنتي واهديني ليها وعليها..
يارب حسن خلقي..يارب الصبر من عندك يا رب..
يارب تعبت من البعد.. تعبت من الكسل.. تعبت من العجز.. أعوذ بك يا رحمن يا رحيم..

انا بتكلم دلوقت وانا مخنوقة ومضايقة وتعبانة وقرفانة وكووووووووووول ده هيتبخر مجرد ما أنام كويس وأقوم ونبدأ نلعب من تاني..
وعارفة إني يمكن على السنة الجاية تلاقوني عاملة مدونة لابني ولا بنتي التانيين .. مش بقولكم كائن سادي!!!

عليا وعلى أعدائي

كدة كدة الواحد عايش في مهانة وكسفة وإحراج وماهياش عيشة السلام اللي بتكلم عنها كل خاين من خونة العرب وبيتحججوا بيها عشان ميقفوش قدام اسيادهم الصهاينة..
طيب مستنيين ايه؟؟
مش نقوم بقى
وعليا وعلى أعدائي..
الأتراك واقفين ومطوقين الصهاينة الكلاب في سفارتهم هناك.. يارب قويهم والهمهم يطلعوا عليهم طلعة واحدة يخلصوا عليهم ولاد الكلاب دول..
ويبقى يجي حد من كلاب الحرية يقول قتلوهم وهم عزل
الاسرائيلين المزعومين دول كلهم محاربين وحلال فيهم الدبح بسكينة تلمة كمان..
مش هتكلم علينا في مصر.. لان زي ما اتفقنا مصر سكوتها احسن ميت مرة من كلامها.. ربنا يستر بس ومتقومش كالعادة تعكها وهي مش ناقصة.. كفاية البلاوي اللي فينا..
دا احنا ربنا يعلم بحالنا..
في هوان اكتر من كدة اييييييييييييييه

اعمل ايييييييييه؟ اعمل اييييييييييه؟

عايزة اعمل حاجة مش عارفة..
نفسي اصرخ ..
اروح هناك..
ياربي يعني خلاص مفيش فايدة.. كل شوية كدة صدمات
أنام وأقوم على اخبار ضرب وتقتيل وكل مرة اللي بيضرب واحد واللي بيضرب واحد.. بس المرة دي تفوقوا وانتقلوا لمستوى تاني
وبرضه كل مرة رد الفعل واحد..
شجب وادانة ولما يضربهم السلك يبقى سحب سفير أو استدعاءه..
طب وبعدين.. دي تفة وسط بحر.. ده على راي شيخ لو احنا المصريين بس تفينا كل واحد تفة هتغرق..
يعني مشروع دولة..لقيطة .. جاية من لا شيء تعمل كدة في العالم كله...
ياااااااااااااارب.. انا كان عندي أمل
بس أنا غلطانة انا كنت بقول خلاص مفيش فايدة ومستنية النهاية اللي ربنا وعد بيها..
بس غصب عني انسانة وبحلم وكان عندي تخيل الدنيا تقوم بقى على حيلها على الاقل ترد على السفالة دي ..
بس كالعادة.. ااااااااااااااااااه يا جيل طلع على هزيمة وقهر وعدم كرامة..
نفسي تحصل حاجة واحدة بس حلوة وانا على وش الدنيا..
جيت وهمشي وأنا هواااااااااا..
يارب طب انت شايفنا ازاي؟؟
هتحاسبنا على كدة وهتعمل فينا ايه؟؟
يارب والله غصب عننا
يارب رحمتك.. اغفر لنا تقصيرنا..
يارب كن معاهم هناك ومع كل مظلوم بياخد حقه.. ومع كل واحد بيساعده ياخد حقه
ياااااااااارب اقصم كل ظالم .. وكل اللي بيعاونه على ظلمه
ياااااااااارب يااااااااااااااااارب
حسبنا الله ونعم الوكيل

هسسسسسسسس.. محدش يتكلم لمصر تصحى وتعك الدنيا

السلام عليكم..
طب ينفع الكلام ده؟؟
بصراحة اه ينفع..
أنا أتمنى ان مصر تفضل نايمة كدة وعاملة عبيطة أحسن ما تقوم وتبهدل الدنيا كالعادة وخصوصا مع خطيبها المفوه السيد أحمد أبو الغيظ
يارب القافلة بكل من فيها وما عليها يوصلوا غزة بالسلامة ويسلم طريقهم ربنا من كل شر ومن كل خائن ومن كل عميل ومن كل معدوم عزة وكرامة ورحمة .. قادر يارب على كل شيء..
أنا كل خوفي دلوقت أسمع الخبر ده
(قامت القوات البحرية المصرية بأبنائها البواسل بقذف أسطول الحرية المتجه إلى غزة وذلك في حملة وطنية للحفاظ على السيادة المصرية على حدودها البحرية مع شقيقتها إسرائيل)..
والله نفسي أكون بهيس.. بس كام مرة حصل الكلام ده قبل ويخلوا راسنا في الطين قدام ربنا أولاً.. وقدام اخواتنا في غزة؟؟ كام مرة؟؟
انا عارفة ان فيه ناس هتوافق وهيقبلوا ده بحجة اننا مش حمل حد يحاربنا.. وهيقولك واحنا مالنا ومالهم دول اولهم فلس وأخرهم طين (والكلام القديم إياه) وهيقولك احنا في معاهدة ولازم نحترم المعاهدات.. وإننا وقعنا اتفاقيات وده قانون دولي واحنا لازم نحترم الأنون..
بس الناس دي كلها وبكل اللي بتقوله اقولهم وبالفم المليان.. اخصصصصصصصصصصصصص..
وكمان جاتكم خيبة..
حرب ايه دي اللي مش عايزين تدخلوها اسم الله على النعيم اللي انتوا عايشين فيه..
وانون ايه اللي لازم كلنا اييييييييييه؟؟ نحترمه.. اومال ست الستات اسرائيل مابتحترموش ليه.. ولا هي تحترم اللي على مزاجها واللي مش على مزاجها ترميه في المنور كدة من غير لا خشى ولا حياء؟؟

على العموم الكلام ده سابق لأوانه ولو اننا عايشين فيه بدليل ان مصر هسسسسسسسس.. واسرائيل (الله يخسف بيهم الأرض) بيستعدوا.. وهنشوف حليف اسرائيل الاستراتيجي الأول في المنطشقة هيعمل ايه؟؟

يارب سلم .. يارب سلم.. يا رب سلم.. وقبل ما يحصل حاجة كدة يتقطع لسانه اللي يدي أمر بحاجة زي دي..

قرار إزالة

قرر بنات الإسلام- حفظهن الله- بموجب قانون رقم 31 في سورة النور.. وغيره من الإثباتات والتاكيدات السنية.. قررن إزالة الأدوار المخالفة والتي تم بناءها على رؤوسهن منذ حوالي عقد من الزمن والتي استمر بناءها ويستمر ويعلم الله إلى متى كانت ستستمر..


ياااااااااااااه .. نفسي أشوف القرار ده بيتنفذ ماهو بجد بقى مش ممكن اللي الواحد بيشوفه ده.. هي مسابقة عمارة ولا ايه؟
سواء أخواتي في الخليج اللي راسهم كنت أول مرة أشوف يعني إيه أسنمة البخت.. وكنت الأول مش فاهمة لما الرسول عليه الصلاة والسلام بيحكي عن: صنفان من أهل النار من أمتي لم أرهما بعد : نساء كاسيات عاريات مائلات مميلات على رؤوسهن مثل أسنمة البخت لا يدخلن الجنة ولا يجدن ريحها.. ربنا يرزقنا وإياكم الجنة..
كنت بقول كاسيات شفناهم.. عاريات شفناهم.. مائلات شفناهم.. مميلات شفناهم.. فكنت متخيلة إن أسنمة البخت دول اللي بيرفعوا شعورهم وعاملين موظامبليط، طيب اشمعنى ماهم كدة كدة مش لابسين الحجاب.. اتاري لأ.. ده دول اللي لابسين حجاب، وكنت أول مرة أشوفهم بقى.. حاجة - ما شاء الله- ربنا يهدي..
وأخواتي بقى في مصر.. وحباااااااااايب مصر.. اللي بقوا بيحطوا على راسهم كمية قماش أكتر من اللي لابسينها على جسمهم..
طب ليه يا ماما كدة.. هي راسنا كجنس قوقازي ناقصة كبر مثلاً؟.. ولا مثلا بيتبني بطريقة عملية إن دماغك كبيرة وضرباها طناش؟ ولا ايه العوبارة؟؟
ولعلمكم بقى مافيهوش شياكة ولا حاجة.. بالعكس شكله بيئة طحن..
ويا إما كدة يا إما ضاربة حتة قماشة لا تغني ولا تسمن من جوع والودان باينة (عشان الحلق طبعا جايباه من داماس فرفشة ولا لازم يبان) والرقبة كمان باينة (اومال تبين الحلق وتحرم الكوليه من الظهور) وهلم جرجر..

هو انا إيه حق حجابي عليا.. ومش بتكلم عن حجاب القلب - على رأي مفتيات ماسبيرو وهوليود الشرق-عشان ده الكلام عنه بديهي ورغم إننا كلنا بناكل حقه بس في الآخر عارفينه ومؤمنين بيه وربنا يهدينا يهداه.
أنا بتكلم عن المظهر.. بصي يا ست البنات وياست الستات
- يغطي مش يعري..
- ميكونش في نفسه زينة.. مش يكون أفتن للناس من المايو..
- يكون متواضع.. مافيهوش بهرجة ولا أضواء نيون..
- يكون نضيف ومكوي مش مبهدل.. عشان محدش يقولي ماهو لازم يبقى شيك عشان ادي صورة حلوة للمحجبات.. جميل جدا.. بس مش لازم يكون بروبروء عشان يبقى شيك.. ولا فوشيا في أخضر.. هو إعلان عن افتتاح ملهى ليلي؟؟!! الله بقى.. ليه تنرفزوا الواحد كدة..
- اللي ملبوس تحتيه يكون زيه كدة يعني يغطي ونضيف ومكوي ومتواضع ..مش الله أكبر لابسة عشر طبقات وأستيك ومن تحت لابسة الأستيك بس..

بس يا ستي.. الموضوع بسيييييييييييييييييط جداً.. بس عارفة انه صعب وان عليكي تجاري اللي حواليكي من مظاهر وتنافس .. يبقى الموضوع عايز جهاد نفس ضد النفس وضد شياطين الإنس والجن.. فادعي ربا يعلي همتك ويرشدك لرضاه.. وبكدة تكسبي رضاه- سبحانه وتعالى ورضا الناس..
وعلى فكرة محدش هينتقص من قدرك ولا من مقامك لو لبستي حجاب متواضع وجميل بالعكس.. ده من الصفات الجميلة للمسلم التواضع
ولو حبكتي معاكي بروبروء وترتر والماظات وتوك.. خليها في البيت.. مع صحباتك.. مع زوجك كدة يعني.. اتصرفي.. احنا مش محرومين ظهور.. بالعكس ابسولوتلي.. بس كله في أوانه ومكانه..

وربنا يهدينا ويهديكم.. وعجلوا بالقرار ده وبلاش نظام الرشوة بتاع الحي عشان يمشوا الموضوع.. مش هتنفع يوم السؤال.. وكله مسؤوووووووووووووول

بحبك وقادرة على بعدك

ايوة هي بنيلها وشمسها
بهواها اللي مليان بدخان قش رزها
بناسها اللي مبقتش طايقة نفسها
أيوة زعلانة منها .. وصعبان عليا أهلها
بحبها .. لكني قادرة على بعدها

هي مصر.. زعلانة منها أوي
بس ثواني..
بس هي مين مصر؟.. عشان على حسب هي مين هيكون الرد
لو مصر الحكومة.. يبقى في ستيييييييييييييين سلامة (والمعنى يظل في كرش الشاعر)
ولو هي الناس.. فبجد زعلااااااااااااانة منها وصعبانة عليا وفي نفس الوقت بقولها أحسن.. انتي اللي جبتيه لنفسك
ولو هي النيل والهرم والحضارة والعراقة والأصالة .. الخ .. الخ، يبقى أقولها ملكيش لازمة من غير ناس تحافظ عليكي وتحميكي.

بقالي كتيييييييييييير مش عايزة أتكلم ولا أعلق على حاجة من اللي بتحصل في مصر.. عشان أنا مش أد كلامي.. ولا في ايدي حاجة اعملها فهانضنضموا لطبقة الحنجوريين.. وخصوصا لما بقيت بعيد..
حاسة ان اللي يتكلم لازم يكون بيعمل .. مش كلام وخلاص..
لكن ساعات مش بيكون قدامنا غير الكلام فضفضة.. بس براءة من المسؤولية..
وانا الصراحة خلااااااااااااااااااااص مبقتش قادرة اسكت.. انفس طيب ولو بكلمتين..
بس بعدين بقى.. مش قلت لكم مش أد كلامي ولا هاين عليا أتكلم :(

اطبع وانشر ولك الأجر والثواب إن شاء الله

للطباعة هنااااااااااااااااااااااا

طفينا أول شمعة.. ضوينا تاني شمعة

السلااااااااااااااااااام عليكم..
أييييييييييييون.. عدت سنة بمرها ومرها

أوام كدة دا انا لسة مولودة امبارح.. لحقت ؟!!
سبحان الله
كانت كل لحظة في حياتي جديدة عليا معدتش قبل كدة .. من دلوقت أو بمعنى أصح من أول امبارح كله بقى قديم ومكرر .. بس على ميييييييييييين؟.. أنا بقى هخليه جديد بحركاتاتي وسكناتي وهمساتي ولمساتي وعياطاتي وصرخاتي

طبعا أنا مولودة الأربع والسنة دي جه الخميس.. يوم أجازة بابا .. هييييييييييييه..
وكانت فرصة كويسة عشان نعرف نحتفل بيه براحتنا ميبقاش وراه حاجة..
هتسألوا احتفلنا إزاي..
أقولكم أنا بقى..

زي ما قلت لكم انه كان اجازة بابا..
فصحينا الصبح ونزلت انا وبابا بس جبنا فطار جمييييييييييل.. وعمو الفران شحتني واحدة عجوية كالعادة :))
ماما بقى مش عايزة اقولكم كانت بتستعد ازاي..واااااااااااو..
رجلها اتلحوت تاني وجالها التهاب في الأعصاب لتاني اسبوع على التوالي وكمان بقى المرة دي ايديها قالت ميصحش رجلها تبقى لوحدها فجالها التهاب في ايديها كمان .. غلبانة الست دي.. عجزت بدري..
بفكر اخلي بابا يغيرهالي :P

المهم مطولش عليكم..
قضينا النهار زي الفل..
وبالليل بقى حان موعد الاحتفال..
ماما لبستني الطقم الجديد.. ورحنا ..
..
..
..
..
..
للدكتورة.. هاهاهاهاها..
عشان اخد تطعيم السنة..
أخدوني على خوانة..
عاااااااااااااا
بقى هو احتفالكم بيا يا خونة؟!!!
الله يسامحكم..

كالعادة شفت وش الدكتورة فتحت السارينة من قبل حتى ما اعرف انا هناك بعمل ايه..
والست يا عيني بقت تخاف مني.. وكانت عايزة تنادي قوات الأمن عشان تحوش..
واحتفالا بيا ما بدل ما تديني حقنة واحدة زي كل مرة ادتني 3 وكمان نقط في بقي.

وبس

أيوة وبس خلص اليوم كدة..
كان لازم نروح على البيت عشان أخد دوا السخونية وماما تعمل لي المساج مكان الحقن..
كان يوم جميل الصراحة.. بس للحق تيتة كانت بعتت لي كام اغنية كدة عشان تهنيني.. فماما شغلتهم ليا.. يعني عشان مزعلش..

ووعدتني لما اكبر شوية وافهم وميكونش فيه حقنة واكون عملت حاجة مفيدة في حياتي تبقى تعمل لي حفلة حلوة بهاااذي المناسبت العظيمت اللي هي شخصيا مش فاهمة انا دوري فيها كان ايه غير اني شقلبت لها حياتها هي وبابا :))
اهو دور برضه احسن من مفيش..وطبعا ابقوا قابلوني لو اتجمعت الظروف دي كلها قبل مثلا تلاتين اربعين خمسين سنة كدة.. يكون الواحد لحق يعمل حاجة مفيدة

وفي النهاية احب أقول لنفسي
حابي زرزر توتو.. حابي زرزر توتو.. حابي زرزر توتو يا تاوتاو حابي زرزر توتوووووووووو

براءة وسواسة في نفس ذات الوقت

تاوتاو: ماما.. هو بابا راح فين؟؟
ماما: خرج مع أصحابه يا توتا..
تاوتاو: ليه يا ماما؟؟

ماما: عشان النهاردة الأربع يا حبيبتي وده يوم اللقاء العزابي.. اللي بيحاولوا يمثلوا فيه انهم عزاب بقى ومش متجوزين ومش عندهم عيال حلوين وشطورين زيك يا تاوتاو :))
تاوتاو: طيب يا ماما حضرتك (أيوة أنا بنتي هتبقى مؤدبة وبتقول حضرتك) مش بتزعلي لما يسيبنا ويخرج لوحده كدة في آخر الأسبوع؟؟
ماما: لا يا توتا.. عشان بابا بيشتغل طول الأسبوع والمفروض يرفه عن نفسه شوية ويخلع منك ومن غلاستك ورخامتك شوية..عشان يقدر يرجع الأسبوع اللي بعده يشتغل حلو ومن غير ما يكون زهقان.. وتبقي يا ستي اديله الجرعة بتاعته مكثفة بقى خميس وجمعة مش مهم :P
تاوتاو: خلاص اتفقنا :)..

بعد شوية..

تاوتاو: ماماااااااااا..
ماما: نعم يا تاوتاو..
تاوتاو: طيب بابا لما بيقابل أصحابه بيعملوا ايه؟؟
ماما: مفيش يا قلبي.. بيقعدوا على القهوة..
تاوتاو (مقاطعة): بيقعدوا على القهوة ولا على الشاي؟!! هههههههه
ماما: خفيفة أوي يا مضروبة زي ناس :P
تاوتاو: لا بجد يا ماما.. بيقعدوا على القهوة بيعملوا ايه يعني؟؟
ماما: أهو بيتكلموا في أحوال الدنيا والشغل والجواز والعيال والألعاب.. ويقعد عمو أحمد طاهر يذلهم شوية وهو بيصورهم بالكاميرا اللي بيكون لها كرسي مخصوص في القعدة.. :)
تاوتاو: بس كدة؟؟
ماما: ايوة.. عايزاهم يقعدوا يعملوا ايه يعني؟؟
تاوتاو: مفيش بس فاكرة يا ماما لما تيتة كانت بتحكي لك ان جدو هو وأصحابه برضه كانوا بيتجمعوا كل يوم أربع؟؟
ماما: اه يا تاوتاو فاكرة.. ايييييييييييه.. كانت أيام..
تاوتاو: بس هي قالت انهم كانوا كمان بيتجمعوا يوم الخميس..
ماما: اه يا تاوتاو بس يوم الخميس كان تجمع تاني بيعملوا حاجة تانية ..
تاوتاو: ايه بقى؟؟
ماما كان كل يوم خميس.. نفس الشلة بنفس البنطلون بنفس القميص بنفس الجلابية يتجمعوا في بيت واحد فيهم عشان يقروا قرآن..
تاوتاو: كل يوم أسبوع؟؟
ماما: ايوة يا بنتي .. ماهو زي ما بيتجعموا عشان يتسلوا كان لازم يعملوا قاعدة يذكروا الله فيها.. وبرضه كان بعد ما يخلصوا تقلب دردشة كالعادة :))
تاوتاو: طب بابا ليه ميعملش كدة هو وأصحابه؟؟
ماما: معرفش يا تاوتاو والله.. كان نفسي يعملوا كدة حتى ربنا يبارك لهم في صحبتهم وغربتهم.. هو في أحسن من الناس تجتمع على ذكر الله!!
تاوتاو: طب يا ماما ما تخليكي جدعة وتقولي لبابا يقول لأصحابه ويجيوا كل يوم خميس أو أي يوم يعني.. وتعملي لهم حاجات حلوة ويقعدوا يقروا قرآن.. واهو بالمرة ..
ماما: بالمرة ايه يا تاوتاو؟؟
تاوتاو: مفيش أنا كنت بقول بالمرة يجيبوا لالا وبودي ولي لي ألعب معاهم.. يعني..
ماما: اااااااااااااااااه.. يبقى الحكاية حكاية لالا وبودي ولي لي.. مش حكاية ان بابا يجمع أصحابه في مقرأة..
تاوتاو: مش الفكرة بس يبقى ضربنا عصفورين بحجر لحد بس ما نكبر إن شاء الله وهتلاقينا ندخل معاهم في المقرأة على طوووووووووول..
ماما: أعتبر ده وعد يا تاوتاو؟؟
تاوتاو: أكيد يا ماما.. يعني تخيلي واحدة اتربت في بيت بتلاقي فيه ناس بتقعد تقرا قرآن وعمال له ورد ولو كل أسبوع هتطلع تعمل ايه؟؟.. رقاصة لا سمح الله!!!.. أكيد لأ يعني..
ماما: خلاص يا تواتيوو.. هقول لبابا ويشوف أصحابه وإذا كان عليا يا ستي أعمل لهم أنا قهوة في البيت كل أسبوع ومن غير ما يدفعوا كمان..

تاوتاو: ايوة يا ماما بس دي طبعا تكون غير خروجة العزاب.. معلش خليهم يتوهموا شوية انهم عزاب وشباب وكدة..
ماما: خلاص يا ستي تبقى غير خروجة العزاب.. بس توعديني يا تاوتاو.. انك تعوضي بابا عن رخامة الأربع خميس وجمعة .. ماشي يا حبيبتي؟؟
تاوتاو: من عونيا الاتنين.. هو أنا عندي أكتر منها .. )) نيهاهاهاهاااااااااا

تسعة جوة وتسعة برة.. دروس ومواقف.. علكم تستفيدوا

السلام عليكم ورحمة الله وبركاته..

أي نعم.. تسعة جوة وتسعة برة.. ده كل تاريخي في هذه الدنيا
بس خلاصة التجربة حسب ما ماما شايفة أنها مرييييييييييييييييييييرة .. سواء جوة سواء برة..
بالنسبة لبابا مش عارفة- كل اللي اعرفه انه بيلعب معايا 5 دقايق وألاقيه بينادي على ماما .. تفتكروا ده معناه ايه؟!!
اوعوا يغركم الصور واللحظات الحلوة اللي بتلقطها.. هي بمعنى الكلمة لحظات بتمر في يوم طويل عرييييييييض مدته 24 ساعة. لحظات صفا وضحك ولعب بتطلع من بين ساعات وساعات من الزن العياط والنكد.. ليه بقى؟!!
عشان ماما في خلال التجربة دي ارتكبت كمية من الأخطاء وصلتها للحالة دي وللنتيجة دي .. مع ان زي ما انتو شايفين اني نيييييييسمة :$

حسب كلام ماما أنا طلعت منها أوحش ما فيها من أخلاق وألفاظ ودعاء وأمراض- كفاكم الله الشر-
ماما كانت داخلة التجربة الزوجية بشوية فسافيس في وشها طلعت منها - ما شاء الله ما شاء الله .. باكزيما في جلدها- عصبية في قاولونها- قرعة في شعرها (من كتر شدي فيه)- حساسية في صدرها (كنت وبلا فخر سبب في ان يجيلها حساسية ربو وانا لسة عندي 5 شهور في بطنها) وبقت يا عيني متمشيش إلا بالبخاخ- غير شوية التهابات في اعصاب ايدها ورجلها.. وحاجات تيتة -مامتها- بدأت تجيلها لما عدت 45 سنة
وابقوا سامحوها ياللي عايزين خلف- أنا مكنش عايزة أقول لتقولوا عليا فتانة ولا حاجة- بس هي كل شوية كانت تقول.. بتقووووول.. جاتها نيلة اللي عايزة خلف.. وساعات جاتها ستين نيلة..
معلش سامحوها.. وامسحوها فيا أنا

نبدأ من أول ما كنت نطفة.. ودي طبعا حاجة محدش له دخل فيها.. سواء تعب ماما وارهاقها ورقدتها في أول الحمل.. او تقلها وظهور أمراض مكنتش ع البال ولا الخاطر.. وأنا مالي أنا ؟!! هو
أنا كنت عملت حاجة..
لا علينا..
نيجي بقى من أول الولادة..
برضه ماليش دعوة.. نيهاهاهاها.. هي تعبت .. طب وأنا مالي؟!!
أنا كل اللي كنت عايزاه اني أكل وأغير وأنام..
غلطش أنا؟
نبدأ بقى الشغل اللي بجد قولوا كدة من أول أسبوع مثلا!!
ماما كانت عاملة فيها بقى بتاعت التربية الحديثة والصحية وبلا بلا بلا..
وأخدت على نفسها عهد انها مترضعنيش غير طبيعي..
ومتعودنيش على سكاتة ولا بيبرونا ولا أي حاجة من الحاجات اللي بتنقل الأمراض دي..
قال ايه كدة هتحميني.. والله هو الحافظ
طبعا زي ما انتو ممكن تتوقعوا دي كانت غلطة عمرها.. وبقت بتضرب نفسها لا مؤاخذة (بالنعناعة) عشان طبقت حاجة مؤذية زي كدة وصاحب الشورة المهببة دي أخد منها دعا.. يجعله من حظه ومن نصيبه قادر يا كريم

اكتشفت ان في أشكال مينفعش معاها غير الإهمال والطناش.. وأنا من هؤلاء الأشكال :)
اللي حصل اني بقيت ارفض اخد اي نوع من انواع المرضيات والسكاتات غير الطبيعي منها (فاهمين طبعا) غير طبعا اني مبقتش اشرب أي سولئل بما فيهم المية غير نقط زي العصافير كدة.. ده غير ان أكلي بقى قليل جداااااا.. واكل ليه لما انا عندي بقرة 24 ساعة تحت الطلب..

مش هتكلم بقى على تاثير ده على ماما.. ربنا يكون في عونها وحسبها الله ونعم الوكيل
تطور الوضع وبدأت ماما تنيمني لوحدي من وانا 5 شهور تقريبا- طبعا ضحكت عليها ولا نمت لوحدي ولا حاجة ليه بقى؟؟
عشان كنت لازم أنام وأنا برضع يعني بنام وهي جنبي.. صحيح هي بتقوم وتسيبني بس على ميييييييييييين.. لازم كل شوية اقومها واخليها تجي لي بالليل.. اومال يعني انام كدة لوحدي.. بس برضه ارضع وانام وتسيبني واناديها.. وكدة بقى طول الليل لغاية الصبح..
أنا مبسوطة 24 قيراط وهي تصحى الصبح مضروبة -لامؤاخذة برضه- ب60 نعناعة..

الغلطة فين هنا؟!
انها مطنشتش برضه.. وانها محبتش تضايق بابا بزني كام يوم.. لغاية ما اتعود..
حصلت كمان غلطة جرت وراها واحدة كمان لما انا تميت 6 شهور وشوية لما بدأت ازحف..
انا اتعودت قبل ما انام لوحدي اني انام مع بابا وماما على سرير كبيييييييير.. فاخدت على الرحرحة.. ومكنش ساعتها ممكن نجيب سرير ليا عشان المساحة وكدة..
ربنا فتحها على بابا ونقلنا شقة اوسع وبقى ليا اوضة كاملة لوحدي.. فماما عملت لي سرير من الكنب لغاية ما يجيبولي واحد جديد.. في المرحلة دي اهلي لاحظوا اني بحب البراح لما لاقوني بتشقلب على الكنبة وصولا إلى الأرض في أكثر من حادثة..
فقالوا لااااااااااااا...
لا ممكن بنتنا تنام في سرير محوط وتبقى مخنوقة ومحبوسة كدة.. احنا نجيب لها مرتبة كبيرة على الأرض تبقى براحتها وتتشقلب دون حدوث أي اصابات..
وربنا فرجها بمرتبة زي الفل سبحان الله من حيث لا ندري ولا نحتسب.. المهم
كانت الغلطة الكبرى وانا استغلتها أسوأ استغلال.. خلاص بقى مبقاش في حدود لنزهاتي وحركاتي وتشقلباتي في البيت.. بقى مني للحمام.. للمطبخ.. لأوضة ماما.. لأي حتة في البيت..
صحيح ماما عارفة ان ده بينمي قدراتي الاستكشافية.. بس ده عمل عبء كبير عليها وعلى أعصابها لما تلف ورايا وتلمني من كل حتة في الشقة..
ده غير ان موضوع انها تعودني انام لوحدي تماما راح أدراج الرياح.. اصل يعني خليكوا مكانها أو مكاني براحتكم يعني..
ازاي تسيب طفلة بريئة زيي تنام لوحدها على مرتبة على الأرض في أوضة مختلفة مع العلم انها بتزحف وتتوغل وتستمر- وتمشي تروح اوضتها؟؟ طبعاً مفيش ثواني تسيبني تلاقيني في ديلها من غير عياط ولا دياولو..


لكن لو كانوا عملوا زي الناس وحوطوني وقيدوني وحبسوني كنت زي لا مؤاخذة البوبي هنام لوحدي ومش هعرف اروح حتة .. كانت هتسيبني وهي مطمنة..


طب نراجع مع بعض الأخطاء وإزاي تتفادوها انتوا بقى عشان أنا خلاص فلت .. نياهاهاهااااااااااااااا
* عودوا ولادكم على السكاتات والبيبرونات حتى لو في أضيق الحدود.. هتريح المهماهات جداَ
* عودوا ولادكم على النوم لوحدهم تماماً من أول الرابع كدة وأكدوا عليه في السادس وميهمكيش من جوزك ينزعج شوية مش مشكلة.. ابقي هخليه يشوف له عروسة مؤقتا لحد ما المرحلة دي تخلص بالسلامة
* اشتروا لعيالكم سرير محوط بخشب وجنازير وأسلاك شائكة عشان يتعود على النوم لوحده بذمة ومتكونوش قلقانين ليقع ولا يتعور ولا يتوه في البيت
* بردوا أعصابكم عشان إحنا عيال جامدين أوي ولا هيهمنا لا زعيق ولا عياط ولا تهديد واللي عايزينه بنفذه
* علموا أولادكم حدود المكان والزمان.. بلاش السيبان ده.. احنا هنهزر هنا ولا إيه
*الباهبهات .. الله يكرمكم ساعدوا المهماهات.. متحسسوهاش ان دي غلطتها.. خلي موضوع العياط ده عادي.. مافيهاش حاجة يعني لو رحت الشغل نعسان كام يوم لغاية ما أمثالنا تتعود تنام زي البني ادمين.. وبلاش الحنية الزايدة وتروح تشيل وتتادي.. سيبونا نعيط شوية مافيهاش حاجة ده تلات ارباعه تمثيل متقلقوش..

كفاية كدة بقى عشان الست دي أمي هيجيلها استبحس لو فضفضت أكتر من كدة.. واتصلوا بيا لو حبيتوا اي استشارة.. وأنا هابقى أنزل درس مخصوص لأولادكم بعنوان كيف تصل بوالديك إلى الجنة لو هم اتجدعونوا وصبروا ..هع هع هع هع

وغيرنا العنوان

السلام عليكم ورحمة الله وبركاته..
بقالنا كتييييييييير مشفناش بعض..
مسلمناش على بعض..
ماما بتقول ان دي كانت اغنية سئيلة من بتوع البيت بيتك..
لا علينا..
مش احنا غيرنا العنوان..
اه.. عزلنا في بيت جديد.. عشان كدة مكنتش بكتب الأيام اللي فاتت دي..
كنت بعزل مع ماما او بالمعنى الأصح.. بعذب ماما :$$
وأول يوم أبات في البيت ده كان يوم الجمعة 31-7-2009م كان يوم 8 شعبان 1430هـ..
المهم عزلنا وبقى ليا اوضة لوحدي (هييييييييييه).. بس لسة بخاف انام لوحدي :( وكل شوية اعيط وماما تيجي تقعد جنبي لغاية ما اروح تاني في النوم..

اسيبكم بقى عشان لسة في توضيب كتيييييييييير لسة مخلصش..
هابقى ان شاء الله أنزل لكم بتفاصيل رحلة طيبة المصطفى عليه الصلاة والسلام ..

سلاااااااام

بسم الله.. هم النم يا روحي

السلااااااااااااام عليكم ورحمة الله وبركاته..

عارفة اني اتأخرت وكان المفروض اجي بعد الحقنة..
بس دلو ماطلعوش واحدة طلعوا تلاتااااااااااااااا عااااااااااااااااااااااا..
بس الحمدلله عدوا على خير.. شوية دوا سخونية على شوية فيكس للدهان على اثار العدوان.. وكله بقى بحمد الله تمام..
طبعا كالعادة كانت ليلة ليلاء.. ليلة السبت 4/7/2009م- 11 رجب 1430هـ مع الدكتورة هدى ..في مركز الملز الطبي الحديث جنب حديقة الحيوان عشان التاكسي يبقى عارف بس هههههههههه

المهم انا جاية عشان اقولكم اني أكلت .. هيييييييييييه..

اه والله أكلت رز اطفال من بتاع ميلوبا ده..
يوم التلات اللي بعد الحقن ده 7/7/2009م- 14رجب 1430هـ
كنا الساعة 12 ونص الظهر.. عند جارتنا خالتو رولا السورية..
وقعدنا أنا على الكنبة وماما على الأرض وخالتو رولا قدامنا.. عشان هي اللي صورتني وانا باكل..

كان اكل لذيذ .. معمول بلبن بيتي بقى هههههههه..
طبعاً لغمطة وبهدلة أخر تمام.. بهدلت نفسي وماما والكنبة .. بس بعد كدة بقيت حلوة وماما خدت بالها مبقتش ببهدل غير نفسي بس :D

في الخطة الخمسية الجاية بيقولوا الخضار هينزل القائمة .. أما نشوف طعمه ايه ده كمان..
بس الحمدلله نعمة

لغمط لغاميط.. :D